പശ്ചിമേഷ്യയിൽ സംഘർഷം കുറയ്ക്കുന്നതിനുള്ള നയതന്ത്ര നീക്കങ്ങൾ ശക്തമായതോടെ ആഗോള വിപണിയിൽ ക്രൂഡ് ഓയിൽ വിലയിൽ നേരിയ ഇടിവ്. ഇറാനെതിരായ യുഎസ്-ഇസ്രയേൽ യുദ്ധത്തിന് പരിഹാരമുണ്ടാകുമെന്ന പ്രതീക്ഷയാണ് എണ്ണവില കുറയാൻ കാരണമായത്. എന്നാൽ, സൗദി അറേബ്യയ്ക്ക് നേരെയുള്ള ആക്രമണങ്ങളും ആഗോള എണ്ണ വിതരണത്തെക്കുറിച്ചുള്ള ആശങ്കകളും വിലയിലെ ഇടിവിന് പരിധിയിടുന്നുണ്ട്. ഇതോടെ ബ്രെന്റ് ക്രൂഡ് ഓയിൽ വില ആറുമാസത്തെ ഉയർന്ന നിലയ്ക്ക് സമീപം തുടരുകയാണ്.
ഇന്നലെ അന്താരാഷ്ട്ര വിപണിയിൽ ബ്രെന്റ് ക്രൂഡ് ഫ്യൂച്ചേഴ്സ് ബാരലിന് 66 സെന്റ് (0.57%) കുറഞ്ഞ് 115.15 ഡോളറിലെത്തി. യുഎസ് വെസ്റ്റ് ടെക്സസ് ഇന്റർമീഡിയറ്റ് (WTI) ക്രൂഡിന്റെ വില 44 സെന്റ് (0.43%) കുറഞ്ഞ് ബാരലിന് 101.32 ഡോളറിലുമെത്തി.
സമാധാന ചർച്ചകളിൽ പ്രതീക്ഷ
പശ്ചിമേഷ്യയിലെ സംഘർഷം കുറയ്ക്കുന്നതിന്റെ ഭാഗമായി സൗദി അറേബ്യ, തുർക്കി, പാകിസ്ഥാൻ എന്നീ രാജ്യങ്ങൾ തിങ്കളാഴ്ച ഇറാനിലെ ഉദ്യോഗസ്ഥരുമായി ചർച്ച നടത്തി. സൈനിക സംഘർഷം വീണ്ടും രൂക്ഷമാകുന്നത് തടയുന്നതിനും സമാധാനവും സുരക്ഷയും ഉറപ്പാക്കുന്നതിനുമുള്ള സഹകരണം ശക്തിപ്പെടുത്തുന്നതിനും ചർച്ചയിൽ ധാരണയായതായി ഇറാന്റെ ഔദ്യോഗിക മാധ്യമങ്ങൾ റിപ്പോർട്ട് ചെയ്തിട്ടുണ്ട്.
സംഘർഷത്തിന് പരിഹാരമുണ്ടാകുമെന്ന പ്രതീക്ഷ എണ്ണ വിതരണത്തിലുണ്ടാകാവുന്ന തടസ്സങ്ങളെക്കുറിച്ചുള്ള ആശങ്ക കുറച്ചതാണ് വില താഴാൻ കാരണമായത്. എന്നാൽ, മേഖലയിലെ സ്ഥിതിഗതികൾ ഉടൻ സാധാരണ നിലയിലാകുമെന്ന കാര്യത്തിൽ വ്യക്തതയില്ല. ഇറാനുമായി ബന്ധമുള്ള ഹൂതി വിഭാഗം സൗദി അറേബ്യയ്ക്ക് നേരെ വീണ്ടും ആക്രമണം നടത്തിയതും വിപണിയിൽ ആശങ്ക വർധിപ്പിക്കുന്നു.
ഹോർമുസ് കടലിടുക്കിൽ ആശങ്ക തുടരുന്നു
ആഗോള എണ്ണ വിതരണത്തിന്റെ പ്രധാന പാതയായ ഹോർമുസ് കടലിടുക്കിലെ സുരക്ഷാ സാഹചര്യം വിപണി സൂക്ഷ്മമായി നിരീക്ഷിക്കുകയാണ്. ഫെബ്രുവരിയിൽ സംഘർഷം ആരംഭിക്കുന്നതിന് മുമ്പ് ലോകത്തെ ഊർജ വിതരണത്തിന്റെ ഏകദേശം അഞ്ചിലൊന്ന് ഈ കടലിടുക്ക് വഴിയായിരുന്നു കടന്നുപോയിരുന്നത്.
കടലിടുക്കിലും സമീപ ജലപാതകളിലും വാണിജ്യ കപ്പലുകൾക്ക് നേരെയുണ്ടായ ആക്രമണങ്ങൾ ഒക്ടോബറിൽ വർധിച്ചതായും റിപ്പോർട്ടുകൾ വ്യക്തമാക്കുന്നു. കഴിഞ്ഞ ആഴ്ച ടാങ്കറുകൾക്ക് നേരെയുണ്ടായ ആക്രമണങ്ങൾക്ക് പിന്നാലെ ബ്രെന്റ് ക്രൂഡ് വില ബാരലിന് 117 ഡോളറിന് മുകളിലെത്തിയിരുന്നു. ഏപ്രിലിന് ശേഷമുള്ള ഏറ്റവും ഉയർന്ന നിലവാരമായിരുന്നു ഇത്.
അതേസമയം, റഷ്യയിൽ ഡീസൽ ഉൽപ്പാദനം വർധിപ്പിക്കുന്നതിനുള്ള നടപടികളും പുരോഗമിക്കുകയാണ്. കയറ്റുമതിക്ക് സർക്കാർ ക്വാട്ട അനുവദിച്ചതിന് പിന്നാലെ ഒക്ടോബറിൽ റിഫൈനറികൾ ഡീസൽ ഉൽപ്പാദനം ഉയർത്തുന്നതായാണ് റിപ്പോർട്ട്. പശ്ചിമേഷ്യയിലെ സംഘർഷം കുറയുമെന്ന പ്രതീക്ഷ എണ്ണവിലയിൽ ആശ്വാസം നൽകുന്നുണ്ടെങ്കിലും വിതരണ തടസ്സങ്ങളുടെ സാധ്യത പൂർണമായി മാറിയിട്ടില്ല. അതിനാൽ വരും ദിവസങ്ങളിലും ആഗോള ക്രൂഡ് ഓയിൽ വിപണിയിൽ വിലയിലെ ചാഞ്ചാട്ടം തുടരാൻ സാധ്യതയുണ്ട്.
English Summary
Crude oil prices edged lower in global markets as diplomatic efforts to ease tensions in the Middle East gained momentum. Hopes of a resolution to the US-Israeli war against Iran have contributed to the decline in oil prices. However, attacks targeting Saudi Arabia and concerns over global oil supplies are limiting the extent of the decline. As a result, Brent crude prices remain close to a six-month high.
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
