തിരുവനന്തപുരം: കേരളത്തിന്റെ കടല്‍ത്തീരവും തുറമുഖങ്ങളും ഉള്‍നാടന്‍ ജലപാതകളും സംസ്ഥാനത്തിന്റെ സാമ്പത്തിക വളര്‍ച്ചയ്ക്ക് കൂടുതല്‍ കരുത്താകുമോ? ചരക്കുനീക്കത്തിനും കയറ്റുമതിക്കും കപ്പല്‍നിര്‍മാണത്തിനും സമുദ്രാധിഷ്ഠിത വ്യവസായങ്ങള്‍ക്കും പുതിയ അവസരങ്ങള്‍ എങ്ങനെ തുറക്കാം? ഈ സാധ്യതകള്‍ പരിശോധിക്കുകയാണ് ദ പ്രോഫിറ്റ് ന്യൂസ് സംഘടിപ്പിക്കുന്ന ‘ബ്രാന്‍ഡ് കേരളം 2026’ലെ ‘മിഷന്‍ സമുദ്ര’ ചര്‍ച്ച.
തിരുവനന്തപുരത്തെ ഒ ബൈ താമരയില്‍ നടക്കുന്ന പരിപാടിയില്‍ വ്യവസായ പ്രമുഖര്‍, കയറ്റുമതി മേഖലയിലെ പ്രതിനിധികള്‍, ഷിപ്പിങ് വിദഗ്ധര്‍, തുറമുഖ-സമുദ്രസുരക്ഷാ രംഗത്തെ ഉദ്യോഗസ്ഥര്‍ എന്നിവര്‍ പങ്കെടുക്കും. മുഖ്യമന്ത്രി വി.ഡി. സതീശന് മുഖ്യാതിഥിയായും വ്യവസായം, വാണിജ്യം, ഐ.ടി. വകുപ്പ് മന്ത്രി പി.കെ. കുഞ്ഞാലിക്കുട്ടിയും പട്ടികജാതി, പട്ടികവര്‍ഗ, പിന്നാക്ക വിഭാഗ വികസന മന്ത്രി കെ.എ. തുളസിയും വിശിഷ്ടാതിഥികളായും പങ്കെടുക്കും.
കേരളത്തിന്റെ സമുദ്രസമ്പത്ത് സാമ്പത്തിക വളര്‍ച്ചയ്ക്കും വ്യവസായ വികസനത്തിനും കൂടുതല്‍ പ്രയോജനപ്പെടുത്തുന്നതിനുള്ള പ്രായോഗിക മാര്‍ഗങ്ങള്‍ കണ്ടെത്തുകയാണ് ചര്‍ച്ചയുടെ ലക്ഷ്യം.
ജലപാതകളെയും തുറമുഖങ്ങളെയും ബന്ധിപ്പിക്കണം
‘മിഷന്‍ സമുദ്ര’യുടെ പ്രധാന ചര്‍ച്ചാവിഷയങ്ങളിലൊന്ന് ഉള്‍നാടന്‍ ജലപാതകളെ കടല്‍ത്തുറമുഖങ്ങളുമായി ബന്ധിപ്പിച്ച് വാണിജ്യപരമായി നിലനില്‍ക്കുന്നതും കാര്യക്ഷമവുമായ ചരക്കുനീക്ക ശൃംഖല വികസിപ്പിക്കുക എന്നതാണ്.
ചരക്കുനീക്കത്തിനായി വ്യത്യസ്ത ഗതാഗത സംവിധാനങ്ങളെ ഏകോപിപ്പിക്കുന്നതിലൂടെ പുതിയ വാണിജ്യസാധ്യതകള്‍ കണ്ടെത്താനാകും. എന്നാല്‍ അത്തരമൊരു ശൃംഖല വിജയകരമായി നടപ്പാക്കാന്‍ അടിസ്ഥാനസൗകര്യങ്ങള്‍, നിക്ഷേപം, പ്രവര്‍ത്തനരീതികള്‍, നിയന്ത്രണ സംവിധാനങ്ങള്‍, ചരക്കുകളുടെ ലഭ്യത, വിവിധ ഏജന്‍സികള്‍ തമ്മിലുള്ള ഏകോപനം എന്നിവ നിര്‍ണായകമാണ്.
ഈ മേഖലയില്‍ മുന്നിലുള്ള തടസ്സങ്ങള്‍ തിരിച്ചറിയുകയും പ്രായോഗിക പരിഹാരങ്ങള്‍ നിര്‍ദേശിക്കുകയും ചെയ്യുകയാണ് ചര്‍ച്ചയുടെ ലക്ഷ്യം. ആശയങ്ങള്‍ പങ്കുവെക്കുന്നതില്‍ ഒതുങ്ങാതെ നടപ്പാക്കാവുന്ന ബിസിനസ് മാതൃകകളും തുടര്‍നടപടികളും കണ്ടെത്തുന്നതിനാണ് ഊന്നല്‍.
സമുദ്രവ്യാപാര രംഗത്തെ പ്രമുഖര്‍ പങ്കെടുക്കും
സീഫുഡ് എക്സ്പോര്‍ട്ടേഴ്സ് അസോസിയേഷന്‍ ഓഫ് ഇന്ത്യയുടെ ചീഫ് എക്സിക്യൂട്ടീവ് ഓഫീസറും വിരമിച്ച ഐ.ആര്‍.എസ് ഉദ്യോഗസ്ഥനുമായ ഡോ. കെ.എന്‍. രാഘവന്‍ ചര്‍ച്ചയ്ക്ക് നേതൃത്വം നല്‍കും.
ക്ലാരിയോണ്‍ ഷിപ്പിങ് സി.ഇ.ഒ അനിയന്‍കുട്ടി, കോസ്റ്റ് ഗാര്‍ഡ് ഡെപ്യൂട്ടി ഇന്‍സ്‌പെക്ടര്‍ ജനറല്‍ കമാന്‍ഡര്‍ ആശിഷ് മെഹ്‌റോത്ര, മംഗളൂരുവിലെ ഹാജി ആന്‍ഡ് കമ്പനിയുടെ ബിസിനസ് ഡെവലപ്‌മെന്റ് ഡയറക്ടര്‍ ഹമീദ് അലി, ബേബി മറൈന്‍ ഗ്രൂപ്പിലെ അലക്‌സ് കെ. നൈനാന്‍, സമുദ്ര ഷിപ്പ്യാര്‍ഡ് ചെയര്‍മാനും മാനേജിങ് ഡയറക്ടറുമായ ഡോ. എസ്. ജീവന്‍, വിഴിഞ്ഞം തുറമുഖത്തെ പോര്‍ട്ട് ഫെസിലിറ്റി സെക്യൂരിറ്റി ഓഫീസര്‍ ക്യാപ്റ്റന്‍ ഗിരീഷ് ചന്ദ്ര എന്നിവര്‍ പങ്കെടുക്കും.
സമുദ്രോല്‍പ്പന്ന കയറ്റുമതി, കപ്പല്‍നിര്‍മാണം, ചരക്കുഗതാഗതം, തുറമുഖ പ്രവര്‍ത്തനം, സമുദ്രസുരക്ഷ തുടങ്ങിയ മേഖലകളിലെ വ്യത്യസ്ത അനുഭവങ്ങള്‍ പങ്കുവെക്കുന്നതിലൂടെ കേരളത്തിന്റെ സമുദ്രസമ്പദ്വ്യവസ്ഥയുടെ വളര്‍ച്ചയ്ക്കുള്ള വഴികള്‍ കൂടുതല്‍ വ്യക്തമായി വിലയിരുത്താന്‍ ഈ ചര്‍ച്ചയ്ക്ക് കഴിയും.
തുറമുഖങ്ങളും ജലപാതകളും കപ്പല്‍നിര്‍മാണവും കയറ്റുമതിയും പരസ്പരം ബന്ധിപ്പിച്ചുള്ള വളര്‍ച്ചാ മാതൃകയ്ക്ക് വലിയ പ്രാധാന്യമുണ്ട്. എന്നാല്‍ അതിന്റെ വിജയം ഉറപ്പാക്കാന്‍ അടിസ്ഥാനസൗകര്യ വികസനത്തോടൊപ്പം സാമ്പത്തികമായി നിലനില്‍ക്കാവുന്ന പ്രവര്‍ത്തനരീതികളും ദീര്‍ഘകാല നിക്ഷേപവും ആവശ്യമാണ്. ഈ യാഥാര്‍ഥ്യങ്ങള്‍ മുന്‍നിര്‍ത്തിയാണ് ‘മിഷന്‍ സമുദ്ര’ രൂപകല്‍പ്പന ചെയ്തിരിക്കുന്നത്.
സംരംഭക മികവിന് പ്രോഫിറ്റ് ടസ്‌കര്‍ പുരസ്‌കാരങ്ങള്‍
‘ബ്രാന്‍ഡ് കേരളം 2026’ന്റെ ഭാഗമായി ദ പ്രോഫിറ്റ് ന്യൂസ് അവതരിപ്പിക്കുന്ന ‘പ്രോഫിറ്റ് ടസ്‌കര്‍ പുരസ്‌കാരങ്ങള്‍ 2026’ സംരംഭക മികവിനെയും വ്യവസായ നേതൃത്വത്തെയും ആദരിക്കുന്നതിനുള്ള വേദിയാണ്. ഐ.സി.ടി.ഇ.പി കൗണ്‍സിലുമായി സഹകരിച്ചാണ് പുരസ്‌കാരങ്ങള്‍ അവതരിപ്പിക്കുന്നത്.
സംരംഭകത്വം, നവീകരണം, മികവ്, സാമ്പത്തിക പുരോഗതി എന്നിവയ്ക്ക് സംഭാവന നല്‍കുന്ന സംരംഭകരെയും വ്യവസായ നേതാക്കളെയും വളര്‍ന്നുവരുന്ന സ്ഥാപനങ്ങളെയും ആദരിക്കുകയാണ് പുരസ്‌കാരങ്ങളുടെ ലക്ഷ്യം.
വെല്ലുവിളികളെ അവസരങ്ങളാക്കി മാറ്റുകയും ദീര്‍ഘകാല നിലനില്‍പ്പുള്ള സ്ഥാപനങ്ങള്‍ കെട്ടിപ്പടുക്കുകയും സമൂഹത്തില്‍ ഗുണപരമായ സ്വാധീനം സൃഷ്ടിക്കുകയും ചെയ്യുന്ന സംരംഭക യാത്രകള്‍ക്ക് അംഗീകാരം നല്‍കുന്നതിലൂടെ പുതിയ സംരംഭകര്‍ക്ക് പ്രചോദനം പകരാനാണ് ഈ സംരംഭം ലക്ഷ്യമിടുന്നത്.
പുരസ്‌കാരങ്ങളുടെ രണ്ടാം പതിപ്പ് എന്ന നിലയില്‍, കേരളത്തിലെ സംരംഭക സമൂഹത്തിന്റെ നേട്ടങ്ങള്‍ക്കും നേതൃത്വത്തിനും കൂടുതല്‍ ശ്രദ്ധ നേടിക്കൊടുക്കുന്ന വേദിയായി ഇത് മാറുന്നു.
വികസന കാഴ്ചപ്പാടുമായി ‘ഒന്നാമതാകണം കേരളം’
ദ പ്രോഫിറ്റ് സ്റ്റാന്‍ഡേര്‍ഡ് മാസികയുടെ ‘ഒന്നാമതാകണം കേരളം’ പ്രത്യേക പതിപ്പും പരിപാടിയുടെ ഭാഗമാണ്. സംസ്ഥാനത്തിന്റെ വികസനത്തിനായി സംരംഭകരും വ്യവസായ പ്രമുഖരും മുന്നോട്ടുവെക്കുന്ന നിര്‍ദേശങ്ങള്‍, നിക്ഷേപസാധ്യതകള്‍, നവീകരണം, തൊഴിലവസരങ്ങള്‍, ആഗോള മത്സരശേഷി എന്നിവയാണ് പതിപ്പിന്റെ പ്രധാന വിഷയങ്ങള്‍.
പ്രത്യേക പതിപ്പ് മുഖ്യമന്ത്രി വി.ഡി. സതീശന് കൈമാറും. കേരളത്തിന്റെ സാമ്പത്തിക ഭാവിയെക്കുറിച്ചുള്ള വ്യവസായ സമൂഹത്തിന്റെ കാഴ്ചപ്പാടുകള്‍ പൊതുചര്‍ച്ചയിലേക്ക് എത്തിക്കാനുള്ള ശ്രമത്തിന്റെ ഭാഗമാണിത്.
കൂടാതെ, എഫ്.വൈ.ബി.ബി. ഗ്രൂപ്പ് സിന്എക്‌സ് എന്ന സംരംഭത്തില്‍ നടത്തുന്ന നിക്ഷേപത്തിന്റെ പ്രഖ്യാപനവും ചെക്ക് കൈമാറ്റച്ചടങ്ങും നടക്കും. നിക്ഷേപകരും വളര്‍ന്നുവരുന്ന സംരംഭങ്ങളും തമ്മിലുള്ള സഹകരണം ശക്തിപ്പെടുത്തുന്നതിന്റെ പ്രാധാന്യം ഈ സംരംഭം ഉയര്‍ത്തിക്കാട്ടുന്നു.
കേരളത്തിന്റെ സമുദ്രസമ്പത്ത് കൂടുതല്‍ പ്രയോജനപ്പെടുത്തുന്നതിനും സംരംഭക മികവിന് അംഗീകാരം നല്‍കുന്നതിനും വികസന നിര്‍ദേശങ്ങള്‍ പങ്കുവെക്കുന്നതിനും ഒരുമിച്ചുള്ള വേദിയായാണ് ‘ബ്രാന്‍ഡ് കേരളം 2026’ ശ്രദ്ധ നേടുന്നത്. സാധ്യതകളെ പ്രായോഗികമായ വാണിജ്യ അവസരങ്ങളാക്കി മാറ്റാനുള്ള വഴികള്‍ കണ്ടെത്തുക എന്നതാണ് ‘മിഷന്‍ സമുദ്ര’യുടെ പ്രധാന പ്രസക്തി.
