ദീപാവലി ലോൺ ഓഫറുകൾ ആകർഷകമാണ്; എന്നാൽ നിങ്ങൾ ശരിക്കും പണം ലാഭിക്കുന്നുണ്ടോ എന്ന് എങ്ങനെ അറിയാം?

ദീപാവലി സീസൺ എത്തുമ്പോൾ ബാങ്കുകളും ഫിനാൻഷ്യൽ കമ്പനികളും ഉപഭോക്താക്കളെ ആകർഷിക്കാനായി പലിശ കുറഞ്ഞ വായ്പകൾ, പ്രൊസസിംഗ് ഫീസിലെ ഇളവുകൾ, പൂജ്യം പലിശ നിരക്കിലുള്ള ഓഫറുകൾ എന്നിവ വലിയ തോതിൽ പരസ്യപ്പെടുത്താറുണ്ട്. ആഘോഷക്കാലത്ത് സാധനങ്ങൾ വാങ്ങാനോ മറ്റ് ആവശ്യങ്ങൾക്കോ വേണ്ടി ഇത്തരം എളുപ്പവായിപ്പകൾ തേടിപ്പോകുന്നവരുടെ എണ്ണം വളരെ കൂടുതലാണ്. പരസ്യങ്ങളിൽ കാണുന്ന ആകർഷകമായ വാഗ്ദാനങ്ങൾ കണ്ട് ആളുകൾ പെട്ടെന്ന് വായ്പകൾക്ക് അപേക്ഷിക്കുമെങ്കിലും, ഇതിന്റെ പിന്നിലെ യഥാർത്ഥ ചെലവുകൾ എന്തൊക്കെയാണെന്ന് പലപ്പോഴും പലരും ശ്രദ്ധിക്കാറില്ല. ഉത്സവകാലത്തിന്റെ ആവേശത്തിൽ എടുത്തുപയോഗിക്കുന്ന ഇത്തരം ഓഫറുകൾ കൃത്യമായി പഠിച്ചില്ലെങ്കിൽ പിന്നീട് വലിയ സാമ്പത്തിക ബാധ്യതയായി മാറിയേക്കാം.

പണം ഈടാക്കാൻ വഴികൾ പലത്

പൂജ്യം പലിശ നിരക്കിലോ ചെറിയ പലിശയ്ക്കോ നൽകുന്ന വായ്പകളിൽ പലപ്പോഴും പലതരം മറഞ്ഞിരിക്കുന്ന ചാർജുകൾ ഈടാക്കാറുണ്ട്. പ്രൊസസിംഗ് ഫീസിൽ ഇളവുകൾ ഉണ്ടെന്ന് പറഞ്ഞാലും, മറ്റ് സർവീസ് ചാർജുകളോ ഇൻഷുറൻസ് തുകയോ അഡ്മിനിസ്ട്രേറ്റീവ് ഫീസുകളോ ഒക്കെയായി ബാങ്കുകൾ ഉപഭോക്താക്കളിൽ നിന്ന് പണം ഈടാക്കാം. കൂടാതെ, വായ്പ തിരിച്ചടയ്ക്കാനുള്ള കാലാവധി നീട്ടിനൽകുമ്പോൾ മാന്യമായ ഗഡുക്കൾ ചെറുതായി തോന്നാമെങ്കിലും, ആകെ അടച്ചുതീർക്കേണ്ട മൊത്തം തുക യഥാർത്ഥത്തിൽ വളരെ കൂടുതലായിരിക്കും. വായ്പ മുൻകൂട്ടി അടച്ചുതീർക്കാൻ ആഗ്രഹിച്ചാൽ ചുമത്തുന്ന പിഴത്തുകകളും പലരും കരാർ ഒപ്പിടുമ്പോൾ ശ്രദ്ധിക്കാറില്ല.

ചെറിയ അക്ഷരങ്ങളിൽ വലിയ കെണികൾ

അതുകൊണ്ട്, ദീപാവലി ഓഫറുകൾ കാണുമ്പോൾ അന്ധമായി വായ്പകളിലേക്ക് എടുത്തുചാടാതെ, കരാറിലെ ചെറിയ അക്ഷരങ്ങളിൽ എഴുതിയിരിക്കുന്ന വ്യവസ്ഥകൾ ഉൾപ്പെടെയുള്ള കാര്യങ്ങൾ കൃത്യമായി വായിച്ചു മനസ്സിലാക്കണം. പരസ്യ വാഗ്ദാനങ്ങളും ബാങ്ക് നൽകുന്ന രേഖകളും തമ്മിൽ വ്യത്യാസമുണ്ടോ എന്ന് പരിശോധിക്കുകയും, അധിക ബാധ്യതകൾ ഒഴിവാക്കാൻ ആകെ വായ്പാ തുകയും പലിശയും എത്രയെന്ന് കണക്കുകൂട്ടുകയും വേണം. നിങ്ങളുടെ നിലവിലുള്ള പ്രതിമാസ വരുമാനത്തിന്റെ വലിയൊരു ഭാഗം വായ്പ തിരിച്ചടവിനായി പോകുന്നുണ്ടെങ്കിൽ ഇത്തരം ഓഫറുകൾ ഒഴിവാക്കുന്നതാണ് ബുദ്ധി.

ആവശ്യമുണ്ടെങ്കിൽ മാത്രം വായ്പ എടുക്കുക

ആധുനിക കാലത്ത് പലരും വ്യാപകമായി ഉപയോഗിക്കുന്ന ഒന്നാണ് ഇപ്പോൾ വാങ്ങൂ, പിന്നീട് പണം നൽകൂ അഥവാ പേ ലേറ്റർ വായ്പകൾ. ക്രെഡിറ്റ് കാർഡുകൾ ഇല്ലാത്തവർക്കും പെട്ടെന്ന് ചെറിയ തുകയ്ക്ക് സാധനങ്ങൾ വാങ്ങാൻ ആഗ്രഹിക്കുന്നവർക്കും ഇത് വളരെ എളുപ്പമുള്ള ഒരു സംവിധാനമാണ്. കൃത്യസമയത്ത് പണം തിരിച്ചടയ്ക്കുകയാണെങ്കിൽ ഇതിലൂടെ വലിയ തടസ്സങ്ങളോ അധിക പലിശയോ ഇല്ലാതെ ഷോപ്പിംഗ് നടത്താൻ സാധിക്കും. കൂടാതെ, മറ്റ് വലിയ വായ്പകളെ അപേക്ഷിച്ച് ഇതിന്റെ അപേക്ഷാ നടപടികൾ വളരെ ലളിതവുമാണ്.

എന്നാൽ, ഈ സേവനങ്ങൾ പൂർണ്ണമായും സുരക്ഷിതമാണെന്ന് പറയാൻ കഴിയില്ല. ചെറിയ തുകകളായതുകൊണ്ട് പലരും എളുപ്പത്തിൽ കടങ്ങൾ വരുത്തിവെക്കുകയും, പിന്നീട് തിരിച്ചടവ് മുടങ്ങുമ്പോൾ ഉയർന്ന പിഴപ്പലിശയും ഒളിഞ്ഞിരിക്കുന്ന ചാർജുകളും നൽകേണ്ടി വരികയും ചെയ്യുന്നു. കൃത്യസമയത്ത് തിരിച്ചടവ് മുടങ്ങിയാൽ അത് നമ്മുടെ സിബിൽ സ്കോറിനെ ഗുരുതരമായി ബാധിക്കുകയും, ഭാവിയിൽ മറ്റ് വായ്പകൾ ലഭിക്കുന്നത് തടസ്സപ്പെടുത്തുകയും ചെയ്യും. അതിനാൽ, ആവശ്യമുള്ളപ്പോൾ മാത്രം ഈ സേവനം ഉപയോഗിക്കുകയും, കൃത്യമായ മുൻകൂട്ടിയുള്ള പ്ലാനിംഗിലൂടെ തിരിച്ചടവ് ഉറപ്പാക്കുകയും ചെയ്താൽ മാത്രമേ പേ ലേറ്റർ വായ്പകൾ സുരക്ഷിതമാകൂ.

English Summary