ഒരു മ്യൂച്വൽ ഫണ്ട് കമ്പനിക്ക് എസ്.ഐ.പി പുതിയതായി സ്വീകരിക്കുന്നത് നിർത്തിവെക്കാൻ സാധിക്കും. എന്നാൽ ഇത് അപൂർവ്വമായി മാത്രം സംഭവിക്കുന്ന ഒന്നാണ്. ഫണ്ട് ഹൗസ് എസ്.ഐ.പി നിർത്തിയാലും നിങ്ങൾ അതുവരെ നിക്ഷേപിച്ച പണവും അതിൽ നിന്നുള്ള ലാഭവും തികച്ചും സുരക്ഷിതമായിരിക്കും. പഴയ നിക്ഷേപം പിൻവലിക്കുന്നതിന് ഇതിലൂടെ യാതൊരു തടസ്സവും ഉണ്ടാകില്ല, പുതിയതായി പണം സ്വീകരിക്കുന്നത് മാത്രമാണ് കമ്പനി താൽക്കാലികമായി തടയുന്നത്.
മ്യൂച്വൽ ഫണ്ടുകൾ ഇതിന് മുതിരുന്നതിന്റെ പ്രധാന കാരണങ്ങൾ താഴെ പറയുന്നവയാണ്
വിപണിയിലെ ഉയർന്ന മൂല്യനിർണ്ണയം
ചില സ്മോൾ ക്യാപ് അല്ലെങ്കിൽ മിഡ് ക്യാപ് ഫണ്ടുകളിലേക്ക് പെട്ടെന്ന് വൻതോതിൽ പണം ഒഴുകിയെത്തുമ്പോൾ, ആ പണം മുഴുവൻ അനുയോജ്യമായ നല്ല ഓഹരികളിൽ നിക്ഷേപിക്കാൻ ഫണ്ട് മാനേജർക്ക് സാധിച്ചെന്നു വരില്ല. അനുയോജ്യമായ ഓഹരികൾ ഉയർന്ന വിലയിലായിരിക്കുമ്പോൾ വീണ്ടും പണം സ്വീകരിച്ചാൽ അത് നിലവിലുള്ള നിക്ഷേപകരുടെ ലാഭത്തെ ദോഷകരമായി ബാധിക്കും. അതിനാൽ ഫണ്ടിന്റെ ഗുണനിലവാരം കാത്തുസൂക്ഷിക്കാൻ കമ്പനികൾ പുതിയ എസ്.ഐ.പികൾ നിർത്തിവെക്കാറുണ്ട്.
നിയന്ത്രണങ്ങൾ
ഇൻഡെക്സ് ഫണ്ടുകളിലോ വിദേശ ഓഹരികളിൽ നിക്ഷേപിക്കുന്ന ഫണ്ടുകളിലോ റിസർവ് ബാങ്കോ സെബിയോ നിശ്ചയിച്ചിട്ടുള്ള നിക്ഷേപ പരിധി പൂർത്തിയായാൽ, കമ്പനികൾക്ക് കൂടുതൽ പണം സ്വീകരിക്കാൻ കഴിയില്ല. ഇത്തരം സന്ദർഭങ്ങളിൽ നിയമപരമായ നിയന്ത്രണങ്ങൾ കാരണമാണ് നിർത്തിവെക്കേണ്ടി വരുന്നത്.
ഇതുണ്ടാക്കുന്ന പ്രശ്നങ്ങൾ
നിങ്ങളുടെ സാമ്പത്തിക ലക്ഷ്യങ്ങൾക്കായി ആസൂത്രണം ചെയ്ത ദീർഘകാല നിക്ഷേപ വീഴ്ചയാണ് ഇതിലൂടെയുണ്ടാകുന്ന പ്രധാന പ്രശ്നം. വിപണി താഴേക്ക് പോകുമ്പോൾ കുറഞ്ഞ വിലയിൽ കൂടുതൽ യൂണിറ്റുകൾ വാങ്ങാൻ സഹായിക്കുന്ന രൂപ കോസ്റ്റ് ആവറേജിംഗ് ആനുകൂല്യം ഇതിലൂടെ നഷ്ടപ്പെടാം. കൂടാതെ, നമ്മൾ നിശ്ചയിച്ച സമ്പാദ്യ ലക്ഷ്യത്തിൽ എത്തിയേക്കാൻ കൂടുതൽ സമയമെടുക്കുകയും ചെയ്യും. ഇത്തരം ഘട്ടങ്ങളിൽ, ആ തുക സമാനമായ മറ്റേതെങ്കിലും നല്ല ഫണ്ടിലേക്ക് മാറ്റി നിക്ഷേപിക്കുകയാണ് സാധാരണയായി ചെയ്യാറുള്ളത്.
