ഭക്ഷ്യവില കുത്തനെ ഉയരാൻ ഇടയാക്കുമെന്ന ആശങ്കയ്ക്കിടെ എഥനോൾ സംഭരണനയത്തിൽ വലിയ മാറ്റവുമായി എണ്ണക്കമ്പനികൾ. 1,100 കോടി ലിറ്റർ എഥനോൾ വാങ്ങുന്നതിനായി കമ്പനികൾ ടെൻഡർ ക്ഷണിച്ചു. എന്നാൽ, പഞ്ചസാരവില വർധിക്കുന്ന പശ്ചാത്തലത്തിൽ കരിമ്പിൻ നീര്, പഞ്ചസാര സിറപ്പ്, ബി-ഹെവി മൊളാസസ് എന്നിവയിൽനിന്ന് ഉൽപ്പാദിപ്പിക്കുന്ന എഥനോളിനെ ഇത്തവണ ടെൻഡറിൽനിന്ന് പൂർണമായി ഒഴിവാക്കി. പകരം, ചോളത്തിൽനിന്ന് ഉൽപ്പാദിപ്പിക്കുന്ന എഥനോൾ കൂടുതൽ സംഭരിക്കാനാണ് നീക്കം.
രാജ്യത്ത് പഞ്ചസാരയുടെ ലഭ്യത ഉറപ്പാക്കുന്നതിന്റെ ഭാഗമായാണ് കരിമ്പിൽനിന്നുള്ള എഥനോൾ ഉൽപ്പാദനം ഒഴിവാക്കാനുള്ള നീക്കമെന്നാണ് വിലയിരുത്തൽ. ഇന്ത്യയിൽ പഞ്ചസാര ഉൽപ്പാദനം 2.7 കോടി മുതൽ 2.8 കോടി ടൺ വരെയാകുമെന്നാണ് കണക്കാക്കുന്നത്. എന്നാൽ, ആഭ്യന്തര ആവശ്യകത 2.83 കോടി ടണ്ണാണ്. ഉൽപ്പാദനം ആവശ്യത്തിന് തികയാത്ത സാഹചര്യത്തിൽ പഞ്ചസാര ലഭ്യത ഉറപ്പാക്കുന്നതിനാണ് എണ്ണക്കമ്പനികളുടെ പുതിയ നീക്കം.
ചോളത്തിന് ആവശ്യകത കൂടും
എഥനോൾ ഉൽപ്പാദനത്തിനായി ഏറ്റവും കൂടുതലായി ഉപയോഗിക്കുന്ന അസംസ്കൃത വസ്തുവാണ് ചോളം. 2026-27 വിതരണ വർഷത്തിൽ എഥനോൾ ഉൽപ്പാദനത്തിന് ഏകദേശം 1.6 കോടി ടൺ ചോളം ആവശ്യമായി വരുമെന്നാണ് വ്യവസായ മേഖലയിലെ കണക്കുകൾ സൂചിപ്പിക്കുന്നത്. നിലവിലെ വിതരണ വർഷത്തിൽ ഉപയോഗിച്ചതായി കണക്കാക്കുന്ന 1.3 കോടി ടണ്ണിനേക്കാൾ കൂടുതലാണിത്.
ചോളത്തിൽനിന്ന് എഥനോൾ ഉൽപ്പാദിപ്പിക്കാൻ ലിറ്ററിന് 68.86 രൂപയാണ് ചെലവ്. ബി-ഹെവി മൊളാസസിൽനിന്ന് ഉൽപ്പാദിപ്പിക്കുന്ന എഥനോളിന്റെ ലിറ്ററിന് 60.73 രൂപയെന്ന നിരക്കുമായി താരതമ്യം ചെയ്യുമ്പോൾ 13.4 ശതമാനം കൂടുതലാണിത്. കരിമ്പിൽനിന്നുള്ള എഥനോളിന് പകരമായി 100 കോടി ലിറ്റർ ചോളത്തിൽനിന്നുള്ള എഥനോൾ വാങ്ങേണ്ടിവന്നാൽ എണ്ണക്കമ്പനികളുടെ മൊത്തം സംഭരണച്ചെലവിൽ ഏകദേശം 813 കോടി രൂപയുടെ വർധനയുണ്ടാകും.
മുട്ടയ്ക്കും കോഴിയിറച്ചിക്കും വില കൂടുമോ?
എഥനോൾ ഉൽപ്പാദകർ കൂടുതൽ ചോളം സംഭരിക്കാൻ തുടങ്ങിയാൽ കോഴിത്തീറ്റ നിർമാതാക്കൾക്ക് ലഭിക്കുന്ന അളവ് കുറയുകയും വില ഉയരുകയും ചെയ്യാം. ചോളത്തിന്റെ ലഭ്യത കുറയുന്നതിനൊപ്പം മോശം കാലാവസ്ഥ മൂലം ഉൽപ്പാദനത്തിലും കുറവുണ്ടായാൽ സ്ഥിതി കൂടുതൽ സങ്കീർണമാകാം. കോഴിവളർത്തൽ ചെലവിന്റെ ഏകദേശം 65 മുതൽ 70 ശതമാനം വരെ തീറ്റയ്ക്കായാണ് ചെലവാകുന്നത്. ചോളത്തിന്റെ വില ഉയരുന്നത് കോഴിത്തീറ്റയുടെ ചെലവ് വർധിപ്പിക്കുകയും കർഷകരുടെ ലാഭം കുറയ്ക്കുകയും ചെയ്യും.
അധിക ചെലവ് ഉപഭോക്താക്കളിലേക്ക് കൈമാറുന്ന സാഹചര്യമുണ്ടായാൽ മുട്ടയുടെയും കോഴിയിറച്ചിയുടെയും വിലയും ഉയർന്നേക്കാം. ക്ഷീരമേഖലയെയും ഈ മാറ്റം ബാധിക്കാം. കാലിത്തീറ്റ നിർമാണത്തിനും വ്യാവസായിക ആവശ്യങ്ങൾക്കും ചോളം ഉപയോഗിക്കുന്നതിനാൽ ലഭ്യത കുറയുന്നത് വിവിധ മേഖലകളിൽ ഒരേസമയം സമ്മർദം സൃഷ്ടിച്ചേക്കും.
എഥനോൾ പദ്ധതിക്ക് വെല്ലുവിളി
പെട്രോളിൽ 20 ശതമാനം എഥനോൾ കലർത്തുന്ന ഇ20 പദ്ധതി വഴി ക്രൂഡ് ഓയിൽ ഇറക്കുമതിയെ ആശ്രയിക്കുന്നത് കുറയ്ക്കുകയാണ് കേന്ദ്ര സർക്കാരിന്റെ ലക്ഷ്യം. എന്നാൽ, എഥനോൾ ഉൽപ്പാദനത്തിന് ആവശ്യമായ അസംസ്കൃത വസ്തുക്കളുടെ ലഭ്യതയും വിലയും ഈ ലക്ഷ്യം കൈവരിക്കുന്നതിൽ നിർണായകമാണ്.
കരിമ്പ് അധിഷ്ഠിത എഥനോൾ സംഭരണത്തിന് നിയന്ത്രണം ഏർപ്പെടുത്തിയതോടെ ആവശ്യമായ അളവിൽ എഥനോൾ ലഭ്യമാക്കുന്നതിനൊപ്പം ഭക്ഷ്യവസ്തുക്കളുടെയും കാലിത്തീറ്റയുടെയും വില നിയന്ത്രിക്കുകയെന്ന ഇരട്ട വെല്ലുവിളിയാണ് സർക്കാരിന് മുന്നിലുള്ളത്.
English Summary
Amid concerns that food prices could rise sharply, oil companies have made a major change to their ethanol procurement policy. The companies have invited tenders to procure 11 billion litres of ethanol. However, against the backdrop of rising sugar prices, ethanol produced from sugarcane juice, sugar syrup and B-heavy molasses has been completely excluded from this year's tender. Instead, the companies are planning to procure more ethanol produced from maize (corn).
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
