സംസ്ഥാനത്ത് സ്വർണവിലയിൽ ഇന്ന് വൻ ഇടിവ്. ഒരു ഗ്രാം 22 കാരറ്റ് സ്വർണത്തിന് 175 രൂപയാണ് ഇന്ന് മാത്രം കുറഞ്ഞത്. ഇതോടെ 13,060 രൂപയായി ഒരു ഗ്രാമിന്റെ വില. പവന് ആനുപാതികമായി 1400 രൂപ കുറഞ്ഞ് 1,04,480 രൂപയായി ഇന്നത്തെ വിപണിവില. കഴിഞ്ഞ രണ്ടാഴ്ചയ്ക്കിടെ ഏകദേശം 7000 രൂപയോളം കുറവാണ് സംസ്ഥാനത്ത് രേഖപ്പെടുത്തിയത്. അതേസമയം ഇന്ന് വെള്ളിവിലയിലും കുറവുണ്ടായിട്ടുണ്ട്. ഒരു ഗ്രാമിന് 220 രൂപയും, ഒരു കിലോഗ്രാമിന് 2,20,000 രൂപയുമാണ് ഇന്നത്തെ വില.
അന്താരാഷ്ട്ര വിപണിയിലെ സ്വർണവിലയിലുണ്ടാകുന്ന ഇടിവും ആഗോള സാമ്പത്തിക സാഹചര്യങ്ങളിലെ മാറ്റങ്ങളുമാണ് വിലത്തകർച്ചയ്ക്ക് പിന്നിലെ പ്രധാന ഘടകങ്ങൾ. അന്താരാഷ്ട്ര വിപണിയിൽ സ്വർണവില താഴുന്നത് ആഭ്യന്തര വിപണിയിലും പ്രതിഫലിക്കുന്നുണ്ട്. അമേരിക്കൻ ഡോളറിന്റെ മൂല്യത്തിലുണ്ടാകുന്ന വർധന, പലിശനിരക്കുകൾ ഉയർന്ന നിലയിൽ തുടരാനുള്ള സാധ്യത, അമേരിക്കൻ ട്രഷറി ബോണ്ടുകളിൽ നിന്നുള്ള വരുമാനത്തിലെ മാറ്റങ്ങൾ എന്നിവ സ്വർണവിലയെ സ്വാധീനിക്കുന്ന പ്രധാന ഘടകങ്ങളാണ്.
സ്വർണം പലിശ വരുമാനം നൽകാത്ത നിക്ഷേപമായതിനാൽ, ബോണ്ടുകളിൽ നിന്നുള്ള വരുമാനം ഉയരുമ്പോൾ നിക്ഷേപകർ സ്വർണത്തിൽനിന്ന് മറ്റ് ആസ്തികളിലേക്ക് മാറാനുള്ള സാധ്യതയുണ്ട്. ഇതും സ്വർണവിലയിൽ സമ്മർദമുണ്ടാക്കാം. അതേസമയം, ക്രൂഡ് ഓയിൽ വിലയിലുണ്ടാകുന്ന വർധനയും പണപ്പെരുപ്പത്തെക്കുറിച്ചുള്ള ആശങ്കകളും അമേരിക്കൻ കേന്ദ്രബാങ്കായ ഫെഡറൽ റിസർവിന്റെ പലിശനിരക്ക് സംബന്ധിച്ച തീരുമാനങ്ങളെ സ്വാധീനിച്ചേക്കാം. പലിശനിരക്കുകൾ ഉയർന്ന നിലയിൽ തുടരാനുള്ള സാധ്യത സ്വർണവിലയെ പ്രതികൂലമായി ബാധിക്കാം.
അന്താരാഷ്ട്ര വിപണിയിലെ വിലയ്ക്കൊപ്പം ഡോളറിനെതിരെ രൂപയുടെ മൂല്യത്തിലുണ്ടാകുന്ന മാറ്റങ്ങളും കേരളത്തിലെ സ്വർണവിലയെ സ്വാധീനിക്കുന്നുണ്ട്. അതിനാൽ, ആഗോള വിപണിയിലെ വിലയിടിവ് ആഭ്യന്തര വിപണിയിൽ എത്രത്തോളം പ്രതിഫലിക്കുമെന്നത് രൂപയുടെ വിനിമയനിരക്കിനെയും ആശ്രയിച്ചിരിക്കും. അന്താരാഷ്ട്ര വിപണിയിലെ മാറ്റങ്ങൾ തുടരുന്നതിനാൽ വരും ദിവസങ്ങളിലും സ്വർണവിലയിൽ ചാഞ്ചാട്ടത്തിന് സാധ്യതയുണ്ട്. എന്നാൽ, വില ഇനിയും കുറയുമോ അതോ തിരിച്ചുകയറുമോ എന്നത് ആഗോള സാമ്പത്തിക സാഹചര്യങ്ങളിലെ മാറ്റങ്ങളെ ആശ്രയിച്ചിരിക്കും.
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
