ഭക്ഷണപ്രിയർക്ക് കൂടുതൽ റെസ്റ്ററന്റുകളിൽ നിന്ന് ഭക്ഷണം ഓർഡർ ചെയ്യാനുള്ള സൗകര്യമൊരുക്കി ഓൺലൈൻ ഫുഡ് ഡെലിവറി പ്ലാറ്റ്‌ഫോമായ സൊമാറ്റോ. 40 കിലോമീറ്റർ വരെ അകലെയുള്ള റെസ്റ്ററന്റുകളിൽ നിന്ന് ഭക്ഷണം ഓർഡർ ചെയ്യാൻ കഴിയുന്ന പുതിയ ഫീച്ചറായ ‘ലിമിറ്റ്‌ലെസ് ഡെലിവറി’ (Limitless Delivery) എന്ന രീതി കമ്പനി പ്രഖ്യാപിച്ചു. ഇതോടെ നഗരത്തിന്റെ മറ്റൊരു ഭാഗത്തുള്ള ഇഷ്ടപ്പെട്ട റെസ്റ്ററന്റുകളിൽ നിന്നുപോലും ഉപഭോക്താക്കൾക്ക് ഭക്ഷണം ഓർഡർ ചെയ്യാനാകും.
നവംബർ 6 വെള്ളിയാഴ്ചയാണ് സൊമാറ്റോ പുതിയ സംവിധാനം പ്രഖ്യാപിച്ചത്. ഇതുവരെ ഉപഭോക്താക്കളുടെ ഡെലിവറി വിലാസത്തിന് സമീപമുള്ള റെസ്റ്ററന്റുകൾക്കായിരുന്നു ആപ്പിൽ പ്രധാനമായും മുൻഗണന ലഭിച്ചിരുന്നത്. പുതിയ ഫീച്ചറിലൂടെ ഈ ദൂരപരിധി മറികടന്ന് നഗരത്തിനുള്ളിൽ 40 കിലോമീറ്റർ വരെ അകലെയുള്ള റെസ്റ്ററന്റുകളിൽ നിന്നും ഭക്ഷണം ലഭ്യമാക്കുകയാണ് ലക്ഷ്യം.
ലിമിറ്റ്‌ലെസ് ഡെലിവറിയിലൂടെ നഗരത്തിലെ കൂടുതൽ റെസ്റ്ററന്റുകളെ ഉപഭോക്താക്കളിലേക്ക് എത്തിക്കാൻ സാധിക്കുമെന്ന് സൊമാറ്റോയുടെ സിഇഒ ആദിത്യ മംഗള അഭിപ്രായപ്പെട്ടു.
നിലവിൽ ഇന്ത്യയിലെ ഏഴ് പ്രധാന നഗരങ്ങളിലാണ് ലിമിറ്റ്‌ലെസ് ഡെലിവറി സംവിധാനം ലഭ്യമാക്കിയിരിക്കുന്നത്. ബെംഗളൂരു, ഡൽഹി എൻസിആർ, ചെന്നൈ, മുംബൈ, കൊൽക്കത്ത, പൂനെ, ഹൈദരാബാദ് എന്നിവയാണ് ഈ നഗരങ്ങൾ. മറ്റ് നഗരങ്ങളിലേക്ക് സേവനം വ്യാപിപ്പിക്കുന്നതുമായി ബന്ധപ്പെട്ട വിവരങ്ങൾ കമ്പനി ഇതുവരെ പുറത്തുവിട്ടിട്ടില്ല.
സൊമാറ്റോ ആപ്പിലൂടെ രണ്ട് രീതികളിൽ പുതിയ ഫീച്ചർ ഉപയോഗിക്കാം. ആപ്പിന്റെ ഹോംപേജിലെ ‘Explore More’ വിഭാഗത്തിൽ നൽകിയിരിക്കുന്ന പ്രത്യേക ലിങ്ക് വഴിയാണ് ആദ്യ മാർഗം. ഇതിൽ ക്ലിക്ക് ചെയ്താൽ പുതിയ സംവിധാനത്തിലൂടെ ഓർഡർ ചെയ്യാൻ കഴിയുന്ന റെസ്റ്ററന്റുകളുടെ പട്ടിക ലഭിക്കും.
രണ്ടാമത്തെ മാർഗം ആപ്പിൽ നേരിട്ട് ഇഷ്ടപ്പെട്ട റെസ്റ്ററന്റിന്റെ പേര് തിരയുക എന്നതാണ്. സാധാരണ രീതിയിൽ തന്നെ റെസ്റ്ററന്റ് തിരഞ്ഞെടുത്ത് ഭക്ഷണം ഓർഡർ ചെയ്യാം. 40 കിലോമീറ്റർ വരെ അകലെയുള്ള റെസ്റ്ററന്റുകൾ ലഭ്യമാണെങ്കിൽ അവിടെ നിന്നും ഓർഡർ നൽകാനാകും.
പുതിയ സംവിധാനത്തിലൂടെ ഓർഡർ ചെയ്യുമ്പോൾ അധിക ഡെലിവറി ചാർജ് ഈടാക്കുമോ എന്ന കാര്യത്തിൽ സൊമാറ്റോ ഇതുവരെ വ്യക്തത വരുത്തിയിട്ടില്ല. അതുപോലെ, ദൂരെയുള്ള റെസ്റ്ററന്റുകളിൽ നിന്ന് ഭക്ഷണം എത്തിക്കാൻ കൂടുതൽ സമയം വേണ്ടിവരുമോ എന്ന കാര്യത്തിലും വിശദീകരണം നൽകിയിട്ടില്ല. റെസ്റ്ററന്റിന്റെ ദൂരവും മറ്റ് സാഹചര്യങ്ങളും അനുസരിച്ച് ഡെലിവറി സമയത്തിൽ വ്യത്യാസമുണ്ടാകാം.
ഉപഭോക്താക്കൾക്ക് കൂടുതൽ ഭക്ഷണശാലകൾ തിരഞ്ഞെടുക്കാനുള്ള അവസരം നൽകുന്നതിനൊപ്പം, ജനപ്രിയ റെസ്റ്ററന്റുകൾക്ക് നഗരത്തിന്റെ വിവിധ ഭാഗങ്ങളിലുള്ള കൂടുതൽ ഉപഭോക്താക്കളിലേക്ക് എത്താനും പുതിയ സംവിധാനം സഹായിക്കുമെന്നാണ് പ്രതീക്ഷ.
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
