സന്തോഷമായി ജീവിക്കാൻ ഒരു വ്യക്തിക്ക് എത്ര രൂപ വരുമാനം ആവശ്യമുണ്ടെന്ന ചോദ്യത്തിന് കൃത്യമായ ഒരു തുക പറയാൻ കഴിയില്ലെങ്കിലും, സാമ്പത്തിക സുരക്ഷിതത്വം സന്തോഷത്തിന് അത്യാവശ്യമാണെന്ന് ഗവേഷണങ്ങൾ ചൂണ്ടിക്കാണിക്കുന്നു. ദിവസേനയുള്ള അടിസ്ഥാന ആവശ്യങ്ങൾ നിറവേറ്റാനും കടബാധ്യതകളില്ലാതെ ജീവിക്കാനും ആവശ്യത്തിന് പണം കൈയ്യിലുള്ളപ്പോൾ ആളുകളിൽ മാനസികസമ്മർദ്ദം കുറയുകയും അത് സന്തോഷത്തിലേക്ക് നയിക്കുകയും ചെയ്യുന്നു.
ഇന്ത്യയിൽ കുറവ് മതി
പൂർഡ്യൂ യൂണിവേഴ്‌സിറ്റി ഉൾപ്പെടെയുള്ള സ്ഥാപനങ്ങൾ നടത്തിയ പ്രശസ്തമായ പഠനങ്ങൾ പ്രകാരം, വൈകാരികമായ സമാധാനത്തിനും സംതൃപ്തിക്കും ഒരു വ്യക്തിക്ക് പ്രതിവർഷം ഏകദേശം 50 ലക്ഷം മുതൽ 63 ലക്ഷം ഇന്ത്യൻ രൂപ വരെ വരെ വരുമാനം ആവശ്യമാണ് എന്നാണ് . ജീവിതത്തിൽ സമ്പൂർണ്ണ സന്തോഷവും സംതൃപ്തിയും ലഭിക്കാൻ ലോകശരാശരി കണക്കാക്കിയാൽ ഏകദേശം 95,000 ഡോളറോളമാണ് വേണ്ടത്. എന്നാൽ, ഈ തുക ഓരോ രാജ്യത്തെയും നഗരങ്ങളിലെയും ജീവിതച്ചെലവിന് അനുസരിച്ച് വ്യത്യാസപ്പെടാം.ഇത് വിദേശത്ത് നടത്തിയ പഠനമായതിനാലാണ് ഈ ഒരു തുക പറഞ്ഞിരിക്കുന്നത്. നമുക്ക് ഇന്ത്യക്കാർക്ക് സന്തോഷമായി ഇരിക്കാൻ ഇത്രയൊന്നും ആവശ്യമില്ല.
കൂടുതൽ പണമുണ്ടാക്കിയാൽ കൂടുതൽ സന്തോഷം വരില്ല
എന്നാൽ, ഒരു നിശ്ചിത പരിധി കഴിഞ്ഞാൽ കൂടുതൽ പണം ലഭിക്കുന്നത് മനുഷ്യന്റെ ദിവസേനയുള്ള സന്തോഷത്തിൽ വലിയ മാറ്റങ്ങളൊന്നും ഉണ്ടാക്കുന്നില്ലെന്നും ഈ റിപ്പോർട്ട് വ്യക്തമാക്കുന്നു. അതായത്, അടിസ്ഥാനപരമായ ആവശ്യങ്ങളും സുരക്ഷിതത്വവും ഉറപ്പാക്കിക്കഴിഞ്ഞാൽ പിന്നെ സന്തോഷം നൽകുന്നത് പണം മാത്രമല്ല; മറിച്ച് നല്ല കുടുംബബന്ധങ്ങൾ, സൗഹൃദങ്ങൾ, ശാരീരിക-മാനസിക ആരോഗ്യം, ആത്മസംതൃപ്തി നൽകുന്ന കാര്യങ്ങൾ എന്നിവയാണെന്ന് ലേഖനം ഓർമ്മിപ്പിക്കുന്നു.
ആവശ്യങ്ങൾ കൂടും
ഈ വിഷയത്തെക്കുറിച്ച് കൂടുതൽ ആഴത്തിൽ ചിന്തിക്കുമ്പോൾ, സാമ്പത്തിക വിദഗ്ദ്ധർ ചൂണ്ടിക്കാണിക്കുന്ന മറ്റൊരു പ്രധാന കാര്യം ഹെഡോണിക് ട്രെഡ്‌മിൽ എന്ന മാനസികാവസ്ഥയാണ്. അതായത്, നമ്മുടെ വരുമാനം ഉയരുന്നതിനനുസരിച്ച് നമ്മുടെ ആവശ്യങ്ങളും ആഗ്രഹങ്ങളും താനേ വർദ്ധിച്ചുകൊണ്ടിരിക്കും. കൂടുതൽ പണം ലഭിക്കുമ്പോൾ താൽക്കാലികമായി വലിയ സന്തോഷം തോന്നുമെങ്കിലും, കുറച്ചു കഴിയുമ്പോൾ നമ്മൾ ആ പുതിയ ജീവിതശൈലിയുമായി ശീലമാവുകയും പഴയ സന്തോഷ നിലവാരത്തിലേക്ക് തന്നെ തിരികെയെത്തുകയും ചെയ്യും. അതിനാൽ, എത്ര പണമുണ്ടാക്കിയാലും അത് സന്തോഷത്തിന്റെ അളവ് നിരന്തരം കൂട്ടിക്കൊള്ളണമെന്നില്ല.
പണം സന്തോഷത്തിന് ഒരു അടിത്തറ മാത്രമാണ് നൽകുന്നത്, അതിനു മുകളിലുള്ള വീട് പണിയേണ്ടത് മറ്റ് ഘടകങ്ങളാണ്. അടിസ്ഥാന ആവശ്യങ്ങൾ നിറവേറ്റാനുള്ള പണം ഉണ്ടായതിനു ശേഷം, സന്തോഷം കണ്ടെത്താൻ സാധനങ്ങൾ വാങ്ങിക്കൂട്ടുന്നതിനേക്കാൾ കൂടുതൽ സമയം പ്രകൃതിയോട് ഇണങ്ങി ജീവിക്കാനും, ഇഷ്ടമുള്ള വിനോദങ്ങളിൽ ഏർപ്പെടാനും, മറ്റുള്ളവരെ സഹായിക്കാനും പണം ഉപയോഗിക്കുന്നതാണ് കൂടുതൽ സംതൃപ്തി നൽകുന്നത്. അതിനാൽ, പണം നേടുന്നത് പോലെ തന്നെ അത് എന്തിനുവേണ്ടി ഉപയോഗിക്കുന്നു എന്നതും സന്തോഷത്തെ നിർണ്ണയിക്കുന്നതിൽ വലിയ പങ്ക് വഹിക്കുന്നു.
