ഇന്ത്യൻ ഓഹരി വിപണിയിലെ പ്രമുഖ സൂചികയായ നിഫ്റ്റി 50 ലിസ്റ്റിൽ വലിയൊരു മാറ്റം സംഭവിച്ചിരിക്കുകയാണ്. പ്രമുഖ ഐടി കമ്പനിയായ വിപ്രോ നിഫ്റ്റി 50 പട്ടികയിൽ നിന്ന് പുറത്തുപോവുകയും, അതിനുപകരമായി ബോംബെ സ്റ്റോക്ക് എക്സ്ചേഞ്ചിന്റെ മാതൃകമ്പനിയായ ബിഎസ്ഇ ലിമിറ്റഡ് പുതിയ അംഗമായി പ്രവേശിക്കുകയും ചെയ്തു. എൻഎസ്ഇ തങ്ങളുടെ സൂചികകൾ ആറുമാസത്തിലൊരിക്കൽ പുനഃപരിശോധിക്കുന്നതിന്റെ ഭാഗമായാണ് ഈ മാറ്റം.
വിപ്രോ പിന്മാറും
സ്വതന്ത്രമായി വ്യാപാരം ചെയ്യാൻ ലഭ്യമായ ഓഹരികളുടെ മൂല്യം കണക്കാക്കിയാണ് കമ്പനികളെ നിഫ്റ്റി 50-യിൽ ഉൾപ്പെടുത്തുന്നത്. കഴിഞ്ഞ കുറച്ചുകാലമായി വിപ്രോയുടെ വിപണി മൂല്യത്തിൽ ഇടിവുണ്ടായപ്പോൾ, ബിഎസ്ഇയുടെ മൂല്യം ഗണ്യമായി വർദ്ധിച്ചു.കഴിഞ്ഞ അഞ്ചു വർഷമായി, വിപ്രോ ഓഹരി, നെഗറ്റീവ് റിട്ടേൺ ആണ് നൽകിയിരിക്കുന്നത്.
നിഫ്റ്റി 50-യിൽ നിലവിലുള്ള ഏറ്റവും കുറഞ്ഞ മൂല്യമുള്ള കമ്പനിയേക്കാൾ 1.5 മടങ്ങ് അധികം മൂല്യം ബിഎസ്ഇ കൈവരിച്ചതോടെയാണ് വിപ്രോയ്ക്ക് പകരം ബിഎസ്ഇക്ക് പട്ടികയിൽ ഇടം ലഭിച്ചത്. അതേസമയം, പുറത്തുപോയ വിപ്രോ പൂർണ്ണമായി ഒഴിവാകുന്നില്ല; പകരം നിഫ്റ്റി നെക്സ്റ്റ് 50 സൂചികയിലേക്ക് മാറ്റപ്പെടും.
ബി എസ് ഇ ഓഹരിക്ക് നേട്ടം
ഈ മാറ്റം നിക്ഷേപകരെയും മ്യൂച്വൽ ഫണ്ടുകളെയും കാര്യമായി ബാധിക്കും. നിഫ്റ്റി 50 സൂചികയെ പിന്തുടരുന്ന പാസീവ് ഇൻഡക്സ് ഫണ്ടുകളും ഇടിഎഫുകളും ഇനി വിപ്രോയുടെ ഓഹരികൾ വിറ്റഴിച്ച് ബിഎസ്ഇയുടെ ഓഹരികൾ വാങ്ങിത്തുടങ്ങും. ഇതിലൂടെ ബിഎസ്ഇയിലേക്ക് വലിയ തോതിലുള്ള വിദേശ-ആഭ്യന്തര നിക്ഷേപങ്ങൾ എത്തുമ്പോൾ വിപ്രോയിൽ നിന്ന് നിക്ഷേപം പുറത്തേക്ക് ഒഴുകും. സാധാരണ ഓഹരി ഉടമകൾ പരിഭ്രാന്തരാകേണ്ടതില്ല; ഇത് സൂചിക പുനഃക്രമീകരിക്കുന്നതിന്റെ സ്വാഭാവിക പ്രക്രിയ മാത്രമാണ്.
ബിഎസ്ഇ ലിമിറ്റഡിന്റെ ഓഹരി നിഫ്റ്റി 50 സൂചികയിൽ ഉൾപ്പെടുന്നത് കമ്പനിയുടെ ഓഹരി വിലയിൽ വലിയൊരു പോസിറ്റീവ് ചലനം ഉണ്ടാക്കാൻ സാധ്യതയുണ്ട്. ഇതിന്റെ പ്രധാന കാരണം നിഫ്റ്റി 50 സൂചികയെ പിന്തുടർന്ന് പ്രവർത്തിക്കുന്ന വലിയ പാസീവ് ഇൻഡക്സ് ഫണ്ടുകളും ഇടിഎഫുകളും ഇനി നിർബന്ധമായും ബിഎസ്ഇയുടെ ഓഹരികൾ വാങ്ങി തങ്ങളുടെ പോർട്ട്ഫോളിയോയിൽ ഉൾപ്പെടുത്തണം എന്നതാണ്. ഇത് വഴി ഏകദേശം 6,000 കോടി രൂപ പുതിയ വിദേശ-ആഭ്യന്തര നിക്ഷേപം ബിഎസ്ഇ ഓഹരികളിലേക്ക് നേരിട്ട് ഒഴുകിയെത്തും.
വിശ്വാസ്യത കൂടും
ഇത്തരത്തിൽ വലിയ തോതിലുള്ള ഡിമാൻഡ് പെട്ടെന്ന് ഉണ്ടാകുമ്പോൾ ഓഹരി വിപണിയിൽ ബിഎസ്ഇയുടെ ട്രേഡിംഗ് വോളിയവും ഓഹരി വിലയും ഉയരാൻ ശക്തമായ സാധ്യതയുണ്ട്. നിഫ്റ്റി 50 പോലെ രാജ്യത്തെ ഏറ്റവും പ്രമുഖമായ സൂചികയിൽ അംഗമാകുന്നത് വഴി സ്ഥാപന നിക്ഷേപകർക്കും വൻകിട വിദേശ ഫണ്ടുകൾക്കും ബിഎസ്ഇ എന്ന കമ്പനിയിലുള്ള വിശ്വാസ്യത വർദ്ധിക്കുകയും, ദീർഘകാലത്തേക്ക് കൂടുതൽ നിക്ഷേപങ്ങൾ ആകർഷിക്കാൻ സഹായിക്കുകയും ചെയ്യും.
സാധാരണയായി ഇത്തരം വാർത്തകൾ പുറത്തുവരുമ്പോൾ താൽക്കാലികമായി ഓഹരി വിലയിൽ പെട്ടെന്നൊരു കുതിച്ചുചാട്ടം ഉണ്ടാകാറുണ്ട്. ഈ വാർത്ത ഇതിനകം തന്നെ വിപണിയിൽ അറിഞ്ഞതുകൊണ്ട് , പുനഃക്രമീകരണം നടക്കുന്ന സമയത്ത് ചില നിക്ഷേപകർ ലാഭമെടുക്കാൻ സാധ്യതയുള്ളതിനാൽ ചെറിയ വിലയിടിവുകളോ ചാഞ്ചാട്ടങ്ങളോ ഉണ്ടാകാം. പക്ഷെ, ദീർഘകാല നിക്ഷേപകരെ സംബന്ധിച്ച് ബിഎസ്ഇയുടെ സാമ്പത്തിക അടിത്തറ കൂടുതൽ ശക്തമാകാൻ ഈ തീരുമാനം വഴിതുറക്കും.
(Disclaimer: This does not constitute investment advice. Investors are advised to evaluate independently and consult with professional advisors before making any investments in the stock market, mutual funds, gold, or cryptocurrencies.)
