വിമാനയാത്രക്കാർക്ക് ആശ്വാസം; അധിക നിരക്കുകളിൽ ഇളവ്, പുതിയ നിയമങ്ങളുമായി ബ്രിട്ടീഷ് സർക്കാർ

വിമാനയാത്രക്കാർക്ക് ആശ്വാസമായി പുതിയ നിയമങ്ങളുമായി ബ്രിട്ടീഷ് സർക്കാർ. കുട്ടികൾക്കായി അടുത്ത സീറ്റ് തിരഞ്ഞെടുക്കുന്നതിനും വിമാന ടിക്കറ്റിലെ പേരിലെ ചെറിയ പിശകുകൾ തിരുത്തുന്നതിനും ഈടാക്കുന്ന അധിക നിരക്കുകൾ ഒഴിവാക്കുന്നതാണ് പുതിയ നിയമത്തിലെ പ്രധാന വ്യവസ്ഥകൾ. ഒക്ടോബർ 2 മുതൽ നിയമം പ്രാബല്യത്തിൽ വന്നതായി സർക്കാർ അറിയിച്ചു.

14 വയസ്സിൽ താഴെയുള്ള കുട്ടികൾക്ക് അടുത്ത സീറ്റ് സൗജന്യം

പുതിയ നിയമപ്രകാരം, 14 വയസ്സിൽ താഴെയുള്ള കുട്ടികൾക്ക് മാതാപിതാക്കളുടെയോ കൂടെ യാത്ര ചെയ്യുന്ന മുതിർന്ന വ്യക്തിയുടെയോ സമീപത്ത് അധിക നിരക്ക് ഈടാക്കാതെ സീറ്റ് അനുവദിക്കണം. കുടുംബമായി യാത്ര ചെയ്യുന്നവർക്ക് ഇത് വലിയ ആശ്വാസമാകും.
നിലവിൽ കുടുംബാംഗങ്ങൾക്ക് അടുത്തടുത്ത സീറ്റുകൾ ഉറപ്പാക്കാൻ വിമാനക്കമ്പനികൾ അധിക നിരക്ക് ഈടാക്കാറുണ്ട്. ചില സാഹചര്യങ്ങളിൽ മാതാപിതാക്കൾക്കും കുട്ടിക്കും സമീപത്തെ സീറ്റുകൾ ലഭിക്കുന്നതിന് മടക്കയാത്ര ഉൾപ്പെടെ 104 പൗണ്ട് വരെ അധികമായി നൽകേണ്ടിവന്നിരുന്നു. പുതിയ നിയമം ഈ ചെലവ് കുറയ്ക്കാൻ സഹായിക്കും.

ടിക്കറ്റിലെ ചെറിയ പിശകുകൾ തിരുത്താനും പണം നൽകേണ്ട

വിമാന ടിക്കറ്റ് ബുക്ക് ചെയ്യുമ്പോൾ പേരിൽ സംഭവിക്കുന്ന ചെറിയ അക്ഷരപ്പിശകുകൾ തിരുത്തുന്നതിനും ഇനി അധിക തുക നൽകേണ്ടതില്ല. നിലവിൽ ചില വിമാനക്കമ്പനികൾ ഇത്തരം തിരുത്തലുകൾക്ക് 40 പൗണ്ട് വരെ ഈടാക്കുന്നുണ്ട്. പുതിയ വ്യവസ്ഥയിലൂടെ ലളിതമായ പേരുപിശകുകൾ സൗജന്യമായി തിരുത്താൻ യാത്രക്കാർക്ക് സാധിക്കും.

പ്രശ്നമുണ്ടാക്കുന്ന യാത്രക്കാർക്കെതിരെയും നടപടി

വിമാനയാത്രയ്ക്കിടെ ഗുരുതരമായ പ്രശ്നങ്ങൾ സൃഷ്ടിക്കുന്ന യാത്രക്കാരെ തിരിച്ചറിയുന്നതിനായി പ്രത്യേക വിവരപങ്കിടൽ സംവിധാനം രൂപീകരിക്കാനും ബ്രിട്ടീഷ് സർക്കാർ ആലോചിക്കുന്നുണ്ട്. വിമാനക്കമ്പനികളുമായും വ്യോമയാന മേഖലയിലെ തൊഴിലാളി സംഘടനകളുമായും സഹകരിച്ചായിരിക്കും നടപടി.

2025ൽ ബ്രിട്ടനിൽ ഗുരുതരമായ രീതിയിൽ യാത്ര തടസ്സപ്പെടുത്തിയ ആയിരത്തിലധികം സംഭവങ്ങൾ റിപ്പോർട്ട് ചെയ്തതായി ഗതാഗത വകുപ്പ് അറിയിച്ചു. ആവർത്തിച്ച് പ്രശ്നങ്ങൾ സൃഷ്ടിക്കുന്ന യാത്രക്കാരെ തിരിച്ചറിയാനും ആവശ്യമായ സാഹചര്യങ്ങളിൽ യാത്രാവിലക്ക് ഉൾപ്പെടെയുള്ള നടപടികൾ സ്വീകരിക്കാനും പുതിയ സംവിധാനം സഹായിക്കും.

യാത്രക്കാരുടെ അവകാശങ്ങൾ ശക്തിപ്പെടുത്തുക ലക്ഷ്യം

വിമാനക്കമ്പനികളുടെ നയങ്ങളിൽ ഏകീകരണം കൊണ്ടുവരുന്നതിനും യാത്രക്കാരുടെ അവകാശങ്ങൾ സംരക്ഷിക്കുന്നതിനുമാണ് പുതിയ നിയമങ്ങളിലൂടെ സർക്കാർ ലക്ഷ്യമിടുന്നത്. ബ്രിട്ടനിലെയും യൂറോപ്യൻ യൂണിയനിലെയും യാത്രക്കാരുടെ അവകാശങ്ങൾ തമ്മിലുള്ള വ്യത്യാസം കുറയ്ക്കാനും ഈ നടപടികൾ സഹായിക്കുമെന്നാണ് വിലയിരുത്തൽ.

English Summary