വ്യവസായ വളര്‍ച്ചയും നിക്ഷേപസാധ്യതകളും പ്രധാന ചര്‍ച്ചാവിഷയം; കെ.എസ്.ഐ.ഡി.സി., കിന്‍ഫ്ര, കെല്‍ട്രോണ്‍ മേധാവികള്‍ ഉള്‍പ്പെടെ പ്രമുഖര്‍ പങ്കെടുക്കും
തിരുവനന്തപുരം: കേരളത്തില്‍നിന്നുള്ള ഉല്‍പ്പന്നങ്ങള്‍ക്കും സംരംഭങ്ങള്‍ക്കും ആഗോള വിപണിയില്‍ കൂടുതല്‍ അംഗീകാരം നേടിക്കൊടുക്കാന്‍ എന്തുചെയ്യാനാകും? സംസ്ഥാനത്തിന്റെ വ്യവസായ ശേഷിയെ നിക്ഷേപമായും തൊഴിലവസരങ്ങളായും കയറ്റുമതിയായും എങ്ങനെ മാറ്റാം? ഈ ചോദ്യങ്ങള്‍ക്ക് ഉത്തരം തേടുകയാണ് ദ പ്രോഫിറ്റ് ന്യൂസ് സംഘടിപ്പിക്കുന്ന ‘ബ്രാന്‍ഡ് കേരളം 2026’ലെ ‘മേക് ഇന്‍ കേരളം’ ചര്‍ച്ച.
തിരുവനന്തപുരത്തെ ഒ ബൈ താമരയില്‍ നടക്കുന്ന പരിപാടിയില്‍ വ്യവസായ പ്രമുഖരും സംരംഭകരും വ്യവസായ വികസന ഏജന്‍സികളുടെ പ്രതിനിധികളും ഒത്തുചേരും. മുഖ്യമന്ത്രി വി.ഡി. സതീശന് മുഖ്യാതിഥിയായും വ്യവസായ, വാണിജ്യ, ഐ.ടി. വകുപ്പ് മന്ത്രി പി.കെ. കുഞ്ഞാലിക്കുട്ടിയും പട്ടികജാതി, പട്ടികവര്‍ഗ, പിന്നാക്ക വിഭാഗ വികസന മന്ത്രി കെ.എ. തുളസിയും വിശിഷ്ടാതിഥികളായും പങ്കെടുക്കും.
കേരളത്തിന്റെ സംരംഭകശേഷിയെ ആഗോള വിപണിയിലെ മത്സരമികവാക്കി മാറ്റുന്നതിനുള്ള സാധ്യതകള്‍ പരിശോധിക്കുകയാണ് ചര്‍ച്ചയുടെ പ്രധാന ലക്ഷ്യം. പ്രാദേശികമായി ശക്തമായ സംരംഭങ്ങള്‍ക്ക് അന്താരാഷ്ട്ര വിപണിയില്‍ വിശ്വാസ്യത നേടാനും വിപണിപ്രവേശനം വര്‍ധിപ്പിക്കാനും സഹായിക്കുന്ന ഘടകങ്ങള്‍ വിലയിരുത്തും.
ബ്രാന്‍ഡ് കേരളം
ഒരു ഉല്‍പ്പന്നത്തിന്റെ ഗുണമേന്മയ്‌ക്കൊപ്പം അത് എവിടെനിന്നാണ് വരുന്നതെന്നതും ഉപഭോക്താക്കളുടെ തീരുമാനങ്ങളെ സ്വാധീനിക്കാം. കേരളത്തിന്റെ സാംസ്‌കാരിക പൈതൃകം, ഉല്‍പ്പാദന പരിചയം, നൈപുണ്യം, പ്രകൃതിവിഭവങ്ങള്‍ എന്നിവയെ ആഗോള വിപണിയില്‍ ഒരു മത്സരനേട്ടമാക്കി മാറ്റാനുള്ള സാധ്യതകള്‍ ‘മേക് ഇന്‍ കേരളം’ ചര്‍ച്ചയുടെ പ്രധാന ആകര്‍ഷണമാണ്.
‘ബ്രാന്‍ഡ് കേരളം’ എന്ന അംഗീകാരമുദ്ര എന്തിനെയാണ് പ്രതിനിധീകരിക്കേണ്ടത്? അതിന്റെ പേരില്‍ വിപണിയിലെത്തുന്ന ഉല്‍പ്പന്നങ്ങള്‍ക്ക് ഗുണമേന്മയും വിശ്വാസ്യതയും ഉറപ്പാക്കാന്‍ എന്തെല്ലാം മാനദണ്ഡങ്ങള്‍ വേണം? ചെറുകിട-ഇടത്തരം സംരംഭങ്ങള്‍ക്കും വളര്‍ന്നുവരുന്ന സ്ഥാപനങ്ങള്‍ക്കും ആഗോള വിപണികളിലേക്ക് കടക്കാന്‍ എങ്ങനെ സഹായം ലഭ്യമാക്കാം? തുടങ്ങിയ ചോദ്യങ്ങള്‍ ചര്‍ച്ചയില്‍ ഉയരും.
ബ്രാന്‍ഡ് രൂപീകരണത്തിനൊപ്പം ഉല്‍പ്പാദനക്ഷമത, സാങ്കേതികവിദ്യ, നവീകരണം, നിക്ഷേപം, വിപണന തന്ത്രങ്ങള്‍ എന്നിവയും വ്യവസായ വളര്‍ച്ചയില്‍ നിര്‍ണായകമാണ്. കേരളത്തിലെ സംരംഭങ്ങള്‍ക്ക് ആഭ്യന്തര വിപണിക്ക് അപ്പുറത്തേക്ക് വളരാന്‍ ആവശ്യമായ സാഹചര്യങ്ങള്‍ സൃഷ്ടിക്കേണ്ടതിന്റെ പ്രാധാന്യവും ഇതിലൂടെ മുന്നോട്ടുവരുന്നു.
വ്യവസായ വികസന രംഗത്തെ പ്രമുഖര്‍ ഒരുമിക്കുന്നു
കെ.എസ്.ഐ.ഡി.സി. മാനേജിങ് ഡയറക്ടര്‍ സ്‌നേഹില്‍ കുമാര്‍ സിങ് ഐ.എ.എസ്. അധ്യക്ഷനാകുന്ന ചര്‍ച്ചയില്‍ സിന്തൈറ്റ് ഇന്‍ഡസ്ട്രീസിന്റെ എക്‌സിക്യൂട്ടീവ് ചെയര്‍മാന്‍ ഡോ. വിജു ജേക്കബ്, കിന്‍ഫ്ര മാനേജിങ് ഡയറക്ടര്‍ സന്തോഷ് കോശി തോമസ്, കെല്‍ട്രോണ്‍ മാനേജിങ് ഡയറക്ടര്‍ വൈസ് അഡ്മിറല്‍ ശ്രീകുമാര്‍ നായര്‍ എന്നിവര്‍ പങ്കെടുക്കും.
കൂടാതെ, ബീറ്റാ ഗ്രൂപ്പ് ചെയര്‍മാന്‍ ജെ. രാജ്‌മോഹന്‍ പിള്ള, നവാള്‍ട്ട് ഗ്രൂപ്പ് സ്ഥാപകനും സി.ഇ.ഒയുമായ സന്ദിത് തണ്ടശ്ശേരി, ആപ്റ്റിവ് കണക്ഷന്‍ സിസ്റ്റംസ് ഇന്ത്യ പ്രൈവറ്റ് ലിമിറ്റഡ് മാനേജിങ് ഡയറക്ടര്‍ രമേശ് നായര്‍ എന്നിവരും ചര്‍ച്ചയുടെ ഭാഗമാകും.
ഭക്ഷ്യസംസ്‌കരണം, സുഗന്ധവ്യഞ്ജന സത്ത് ഉല്‍പ്പാദനം, വ്യവസായ അടിസ്ഥാനസൗകര്യങ്ങള്‍, ഇലക്ട്രോണിക്‌സ്, വാഹന സാങ്കേതികവിദ്യ, സൗരോര്‍ജ അധിഷ്ഠിത സമുദ്രഗതാഗതം തുടങ്ങിയ മേഖലകളിലെ അനുഭവങ്ങള്‍ ഈ കൂട്ടായ്മയ്ക്ക് വ്യത്യസ്തമായ കാഴ്ചപ്പാടുകള്‍ നല്‍കും.
കേരളത്തില്‍നിന്നുള്ള സംരംഭങ്ങള്‍ക്ക് പ്രാദേശിക വിഭവങ്ങളും നൈപുണ്യവും ഉപയോഗിച്ച് ആഗോളതലത്തില്‍ മത്സരിക്കാന്‍ കഴിയുമെന്ന് തെളിയിക്കുന്ന മാതൃകകള്‍ കൂടുതല്‍ വളര്‍ത്തേണ്ടതിന്റെ ആവശ്യകതയും ചര്‍ച്ചയുടെ പശ്ചാത്തലത്തിലുണ്ട്.
വികസന നിര്‍ദേശങ്ങളുമായി ‘ഒന്നാമതാകണം കേരളം’
ദ പ്രോഫിറ്റ് സ്റ്റാന്‍ഡേര്‍ഡ് മാഗസീന്റെ പ്രത്യേക പതിപ്പായ ‘ഒന്നാമതാകണം കേരളം’ കേരളത്തിന്റെ സാമ്പത്തിക വളര്‍ച്ചയ്ക്കായി സംരംഭകരും വ്യവസായ പ്രമുഖരും മുന്നോട്ടുവെക്കുന്ന ആശയങ്ങള്‍ അവതരിപ്പിക്കുന്നു. നിക്ഷേപം, നവീകരണം, തൊഴിലവസരങ്ങള്‍, സംരംഭകത്വം, ആഗോള മത്സരശേഷി എന്നിവയുമായി ബന്ധപ്പെട്ട നിര്‍ദേശങ്ങളാണ് ഇതിന്റെ ഉള്ളടക്കത്തിന്റെ കേന്ദ്രം.
പ്രത്യേക പതിപ്പ് മുഖ്യമന്ത്രി വി.ഡി. സതീശന് കൈമാറും. വ്യവസായ സമൂഹത്തിന്റെ അനുഭവങ്ങളും വികസന നിര്‍ദേശങ്ങളും പൊതുചര്‍ച്ചയിലേക്ക് കൊണ്ടുവരാനുള്ള ശ്രമത്തിന്റെ ഭാഗമാണിത്.
അതേസമയം, എഫ്.വൈ.ബി.ബി. ഗ്രൂപ്പ്, ഓട്ടോമേഷന്‍ മേഖലിലെ സ്റ്റാര്‍ട്ടപ്പായ സിന്‍ക്‌സില്‍ നടത്തുന്ന നിക്ഷേപത്തിന്റെ പ്രഖ്യാപനവും പരിപാടിയില്‍ ഉള്‍പ്പെടുത്തിയിട്ടുണ്ട്. വളര്‍ന്നുവരുന്ന സംരംഭങ്ങള്‍ക്ക് നിക്ഷേപകരുമായുള്ള ബന്ധം ശക്തിപ്പെടുത്തുന്നതിനും പ്രവര്‍ത്തനവികസനത്തിനുള്ള സാധ്യതകള്‍ കണ്ടെത്തുന്നതിനും ഇത്തരം പങ്കാളിത്തങ്ങള്‍ സഹായകമാകാം.
കേരളത്തിന്റെ വ്യവസായ വളര്‍ച്ചയെക്കുറിച്ചുള്ള ചര്‍ച്ചകള്‍ക്ക് പ്രായോഗിക ദിശ നല്‍കുക എന്നതാണ് ‘മേക് ഇന്‍ കേരളം’ മുന്നോട്ടുവെക്കുന്ന പ്രധാന ലക്ഷ്യം. കേരളത്തിന്റെ പേര് ലോകവിപണിയില്‍ കൂടുതല്‍ ശക്തമായ ബ്രാന്‍ഡായി മാറണമെങ്കില്‍ ഉല്‍പ്പന്നങ്ങളുടെ മികവും വ്യവസായ ശേഷിയും നിക്ഷേപസൗഹൃദ സാഹചര്യങ്ങളും ഒരുമിച്ച് വളരേണ്ടതുണ്ട്. ഈ സാധ്യതകള്‍ തിരിച്ചറിയുന്നതിനുള്ള വേദിയായാണ് ‘ബ്രാന്‍ഡ് കേരളം 2026’ ശ്രദ്ധ നേടുന്നത്.
