പ്രീമിയം മദ്യത്തിന് ആവശ്യകത വർധിച്ചതോടെ പ്രമുഖ മദ്യനിർമാതാക്കളായ റാഡിക്കോ ഖൈത്താന്റെ വരുമാനത്തിലും ലാഭത്തിലും മികച്ച വളർച്ച. 2026 സെപ്റ്റംബറിൽ അവസാനിച്ച രണ്ടാം പാദത്തിൽ കമ്പനിയുടെ അറ്റാദായം മുൻവർഷത്തെ ഇതേ കാലയളവിനെ അപേക്ഷിച്ച് 66.1 ശതമാനം ഉയർന്ന് 230.9 കോടി രൂപയായി. കമ്പനിയുടെ വരുമാനം 16.8 ശതമാനം വർധിച്ച് 1,745.1 കോടി രൂപയിലെത്തി. സാധാരണ മദ്യത്തിന്റെ വിൽപ്പന കുറഞ്ഞെങ്കിലും വില കൂടിയ പ്രീമിയം മദ്യത്തിന്റെ വിൽപ്പന വർധിച്ചത് കമ്പനിയുടെ ലാഭം ഉയരാൻ സഹായിച്ചു.
പ്രീമിയം മദ്യവിൽപ്പനയിൽ 35.8 ശതമാനം വളർച്ച
കമ്പനിയുടെ പ്രീമിയം മദ്യങ്ങളുടെ വിൽപ്പന രണ്ടാം പാദത്തിൽ മുൻവർഷത്തെ ഇതേ കാലയളവിനെ അപേക്ഷിച്ച് 35.8 ശതമാനം വർധിച്ച് 52.8 ലക്ഷം കെയ്‌സുകളായി. എന്നാൽ സാധാരണ മദ്യങ്ങളുടെ വിൽപ്പന 9.7 ശതമാനം കുറഞ്ഞ് 45.5 ലക്ഷം കെയ്‌സുകളിലെത്തി. ആന്ധ്രപ്രദേശിൽ വിപണന-വിതരണ രീതിയിലുണ്ടായ മാറ്റത്തെ തുടർന്നുള്ള ഉയർന്ന അടിസ്ഥാനവും മഹാരാഷ്ട്ര, കർണാടക സംസ്ഥാനങ്ങളിലെ നയപരമായ മാറ്റങ്ങളുമാണ് സാധാരണ മദ്യവിഭാഗത്തിലെ വിൽപ്പനയിലുണ്ടായ ഇടിവിന് കാരണമായി കമ്പനി ചൂണ്ടിക്കാട്ടിയത്.
കമ്പനിയുടെ ആകെ മദ്യവിൽപ്പനയിൽ പ്രസ്റ്റീജ് ആൻഡ് എബൗവ് വിഭാഗത്തിന്റെ വിഹിതം മുൻവർഷത്തെ 43.6 ശതമാനത്തിൽ നിന്ന് 53.7 ശതമാനമായി ഉയർന്നു. ഇന്ത്യൻ നിർമിത വിദേശമദ്യത്തിന്റെ (IMFL) വരുമാനത്തിൽ ഈ വിഭാഗത്തിന്റെ സംഭാവന 68.6 ശതമാനത്തിൽ നിന്ന് 77.1 ശതമാനമായും വർധിച്ചു.
പ്രീമിയം ഉൽപ്പന്നങ്ങൾക്ക് മുൻഗണന നൽകുന്ന തന്ത്രം മികച്ച ഫലം നൽകുന്നതായി മാനേജിങ് ഡയറക്ടർ അഭിഷേക് ഖൈത്താൻ പറഞ്ഞു. നടപ്പു സാമ്പത്തിക വർഷം പ്രസ്റ്റീജ് ആൻഡ് എബൗവ് വിഭാഗത്തിലെ വിൽപ്പന അളവിൽ 30 ശതമാനം വളർച്ചയാണ് കമ്പനി ലക്ഷ്യമിടുന്നത്. എബിറ്റ്ഡ മാർജിൻ ഏകദേശം 20 ശതമാനമായി നിലനിർത്താനാകുമെന്നും കമ്പനി പ്രതീക്ഷിക്കുന്നു.
ലാഭമാർജിനിലും വർധന
രണ്ടാം പാദത്തിൽ കമ്പനിയുടെ മൊത്തലാഭം 28.6 ശതമാനം വർധിച്ച് 838.4 കോടി രൂപയായി. മൊത്തലാഭത്തിന്റെ വിഹിതം മുൻവർഷത്തെ 43.6 ശതമാനത്തിൽ നിന്ന് 48 ശതമാനമായും ഉയർന്നു. പ്രവർത്തനങ്ങളിൽ നിന്നുള്ള ലാഭം (എബിറ്റ്ഡ) 51 ശതമാനം വർധിച്ച് 356.5 കോടി രൂപയിലെത്തി. എബിറ്റ്ഡ മാർജിനും മുൻവർഷത്തെ 15.8 ശതമാനത്തിൽ നിന്ന് 20.4 ശതമാനമായി ഉയർന്നു.
ധാന്യവില വർധനയുടെ ആഘാതം കുറയ്ക്കുന്നതിനായി കമ്പനി കൂടുതൽ ഉൽപ്പന്നശേഖരം മുൻകൂട്ടി ഒരുക്കിയിരുന്നു. ഇത് രണ്ടാം പാദത്തിലെ പ്രകടനത്തെ പിന്തുണച്ചെങ്കിലും പ്രവർത്തന മൂലധനത്തിന്റെ ആവശ്യകത വർധിപ്പിച്ചു. വിൽപ്പനയും വിതരണവുമായി ബന്ധപ്പെട്ട ചെലവുകൾ 19.5 ശതമാനം വർധിച്ച് 184.3 കോടി രൂപയായി. മറ്റ് പ്രവർത്തനച്ചെലവുകൾ 14.5 ശതമാനം ഉയർന്ന് 230.6 കോടി രൂപയിലെത്തി. അതേസമയം, പലിശച്ചെലവ് 29.9 ശതമാനം കുറഞ്ഞ് 11.4 കോടി രൂപയായി.
വോഡ്ക വിഭാഗമാണ് പ്രീമിയം ഉൽപ്പന്നങ്ങളുടെ വളർച്ചയിൽ പ്രധാന പങ്കുവഹിച്ചത്. ഈ വിഭാഗത്തിലെ വിൽപ്പന അളവ് 49 ശതമാനം വർധിച്ച് 29.6 ലക്ഷം കെയ്‌സുകളിലെത്തി. മാജിക് മൊമെന്റ്സ് വോഡ്ക, 8PM പ്രീമിയം ബ്ലാക്ക് വിസ്കി, റാംപുർ ഇന്ത്യൻ സിംഗിൾ മാൾട്ട്, ജയ്‌സൽമീർ ഇന്ത്യൻ ക്രാഫ്റ്റ് ജിൻ എന്നിവയാണ് കമ്പനിയുടെ പ്രധാന ഉൽപ്പന്നങ്ങൾ.
കടബാധ്യതയില്ലാത്ത കമ്പനിയാകാൻ ലക്ഷ്യം
2026 സെപ്റ്റംബർ 30-ലെ കണക്കനുസരിച്ച് റാഡിക്കോ ഖൈത്താന്റെ അറ്റകടബാധ്യത 175.4 കോടി രൂപയാണ്. 2026 മാർച്ച് 31-ലെ കണക്കിനെ അപേക്ഷിച്ച് ഇത് 68.7 കോടി രൂപ കുറഞ്ഞു. ആകെ കടബാധ്യത 247.1 കോടി രൂപയായപ്പോൾ പണമായും പണത്തിന് തുല്യമായ നിക്ഷേപങ്ങളായും കമ്പനിയുടെ കൈവശം 71.7 കോടി രൂപയുണ്ടായിരുന്നു.
2026 സെപ്റ്റംബറിൽ അവസാനിച്ച ആറുമാസത്തിനിടെ ടേം ലോണുകൾ 75.7 കോടി രൂപ കുറഞ്ഞു. 2026-27 സാമ്പത്തിക വർഷത്തിന്റെ രണ്ടാം പകുതിയോടെ അറ്റകടബാധ്യത പൂർണമായി ഇല്ലാതാക്കാനാകുമെന്നാണ് കമ്പനിയുടെ പ്രതീക്ഷ.
ഗുണനിലവാരം മെച്ചപ്പെടുത്തുന്നതിനും ബ്രാൻഡുകൾ ശക്തിപ്പെടുത്തുന്നതിനും പ്രീമിയം ഉൽപ്പന്നങ്ങൾക്ക് കൂടുതൽ പ്രാധാന്യം നൽകുന്നതിനുമായി നടത്തിയ തുടർച്ചയായ നിക്ഷേപങ്ങളാണ് കമ്പനിയുടെ മികച്ച പ്രകടനത്തിന് പിന്നിലെന്ന് ചെയർമാനും മാനേജിങ് ഡയറക്ടറുമായ ലളിത് ഖൈത്താൻ പറഞ്ഞു.
English Summary
Leading liquor manufacturer Radico Khaitan reported strong growth in revenue and profit, driven by rising demand for premium spirits. In the second quarter ended September 2026, the company's net profit increased 66.1% year-on-year to Rs 230.9 crore. Revenue rose 16.8% to Rs 1,745.1 crore. Despite a decline in sales of regular liquor, strong demand for higher-priced premium spirits helped boost the company's profitability.
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
