സ്വകാര്യ ആശുപത്രികളിലെ ചികിത്സാച്ചെലവ് സാധാരണക്കാർക്ക് താങ്ങാൻ കഴിയുന്ന രീതിയിൽ കുറയ്ക്കുന്നതിനായി കേരള ആരോഗ്യ മന്ത്രി നിർദ്ദേശം നൽകിയതിന് ശേഷം ഇതേക്കുറിച്ചുള്ള ചർച്ചകൾ സോഷ്യൽ മീഡിയയിൽ അടക്കം നടക്കുന്നുണ്ട്.
സ്വകാര്യ ആശുപത്രികൾ ഈടാക്കുന്ന അമിത നിരക്കിനെക്കുറിച്ചും ചികിത്സയിലെ പോരായ്മകളെക്കുറിച്ചും ജനങ്ങളിൽ നിന്ന് വലിയ തോതിൽ പരാതികൾ ഉയർന്നതിനെത്തുടർന്നാണ് മന്ത്രിയുടെ ഈ ഇടപെടൽ. ഇത് സംബന്ധിച്ച് സ്വകാര്യ ആരോഗ്യ മേഖലയിലെ പ്രതിനിധികളുമായും ബന്ധപ്പെട്ട മറ്റുള്ളവരുമായും ചർച്ചകൾ നടത്താൻ ആരോഗ്യ വകുപ്പ് പ്രിൻസിപ്പൽ സെക്രട്ടറിക്ക് മന്ത്രി നിർദ്ദേശം നൽകി.
രോഗികളുടെ പോക്കറ്റ് ചോർച്ച കുറയുമോ?
മരുന്നുകളുടെ വിലക്കുറവ്, ലാബ് പരിശോധനാ നിരക്കുകൾ കുറയ്ക്കൽ, റൂം വാടക കുറയ്ക്കൽ എന്നീ പ്രധാന മൂന്ന് കാര്യങ്ങളിലാണ് സർക്കാരിന്റെ ശ്രദ്ധ. മരുന്നുകൾ പരമാവധി കുറഞ്ഞ വിലയിൽ ലഭ്യമാക്കാനും വിലയിൽ സുതാര്യത ഉറപ്പുവരുത്താനും ആവശ്യപ്പെട്ടിട്ടുണ്ട്. കൂടാതെ പരിശോധനാ ചെലവുകളും സാധാരണ മുറികളുടെയും ജനറൽ വാർഡുകളുടെയും വാടകയും കുറയ്ക്കുന്നതിലൂടെ രോഗികളുടെ സാമ്പത്തിക ഭാരം വലിയൊരു അളവോളം കുറയ്ക്കാൻ സാധിക്കുമെന്നാണ് വിലയിരുത്തുന്നത്.
സ്വകാര്യ ആശുപത്രികളുടെ നടത്തിപ്പ് ചെലവുകളും പ്രായോഗിക ബുദ്ധിമുട്ടുകളും കണക്കിലെടുത്തുകൊണ്ട് തന്നെ, രോഗികളുടെ താല്പര്യം സംരക്ഷിക്കുന്ന ഒരു പ്രായോഗിക നിയന്ത്രണ ചട്ടക്കൂട് കൊണ്ടുവരാനാണ് സർക്കാർ ലക്ഷ്യമിടുന്നത്. ഈ നിർദ്ദേശങ്ങളുടെ അടിസ്ഥാനത്തിൽ ഒരു പുതിയ നിയമനിർമ്മാണം നടത്തുന്നതിനായി പ്രിൻസിപ്പൽ സെക്രട്ടറിയുടെ നേതൃത്വത്തിൽ നാലംഗ സമിതിയെ രൂപീകരിച്ചിട്ടുണ്ട്.
ആശുപത്രികൾ സഹകരിക്കുമോ?
സ്വകാര്യ ആശുപത്രികൾ ഈ തീരുമാനത്തോട് പൂർണ്ണമായി സഹകരിക്കാൻ സാധ്യത കുറവാണ്; പകരം ചില ഉപാധികളോടെയുള്ള എതിർപ്പുകളും നിർദ്ദേശങ്ങളും മുന്നോട്ടുവെക്കാനാണ് സാധ്യത. മികച്ച ഡോക്ടർമാരുടെ സേവനം, ആധുനിക മെഡിക്കൽ ഉപകരണങ്ങൾ, ഗുണനിലവാരമുള്ള സൗകര്യങ്ങൾ എന്നിവ ഉറപ്പാക്കാൻ വലിയ തുക ചെലവാകുന്നുണ്ടെന്ന് അവർ വാദിക്കാൻ സാധ്യതയുണ്ട് . അതിനാൽ, രോഗികളുടെ ചികിത്സാച്ചെലവിൽ പെട്ടെന്ന് വലിയൊരു കുറവ് വരുത്തുന്നത് സ്ഥാപനത്തിന്റെ സാമ്പത്തിക നിലനിൽപ്പിനെ ബാധിക്കുമെന്നും അത് ചികിത്സയുടെ ഗുണനിലവാരം കുറയാൻ ഇടയാക്കുമെന്നും ആശുപത്രി മാനേജ്‌മെന്റുകൾ ചൂണ്ടിക്കാണിച്ചേക്കാം.
മരുന്നുകളുടെയും ലാബ് പരിശോധനകളുടെയും നിരക്കുകൾ കുറയ്ക്കുമ്പോൾ ഉണ്ടാകുന്ന സാമ്പത്തിക നഷ്ടം നികത്താൻ ആശുപത്രികൾക്ക് ബുദ്ധിമുട്ടാകും.
ഡോക്ടർമാരുടെയും ജീവനക്കാരുടെയും വേതനം
ഉയർന്ന ശമ്പളവും സാങ്കേതിക സൗകര്യങ്ങളുടെ പരിപാലന ചെലവും തടസ്സമില്ലാതെ മുന്നോട്ട് കൊണ്ടുപോകുന്നത് പ്രതിസന്ധിയിലാകും. ചെറിയ ക്ലിനിക്കുകൾ മുതൽ വൻകിട മൾട്ടി-സ്പെഷ്യാലിറ്റി ആശുപത്രികൾ വരെയുള്ള വ്യത്യാസങ്ങൾ കാരണം, എല്ലാവർക്കും അനുയോജ്യമായ ഒരൊറ്റ നിരക്ക് നിശ്ചയിക്കുന്നത് പ്രായോഗികമായി വളരെ സങ്കീർണ്ണമാണ്.ഇത്തരമൊരു കാര്യം എങ്ങിനെ സർക്കാർ നടപ്പിലാക്കുമെന്ന് ഉറ്റു നോക്കുകയാണ് പൊതുജനം.
