അമേരിക്കൻ സർക്കാരിന്റെ ആകെ കടം ചരിത്രത്തിലെ ഏറ്റവും ഉയർന്ന നിരക്കായ 40 ട്രില്യൺ ഡോളറിലധികമായി വർദ്ധിച്ചുകൊണ്ടിരിക്കുകയാണ്. കടം വീട്ടാനും മറ്റ് ചെലവുകൾക്കുമായി അമേരിക്കൻ സർക്കാർ വൻതോതിൽ പുതിയ കടപ്പത്രങ്ങൾ വിപണിയിലിറക്കുമ്പോൾ, നിക്ഷേപകരെ ആകർഷിക്കാൻ കൂടുതൽ പലിശ നൽകേണ്ടി വരുന്നു. അമേരിക്കൻ ബോണ്ടുകളിൽ നിന്ന് ഉയർന്ന റിട്ടേൺ ലഭിക്കുമ്പോൾ, വിദേശ നിക്ഷേപകർ ഇന്ത്യ പോലുള്ള വളർന്നുവരുന്ന വിപണികളിൽ നിന്ന് പണം പിൻവലിച്ച് സുരക്ഷിതമായ യു.എസ് വിപണിയിലേക്ക് മാറ്റാൻ തുടങ്ങുന്നു.ഇത് ഇന്ത്യൻ ഓഹരി വിപണിയെ ബാധിക്കുന്നുണ്ട്.
താങ്ങി നിർത്തുന്നത് മ്യൂച്ചൽ ഫണ്ടുകൾ
അമേരിക്കയിലെ ഉയർന്ന ബോണ്ട് യീൽഡ് കാരണം വിദേശ ധനകാര്യ സ്ഥാപനങ്ങൾ ഇന്ത്യൻ വിപണിയിൽ നിന്ന് വൻതോതിൽ ഓഹരികൾ വിറ്റഴിക്കുമ്പോൾ വിപണിയിൽ താത്കാലികമായി ഇടിവും വലിയ ചാഞ്ചാട്ടവും ഉണ്ടാകുന്നു. കൂടാതെ, വിദേശ പണം പുറത്തേക്ക് ഒഴുകുമ്പോൾ ഇന്ത്യൻ രൂപയുടെ മൂല്യം ഡോളറിനെതിരെ ദുർബലമാകാൻ സാധ്യതയുണ്ട്. ഇന്ത്യയിലെ മ്യൂച്ചൽ ഫണ്ടുകളുടെ നിക്ഷേപം ശക്തമായതിനാൽ, വിദേശ വിറ്റഴിക്കൽ മൂലം ഉണ്ടാകുന്ന തകർച്ച ഒരു പരിധി വരെ പ്രതിരോധിക്കാൻ ഇന്ത്യൻ വിപണിക്ക് സാധിക്കുന്നുണ്ട്.
വിദേശ നിക്ഷേപകർ തിരികെ വരുമോ?
വിദേശ നിക്ഷേപകർ ഇന്ത്യയിലേക്ക് തിരികെ വരാൻ സാധ്യതയേറെയാണ്. നിലവിൽ ബോണ്ട് യീൽഡ് വർദ്ധിച്ചതുകൊണ്ട് അവർ താൽക്കാലികമായി പണം പിൻവലിച്ചതാണെങ്കിലും, ലോകത്തിലെ ഏറ്റവും വേഗത്തിൽ വളരുന്ന പ്രധാന സാമ്പത്തിക ശക്തികളിൽ ഒന്നാണ് ഇന്ത്യ. ഇന്ത്യൻ കമ്പനികളുടെ ലാഭക്ഷമത ഉയരുകയും, ഓഹരികളുടെ വില നിക്ഷേപിക്കാൻ പാകത്തിൽ താഴ്ന്ന നിലയിൽ എത്തുകയും ചെയ്യുമ്പോൾ വിദേശ നിക്ഷേപകർ വീണ്ടും ഇന്ത്യയിലേക്ക് വൻതോതിൽ നിക്ഷേപവുമായി തിരികെയെത്തും.
വർദ്ധിച്ചുവരുന്ന സർക്കാർ കടം
ലോകമെമ്പാടുമുള്ള വിവിധ രാജ്യങ്ങളിലെ ഗവൺമെന്റുകൾ കടമെടുപ്പ് വൻതോതിൽ ഉയർത്തിയതിനെത്തുടർന്ന് ആഗോള ബോണ്ട് മാർക്കറ്റിൽ വലിയ തിരിച്ചടി നേരിടുകയാണ്. സമീപകാലത്തായി എണ്ണവില വർദ്ധിച്ചത് പണപ്പെരുപ്പ ആശങ്കകൾ ഉയർത്തുകയും പലിശ നിരക്കുകൾ ഉയരത്തിൽ നിലനിർത്താൻ പ്രേരിപ്പിക്കുകയും ചെയ്തിരുന്നു. ഇതിനുപുറമേ, സർക്കാരുകളുടെ കടഭാരം കുതിച്ചുയർന്നത് കടപ്പത്രങ്ങളുടെ വിൽപ്പന ശക്തമാകുന്നതിനും അവയുടെ റിട്ടേൺ കുത്തനെ ഉയരുന്നതിനും കാരണമായി.
സർക്കാർ ബോണ്ട് യീൽഡുകൾ ഉയരുന്നത് ആഗോള സാമ്പത്തിക വ്യവസ്ഥയിൽ വലിയ പ്രത്യാഘാതങ്ങൾ ഉണ്ടാക്കുന്നുണ്ട്. ഭവന വായ്പകൾ, കോർപ്പറേറ്റ് വായ്പകൾ എന്നിവയുടെ പലിശ നിരക്കുകൾ ഉയരുകയും ഇത് ബിസിനസ്സ് നിക്ഷേപങ്ങളെയും ഉപഭോക്തൃ ചെലവഴിക്കലുകളെയും മന്ദഗതിയിലാക്കുകയും ചെയ്യും. സർക്കാരുകൾക്ക് പലിശ തിരിച്ചടവുകൾക്കായി മാത്രം വലിയ തുക ചെലവഴിക്കേണ്ടി വരുന്നത് രാജ്യങ്ങളുടെ സാമ്പത്തിക സുസ്ഥിരതയ്ക്ക് വലിയ വെല്ലുവിളിയായി മാറുന്നു.
(Disclaimer: This does not constitute investment advice. Investors are advised to evaluate independently and consult with professional advisors before making any investments in the stock market, mutual funds, gold, or cryptocurrencies.)
