കുടുംബാംഗങ്ങളിൽ നിന്നും ബന്ധുക്കളിൽ നിന്നും ഉണ്ടാകുന്ന സാമ്പത്തികചൂഷണം ഇന്ന് പല സമൂഹങ്ങളിലും വർദ്ധിച്ചുവരുന്ന ഒരു വലിയ പ്രശ്നമാണ്. സ്നേഹത്തിന്റെയും വൈകാരിക ബന്ധങ്ങളുടെയും മറവിലാണ് പലപ്പോഴും മാതാപിതാക്കളോ, സഹോദരങ്ങളോ ഇത്തരം ചൂഷണങ്ങൾ നടത്തുന്നത്. സ്വന്തം സാമ്പത്തിക സ്വാതന്ത്ര്യത്തെയും ഭാവിയെയും ദോഷകരമായി ബാധിക്കുന്ന രീതിയിൽ, സ്വന്തക്കാരുടെ ഭാഗത്ത് നിന്നുണ്ടാകുന്ന അനാവശ്യ സമ്മർദ്ദങ്ങളെയും ചൂഷണങ്ങളെയും തിരിച്ചറിയേണ്ടത് വളരെ പ്രധാനമാണ്.
മാതാപിതാക്കളിൽ നിന്നുള്ള സാമ്പത്തിക ചൂഷണം
മാതാപിതാക്കൾ മക്കളുടെ മേൽ നടത്തുന്ന അമിതമായ സാമ്പത്തിക നിയന്ത്രണമാണ് ഇതിലൊന്ന്. വളർത്തി വലുതാക്കി എന്ന വൈകാരികപരമായ ബാധ്യത മുൻനിർത്തി മക്കളുടെ മുഴുവൻ വരുമാനവും കൈക്കലാക്കുക, മക്കളുടെ പേരിൽ വായ്പകൾ എടുപ്പിക്കുക, അല്ലെങ്കിൽ സ്വന്തം സാമ്പത്തിക ആവശ്യങ്ങൾക്കായി മക്കളെ അനാവശ്യ കടക്കെണിയിലാക്കുക എന്നിവ ഇതിൽ ഉൾപ്പെടുന്നു. മക്കളുടെ ഭാവി സമ്പാദ്യത്തെക്കുറിച്ചോ വ്യക്തിപരമായ ആവശ്യങ്ങളെക്കുറിച്ചോ ചിന്തിക്കാതെ, അവരുടെ സമ്പാദ്യം പൂർണ്ണമായും സ്വന്തം നിയന്ത്രണത്തിൽ വെക്കാൻ ശ്രമിക്കുന്നത് ചൂഷണമാണ്.
സഹോദരങ്ങളിൽ നിന്നുള്ള സാമ്പത്തിക ബാധ്യതകൾ
സഹോദരങ്ങൾക്കിടയിൽ സാമ്പത്തിക സഹായങ്ങൾ നൽകുന്നത് സാധാരണയാണെങ്കിലും, അത് ഒരു ചൂഷണമായി മാറുന്നത് ചില പ്രത്യേക സാഹചര്യങ്ങളിലാണ്. ഒരു സഹോദരനോ സഹോദരിയോ സാമ്പത്തികമായി ഉത്തരവാദിത്തമില്ലാതെ ജീവിക്കുകയും, നിരന്തരം കടം വാങ്ങിയ ശേഷം തിരിച്ചടക്കാതിരിക്കുകയും ചെയ്യുമ്പോൾ ഇത് പ്രതിസന്ധിയുണ്ടാക്കുന്നു. സ്വന്തം ബിസിനസ്സ് നഷ്ടങ്ങൾ നികത്താനോ ആഡംബര ജീവിതത്തിനോ വേണ്ടി മറ്റു സഹോദരങ്ങളുടെ സമ്പാദ്യം കൈക്കലാക്കുക, അല്ലെങ്കിൽ വസ്തുവകകളിലും കുടുംബ സ്വത്തിലും അർഹതയില്ലാത്ത അവകാശം സ്ഥാപിച്ചെടുക്കാൻ ശ്രമിക്കുക എന്നിവയാണ് സഹോദരങ്ങളിൽ നിന്ന് പൊതുവെ ഉണ്ടാകുന്ന സാമ്പത്തിക ചൂഷണങ്ങൾ.
ഇതിനെ എങ്ങനെ പ്രതിരോധിക്കാം?
കുടുംബത്തിൽ നിന്നുള്ള ഇത്തരം ചൂഷണങ്ങളിൽ നിന്ന് രക്ഷപ്പെടാൻ ചില കാര്യങ്ങൾ ശ്രദ്ധിക്കേണ്ടതുണ്ട്.
വ്യക്തമായ അതിരുകൾ നിശ്ചയിക്കുക — കുടുംബമാണെങ്കിലും നിങ്ങളുടെ വരുമാനത്തിൽ നിന്നും സമ്പാദ്യത്തിൽ നിന്നും എത്രത്തോളം തുക മറ്റുള്ളവർക്ക് നൽകാൻ കഴിയും എന്നതിന് വ്യക്തമായ ഒരു പരിധി നിശ്ചയിക്കുക.
നോ പറയാൻ പഠിക്കുക– നിങ്ങളുടെ വ്യക്തിപരമായ സാമ്പത്തിക ഭാവിയെ ബാധിക്കുന്ന അനാവശ്യ ആവശ്യങ്ങൾക്ക് സ്നേഹത്തോടെയാണെങ്കിലും വ്യക്തമായി എതിർപ്പ് പ്രകടിപ്പിക്കുക.
ബാങ്ക് അക്കൗണ്ടുകൾ വേർപെടുത്തുക– വ്യക്തിഗത ബാങ്ക് അക്കൗണ്ടുകൾ, സാലറി അക്കൗണ്ടുകൾ എന്നിവയുടെ നിയന്ത്രണം പൂർണ്ണമായും നിങ്ങളുടെ കൈകളിൽ മാത്രം സൂക്ഷിക്കുക.
നിയമപരവും സാമ്പത്തികവുമായ അവബോധം– സ്വത്തുക്കൾ എഴുതിക്കൊടുക്കുമ്പോഴും ആരുടെയെങ്കിലും വായ്പകൾക്ക് ജാമ്യം നിൽക്കുമ്പോഴും അതിൻ്റെ പ്രത്യാഘാതങ്ങൾ കൃത്യമായി മനസ്സിലാക്കുക.
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources



