ആഫ്രിക്കൻ വിപണിയിലേക്ക് ചുവടുവെച്ച് ഇറാം ഹോൾഡിങ്; നമീബിയയിൽ പുതിയ ഓഫീസ് തുറന്നു

കൊച്ചി: ആഗോള വിപണിയിലെ സാന്നിധ്യം വിപുലീകരിക്കുന്നതിന്റെ ഭാഗമായി ഇറാം ഹോൾഡിങ് ആഫ്രിക്കൻ വിപണിയിലേക്ക് പ്രവേശിച്ചു. ഇതിന്റെ ഭാഗമായി നമീബിയയുടെ തലസ്ഥാനമായ വിൻഡ്‌ഹോക്കിൽ പുതിയ ഓഫീസ് പ്രവർത്തനമാരംഭിച്ചു. ആഫ്രിക്കൻ ഭൂഖണ്ഡത്തിൽ ദീർഘകാല പങ്കാളിത്തവും സുസ്ഥിര വളർച്ചയും ലക്ഷ്യമിട്ടുള്ള കമ്പനിയുടെ ആഗോള വികസന തന്ത്രത്തിലെ നിർണായക ചുവടുവയ്പ്പാണിത്.

വ്യവസായം, അടിസ്ഥാന സൗകര്യ വികസനം, മനുഷ്യവിഭവശേഷി തുടങ്ങിയ മേഖലകളിൽ ആഫ്രിക്കയിൽ ഉയർന്നുവരുന്ന ആവശ്യങ്ങൾക്കനുസൃതമായി സംയോജിത സേവനങ്ങൾ ലഭ്യമാക്കുന്നതിനും പ്രാദേശിക പങ്കാളിത്തം ശക്തിപ്പെടുത്തുന്നതിനും പുതിയ വിപണി പ്രവേശനം സഹായിക്കുമെന്ന് കമ്പനി അറിയിച്ചു. പ്രാദേശിക പ്രതിഭകളെ വളർത്തിയെടുക്കുന്നതിനും ദീർഘകാല ബിസിനസ് ബന്ധങ്ങൾ സ്ഥാപിക്കുന്നതിനും കമ്പനി ലക്ഷ്യമിടുന്നു.

2027-ഓടെ മൊസാംബിക്, അംഗോള, നൈജീരിയ, ഈജിപ്ത് എന്നീ രാജ്യങ്ങളിലേക്കും പ്രവർത്തനം വ്യാപിപ്പിക്കാനാണ് ഇറാം ഹോൾഡിങ്ങിന്റെ പദ്ധതി. ഹ്യൂമൻ ക്യാപിറ്റൽ മാനേജ്‌മെന്റ്, ഇൻസ്പെക്ഷൻ സർവീസസ്, സ്‌കിൽ ഡെവലപ്‌മെന്റ്, പവർ ഇലക്ട്രോണിക്‌സ് സിസ്റ്റംസ് എന്നീ നാല് പ്രധാന മേഖലകളെ കേന്ദ്രീകരിച്ചായിരിക്കും ആഫ്രിക്കയിലെ വികസനം.

മനുഷ്യവിഭവശേഷി മാനേജ്‌മെന്റിലൂടെ അനുയോജ്യമായ തൊഴിൽശേഷിയെ ബിസിനസ് ആവശ്യങ്ങളുമായി ബന്ധിപ്പിക്കുക, പരിശോധനാ സേവനങ്ങളിലൂടെ ഗുണനിലവാരവും സുരക്ഷയും ഉറപ്പാക്കുക, നൈപുണ്യ വികസനത്തിലൂടെ തൊഴിലാളികളുടെ ശേഷി വർധിപ്പിക്കുക, പവർ ഇലക്ട്രോണിക്‌സ് സംവിധാനങ്ങളിലൂടെ നൂതന സാങ്കേതികവിദ്യകൾക്കും വ്യാവസായിക ആവശ്യങ്ങൾക്കും പിന്തുണ നൽകുക എന്നിവയാണ് കമ്പനിയുടെ പ്രധാന പ്രവർത്തന മേഖലകൾ.

വിൻഡ്‌ഹോക്കിലെ പുതിയ ഓഫീസിന്റെ ഉദ്ഘാടനച്ചടങ്ങിൽ ഇറാം ഹോൾഡിങ്ങിന്റെ മുതിർന്ന നേതൃത്വനിരയിലെ അംഗങ്ങളും നമീബിയയിലെ തന്ത്രപ്രധാന പങ്കാളികളും പങ്കെടുത്തു. ആഫ്രിക്കയിലെ പ്രവർത്തനങ്ങൾക്ക് ശക്തമായ അടിത്തറയൊരുക്കുന്നതിൽ പ്രാദേശിക പങ്കാളികളുമായുള്ള സഹകരണം നിർണായകമാണെന്ന് കമ്പനി വ്യക്തമാക്കി.

നമീബിയയുടെ പേരിനും കമ്പനിയുടെ വികസന കാഴ്ചപ്പാടിനും തമ്മിൽ പ്രതീകാത്മകമായൊരു ബന്ധമുണ്ടെന്നും ഇറാം ഹോൾഡിങ് ചൂണ്ടിക്കാട്ടി. നമീബ് എന്ന പദത്തിന് ഖൊയ്ഖൊവേഗോവാബ് ഭാഷയിൽ ‘വിശാലമായ സ്ഥലം’ എന്ന അർഥമുണ്ടെന്നാണ് പൊതുവെ വ്യാഖ്യാനിക്കപ്പെടുന്നത്. പുതിയ വിപണികളിലേക്കുള്ള വളർച്ചയും അനന്തമായ സാധ്യതകളും ഈ ആശയം പ്രതിഫലിപ്പിക്കുന്നു.

ആഫ്രിക്കയെ ഒരു പുതിയ വിപണിയായി മാത്രമല്ല, ദീർഘകാല വളർച്ചയ്ക്കും തന്ത്രപ്രധാന പങ്കാളിത്തങ്ങൾക്കും വലിയ സാധ്യതകളുള്ള മേഖലയായാണ് ഇറാം ഹോൾഡിങ് കാണുന്നത്. പ്രാദേശിക പ്രതിഭകളെ ശാക്തീകരിക്കുകയും വ്യാവസായിക വികസനത്തിനും സാമ്പത്തിക വളർച്ചയ്ക്കും സംഭാവന നൽകുകയും ചെയ്യുന്നതിലൂടെ ആഫ്രിക്കയിൽ സുസ്ഥിരമായ ബിസിനസ് സാന്നിധ്യം കെട്ടിപ്പടുക്കുകയാണ് കമ്പനിയുടെ ലക്ഷ്യം.

English Summary