സംരംഭങ്ങളുടെ വിജയഗാഥകളിൽ പലപ്പോഴും മൂലധന നിക്ഷേപം, വിപണിയിലെ തന്ത്രങ്ങൾ, സാങ്കേതിക നൈപുണ്യം എന്നിവയ്ക്കാണ് മുൻഗണന നൽകാറുള്ളത്. ഇവയെല്ലാം അത്യന്താപേക്ഷിതമാണെങ്കിലും, ഒരു സംരംഭത്തെ വിജയപഥത്തിൽ എത്തിക്കുന്നതിനോ പാതിവഴിയിൽ തളർത്തുന്നതിനോ നിദാനമാകുന്ന ഒരു അദൃശ്യ ഘടകമുണ്ട്—ആത്മവിശ്വാസം. വനിതാ സംരംഭകരെ സംബന്ധിച്ചിടത്തോളം, ആത്മവിശ്വാസം എന്നത് വെറുമൊരു സ്വഭാവഗുണമല്ല, മറിച്ച് നേതൃത്വപാടവത്തെയും തീരുമാനങ്ങളെടുക്കാനുള്ള കഴിവിനെയും സ്വാധീനിക്കുന്ന തന്ത്രപ്രധാനമായ ഒരു ബിസിനസ് ആസ്തിയാണ്. തടസ്സങ്ങളെ അതിജീവിച്ച് മുന്നേറാൻ സംരംഭകയെ പ്രാപ്തയാക്കുന്ന ഈ ചാലകശക്തി, വാണിജ്യ ലോകത്തെ വെല്ലുവിളികളെ നേരിടാനുള്ള ഏറ്റവും മൂല്യവത്തായ ഒന്നാണ്.
നേടണം അനിശ്ചിതത്വങ്ങളെ അതിജീവിക്കാനുള്ള കരുത്ത്
അനിശ്ചിതാവസ്ഥയാണ് സംരംഭകത്വത്തിന്റെ പ്രധാന ഘടകം. വിപണിയിലെ ചലനങ്ങളോ ഉപഭോക്താക്കളുടെ മാറുന്ന താൽപ്പര്യങ്ങളോ നൂറു ശതമാനം കൃത്യതയോടെ പ്രവചിക്കുക അസാധ്യമാണ്. ഇത്തരം സന്ദർഭങ്ങളിൽ, അപൂർണ്ണമായ വിവരങ്ങൾ മാത്രം കൈവശമുള്ളപ്പോഴും നിർണ്ണായകമായ തീരുമാനങ്ങൾ കൈക്കൊള്ളാൻ ഒരു സംരംഭകയെ പ്രാപ്തയാക്കുന്നത് അവരുടെ ആത്മവിശ്വാസമാണ്. മറ്റുള്ളവർ സന്ദേഹിച്ചു നിൽക്കുന്നിടത്ത്, സ്വന്തം വിധിനിർണ്ണയത്തിൽ വിശ്വാസമർപ്പിക്കാനും ബിസിനസ്സിനെ മുന്നോട്ട് നയിക്കാനും ഇത് സഹായിക്കുന്നു.
ആത്മവിശ്വാസം നിറഞ്ഞ ഒരു സംരംഭകയാണെങ്കിൽ അവര്ക്ക് വിധിനിർണ്ണയത്തിൽ ദൃഢത ഉണ്ടാകും. അപൂർണ്ണമായ വിവരങ്ങൾക്കിടയിലും സ്വന്തം തീരുമാനങ്ങളെ വിശ്വസിക്കാനും അവ നടപ്പിലാക്കാനുമുള്ള ആന്തരിക കരുത്ത് ആത്മവിശ്വാസം പ്രദാനം ചെയ്യുന്നു. വ്യക്തമായ കാഴ്ചപ്പാടാണ് മറ്റൊരു ഘടകം. സംരംഭത്തിന്റെ ലക്ഷ്യങ്ങളും ദർശനങ്ങളും നിക്ഷേപകർക്കും പങ്കാളികൾക്കും മുന്നിൽ വ്യക്തതയോടെയും ആധികാരികതയോടെയും അവതരിപ്പിക്കാൻ ഇത് സംരംഭകയെ ഉത്തേജിപ്പിക്കുന്നു.
എങ്കിലും, ഈ ആന്തരിക കരുത്ത് പലപ്പോഴും സാമൂഹികവും മനഃശാസ്ത്രപരവുമായ ചില വിടവുകളാൽ തടസ്സപ്പെടാറുണ്ട്; ഇതിനെയാണ് ‘കോൺഫിഡൻസ് ഗ്യാപ്പ്’ എന്ന് വിളിക്കുന്നത്.
‘കോൺഫിഡൻസ് ഗ്യാപ്പ്’ മറികടക്കാം
ഗവേഷണങ്ങൾ വ്യക്തമാക്കുന്നത്, പുരുഷന്മാരെ അപേക്ഷിച്ച് സ്ത്രീകൾ പലപ്പോഴും തങ്ങളുടെ കഴിവുകളെ കുറച്ചുമാത്രം വിലയിരുത്തുന്നു എന്നാണ്. ഒരു പ്രവൃത്തിയിൽ നൂറ് ശതമാനം തയ്യാറെടുപ്പ് നടത്തിയാൽ മാത്രമേ മുന്നോട്ട് പോകാവൂ എന്ന ‘പെർഫെക്ഷൻ ട്രാപ്പ്’ അല്ലെങ്കിൽ പരിപൂർണ്ണതാ വാദം പലപ്പോഴും വനിതാ സംരംഭകർക്ക് തിരിച്ചടിയാകുന്നു. അതിവേഗം ചലിക്കുന്ന ഇന്നത്തെ വിപണിയിൽ, പരിപൂർണ്ണതയ്ക്കായി കാത്തുനിൽക്കുന്നത് ‘അവസര നഷ്ടത്തിന്’ കാരണമാകാറുണ്ട്.
വായ്പാ അപേക്ഷകൾ സമർപ്പിക്കുമ്പോഴോ, സങ്കീർണ്ണമായ കരാറുകളിൽ ഏർപ്പെടുമ്പോഴോ, ബിസിനസ് വിപുലീകരണത്തെക്കുറിച്ച് ആലോചിക്കുമ്പോഴോ ഈ ആത്മവിശ്വാസക്കുറവ് പ്രതിഫലിച്ചേക്കാം. ഒരു സംരംഭകൻ തന്റെ പദ്ധതികൾ 100% പൂർണ്ണമാകാൻ കാത്തിരിക്കുമ്പോൾ, ആത്മവിശ്വാസമുള്ള മറ്റൊരു എതിരാളി വിപണിയിലെ വിടവ് നികത്തി മുന്നേറിയേക്കാം. സംരംഭകത്വം എപ്പോഴും പരിപൂർണ്ണതയ്ക്കല്ല, മറിച്ച് അനുഭവങ്ങളിൽ നിന്ന് പഠിക്കാനും വളരാനുമുള്ള സന്നദ്ധതയ്ക്കാണ് പ്രതിഫലം നൽകുന്നത്. ഈ ആഭ്യന്തര വിടവുകൾ നികത്തുന്നത് സംരംഭകയുടെ വ്യക്തിഗത വളർച്ചയ്ക്ക് മാത്രമല്ല, അവരുടെ നേതൃപാടവത്തെയും ഗുണപരമായി സ്വാധീനിക്കുന്നു.
നേതൃപാടവവും സ്വാധീനശക്തിയും
ശരിയായ നേതൃത്വം എന്നത് നിക്ഷേപകർ, ജീവനക്കാർ, ഉപഭോക്താക്കൾ തുടങ്ങിയ സ്റ്റേക്ക്‌ഹോൾഡർമാരിൽ വിശ്വാസം ജനിപ്പിക്കാനുള്ള കഴിവാണ്. ഒരു സംരംഭക തന്റെ നിലപാടുകളിൽ പുലർത്തുന്ന ഉറപ്പാണ് മറ്റുള്ളവരിലേക്ക് ആത്മവിശ്വാസം പകരുന്നത്. സംരംഭത്തിന്റെ ദിശാബോധത്തിൽ നേതാവിന് വിശ്വാസമുണ്ടെന്ന് ബോധ്യപ്പെടുമ്പോൾ മാത്രമാണ് ജീവനക്കാർ മികച്ച രീതിയിൽ പ്രവർത്തിക്കുന്നതും നിക്ഷേപകർ മൂലധനം ഇറക്കാൻ തയ്യാറാകുന്നതും.
ആത്മവിശ്വാസം എന്നാൽ എല്ലാ ചോദ്യങ്ങൾക്കും ഉത്തരം ഉണ്ടായിരിക്കുക എന്നതല്ല. മറിച്ച്, തീരുമാനമെടുക്കാനുള്ള ധൈര്യം കാണിക്കുകയും അതിന്റെ ഉത്തരവാദിത്തം ഏറ്റെടുക്കുകയും സാഹചര്യങ്ങൾക്കനുസരിച്ച് തന്ത്രങ്ങൾ മാറ്റുകയും ചെയ്യുക എന്നതാണ്. ഇത്തരത്തിലുള്ള നേതൃത്വപരമായ ചടുലത ബ്രാൻഡിന്റെ വിശ്വാസ്യത വർദ്ധിപ്പിക്കുന്നു. ശക്തമായ നേതൃത്വത്തിലൂടെ നേടിയെടുക്കുന്ന ഈ വിശ്വാസം സംരംഭത്തിലെ നവീകരണങ്ങൾക്കും നൂതനമായ മാറ്റങ്ങൾക്കും വഴിതെളിക്കുന്നു.
ആത്മവിശ്വാസം ഒരു ബിസിനസ് നൈപുണ്യമാക്കാം
ആത്മവിശ്വാസം എന്നത് ജന്മനാ ലഭിക്കുന്ന ഒരു ഗുണമല്ല, മറിച്ച് നിരന്തരമായ പരിശീലനത്തിലൂടെ വളർത്തിയെടുക്കാവുന്ന ഒരു ബിസിനസ് നൈപുണ്യമാണ്. ഇതിനായുള്ള തന്ത്രപ്രധാനമായ നിക്ഷേപങ്ങൾ താഴെ പറയുന്നവയാണ്:
- നിരന്തരമായ പഠനം: മേഖലയിലെ അറിവ് വർധിപ്പിക്കുന്നത് സംരംഭകയുടെ സ്വയം വിശ്വാസത്തെയും ആധികാരികതയെയും ദൃഢമാക്കുന്നു.
- യഥാർത്ഥ്യബോധമുള്ള ലക്ഷ്യങ്ങൾ: കൈവരിക്കാൻ സാധിക്കുന്ന ചെറിയ ലക്ഷ്യങ്ങൾ നിശ്ചയിക്കുകയും അവ ഓരോന്നായി പൂർത്തിയാക്കുകയും ചെയ്യുന്നത് ആത്മവിശ്വാസം വർദ്ധിപ്പിക്കും.
- നേട്ടങ്ങൾ അടയാളപ്പെടുത്തുക: ഓരോ ചെറിയ നാഴികക്കല്ലും പിന്നിടുമ്പോൾ അത് ആഘോഷിക്കുന്നത് വിജയത്തിലേക്കുള്ള യാത്രയിൽ വലിയ ഊർജ്ജം നൽകുന്നു.
- മെന്റർഷിപ്പും ശൃംഖലാ നിർമ്മാണവും: അനുഭവസമ്പത്തുള്ളവരുടെ മാർഗ്ഗനിർദ്ദേശങ്ങൾ തേടുന്നതും പ്രൊഫഷണൽ നെറ്റ്‌വർക്കുകളുടെ ഭാഗമാകുന്നതും വെല്ലുവിളികളെ നേരിടാൻ കൂടുതൽ കരുത്ത് നൽകുന്നു.
ചുരുക്കത്തിൽ, ഇത്തരം നൈപുണ്യങ്ങൾ ആർജ്ജിക്കുന്നത് ബിസിനസ്സിൽ ഒരു മത്സരാധിഷ്ഠിത മുൻതൂക്കം നൽകുന്നു.സംരംഭകത്വത്തിലേക്ക് ചുവടുവെക്കുന്ന ഓരോ വനിതയും തന്റെ സ്ഥാപനത്തിന്റെ വളർച്ചയ്ക്കായി നിക്ഷേപിക്കുന്നതിനോടൊപ്പം തന്നെ സ്വന്തം ആത്മവിശ്വാസത്തിലും നിക്ഷേപം നടത്തേണ്ടതുണ്ട്. കാരണം, സ്വയം വിശ്വസിക്കുക എന്നതായിരിക്കും ഒരു സംരംഭക തന്റെ ബിസിനസ്സിൽ നടത്തുന്ന ഏറ്റവും മൂല്യവത്തായ നിക്ഷേപം.
സന്ധ്യ രാധാകൃഷ്‌ണൻ: സംരംഭകയും QBG വനിതാ സംരംഭക നെറ്റ്‌വർക്ക് സ്ഥാപകയുമാണ് ലേഖിക
