ക്രൂഡ് ഓയില്‍ വില ബാരലിന് 108 ഡോളറിന് മുകളില്‍ തുടരുന്നതും ബാങ്ക് ഓഹരികളിലെ വില്‍പ്പനയും ആഗോള വിപണികളിലെ ദുര്‍ബലതയും ഇന്ത്യന്‍ ഓഹരി വിപണിയെ സമ്മര്‍ദത്തിലാക്കി. തിങ്കളാഴ്ച സെന്‍സെക്‌സ് 876.37 പോയിന്റ് (1.17 ശതമാനം) ഇടിഞ്ഞ് 73,852.90-ലും നിഫ്റ്റി 257.20 പോയിന്റ് (1.11 ശതമാനം) താഴ്ന്ന് 22,888.95-ലും ക്ലോസ് ചെയ്തു. എച്ച്ഡിഎഫ്സി ബാങ്ക് ഓഹരികള്‍ രണ്ട് ശതമാനം ഇടിഞ്ഞു. അറ്റ പലിശ മാര്‍ജിനിലുണ്ടാകാവുന്ന സമ്മര്‍ദവും വരുമാന വളര്‍ച്ച സംബന്ധിച്ച ആശങ്കകളും ബാങ്കിങ് ഓഹരികളെ ബാധിച്ചു. ബാങ്ക് നിഫ്റ്റി 0.5 ശതമാനവും ഇടിഞ്ഞു.
എണ്ണയ്ക്ക് തീ വില
ബ്രെന്റ് ക്രൂഡ് വില 1.5 ശതമാനം കുറഞ്ഞ് 108.27 ഡോളറിലും ഡബ്ല്യുടിഐ ക്രൂഡ് 0.6 ശതമാനം താഴ്ന്ന് 100.83 ഡോളറിലുമെത്തിയെങ്കിലും വില ഉയര്‍ന്ന നിലയില്‍ തന്നെ തുടരുന്നത് ആശങ്ക സൃഷ്ടിക്കുന്നുണ്ട്. ഇന്ത്യ വിക്‌സ് ഏകദേശം നാല് ശതമാനം ഉയര്‍ന്ന് 14.52-ലെത്തിയതും വിപണിയിലെ അനിശ്ചിതത്വം വര്‍ധിച്ചതിന്റെ സൂചനയാണ്.
ആഗോള എണ്ണവില ഉയര്‍ന്നുനില്‍ക്കുന്നത് ഇന്ത്യയെപ്പോലുള്ള എണ്ണ ഇറക്കുമതി രാജ്യങ്ങള്‍ക്ക് വലിയ വെല്ലുവിളിയാണ്. ക്രൂഡ് ഓയില്‍ വില വര്‍ധിക്കുന്നത് ഇറക്കുമതി ചെലവ് ഉയര്‍ത്താനും പണപ്പെരുപ്പ സമ്മര്‍ദം വര്‍ധിപ്പിക്കാനും കമ്പനികളുടെ പ്രവര്‍ത്തനച്ചെലവുകളെ ബാധിക്കാനും ഇടയാക്കും.
ബാങ്കുകള്‍ വീണു
ബാങ്കിങ് ഓഹരികളിലെ ഇടിവും വിപണിയെ ബാധിച്ചു. രണ്ടാം പാദ ഫലങ്ങള്‍ പുറത്തുവന്നതിന് പിന്നാലെ എച്ച്ഡിഎഫ്സി ബാങ്ക് ഓഹരികള്‍ രണ്ട് ശതമാനം താഴ്ന്നു. അറ്റ പലിശ മാര്‍ജിനിലുണ്ടാകാവുന്ന സമ്മര്‍ദവും വരുമാന വളര്‍ച്ച സംബന്ധിച്ച ആശങ്കകളുമാണ് ഇടിവിന് കാരണം. ബാങ്ക് നിഫ്റ്റി 0.5 ശതമാനമാണ് ഇടിഞ്ഞത്.
ഏഷ്യന്‍ വിപണികളിലെ ദുര്‍ബലതയും ആര്‍ട്ടിഫിഷ്യല്‍ ഇന്റലിജന്‍സ് മേഖലയിലെ നിക്ഷേപച്ചെലവിനെക്കുറിച്ചുള്ള ആശങ്കകളും ഇന്ത്യന്‍ വിപണിയുടെ മുന്നേറ്റത്തെ തടസ്സപ്പെടുത്തി. ആഗോള സാഹചര്യങ്ങളും കമ്പനികളുടെ സാമ്പത്തിക ഫലങ്ങളും വരും ദിവസങ്ങളില്‍ വിപണിയുടെ ഗതി നിര്‍ണയിക്കുന്നതില്‍ നിര്‍ണായകമാകും.
(Disclaimer: This does not constitute investment advice. Investors are advised to evaluate independently and consult with professional advisors before making any investments in the stock market, mutual funds, gold, or cryptocurrencies.)
English Summary
Crude oil prices soar; Sensex and Nifty fall sharply Brent crude fell 1.5% to $108.27 and WTI crude fell 0.6% to $100.83
