വീണ്ടും ഇന്ത്യന്‍ ഓഹരി വിപണിയുടെ ശ്രദ്ധാകേന്ദ്രമായി മുകേഷ് അംബാനിയുടെ റിലയന്‍സ് ഇന്‍ഡസ്ട്രീസ്. രണ്ടാം പാദത്തിലെ റെക്കോര്‍ഡ് സാമ്പത്തികഫലത്തിന് പിന്നാലെ തിങ്കളാഴ്ച റിലയന്‍സ് ഓഹരി ഏകദേശം 12 ശതമാനം (135 പോയന്റ്) കുതിച്ച് 1,300ല്‍ വ്യാപാരം അവസാനിപ്പിച്ചു. ഒരു ദിവസം കൊണ്ട് കമ്പനിയുടെ വിപണിമൂല്യത്തില്‍ ഏകദേശം 1.84 ലക്ഷം കോടി രൂപ കൂട്ടിച്ചേര്‍ന്നു.
ഇതോടെ റിലയന്‍സിന്റെ വിപണിമൂല്യം ഏകദേശം 17.6 ലക്ഷം കോടി രൂപയിലെത്തി. 2020 ഏപ്രിലിന് ശേഷമുള്ള ഏറ്റവും ശക്തമായ ഏകദിന മുന്നേറ്റങ്ങളിലൊന്നാണ് ഓഹരി രേഖപ്പെടുത്തിയത്.
റെക്കോര്‍ഡ് ഫലത്തിന് വിപണിയുടെ പ്രതികരണം
രണ്ടാം പാദത്തില്‍ റിലയന്‍സ് മികച്ച ലാഭവും വരുമാനവും രേഖപ്പെടുത്തിയതോടെയാണ് നിക്ഷേപകര്‍ ശക്തമായി തിരിച്ചെത്തിയത്. ഓയില്‍, കെമിക്കല്‍ വിഭാഗത്തിലെ മെച്ചപ്പെട്ട പ്രകടനവും ജിയോ ഉള്‍പ്പെടെയുള്ള പുതിയ വളര്‍ച്ചാ മേഖലകളുടെ കരുത്തുമാണ് വിപണിയുടെ ആത്മവിശ്വാസം ഉയര്‍ത്തിയത്.
റിലയന്‍സ് പോലൊരു ലാര്‍ജ് കാപ് കമ്പനി 12 ശതമാനത്തോളം ഒരു ദിവസം ഉയരുന്നത് സാധാരണ സംഭവമല്ല. കമ്പനിയുടെ ഭാവി വരുമാനസാധ്യതയെക്കുറിച്ചുള്ള വിപണിയുടെ പുതിയ വിലയിരുത്തലാണ് ഈ കുതിപ്പിലൂടെ പ്രതിഫലിക്കുന്നതെന്നതാണ് ശ്രദ്ധേയം.
നിഫ്റ്റിക്കും കരുത്തായി
റിലയന്‍സ് നിഫ്റ്റി സൂചികയിലെ ഏറ്റവും വലിയ ഓഹരികളിലൊന്നായതിനാല്‍ കമ്പനിയുടെ മുന്നേറ്റം മുഴുവന്‍ വിപണിയെയും സ്വാധീനിച്ചു. റിലയന്‍സ് റാലി നിഫ്റ്റിക്ക് ഏകദേശം 1.7 ശതമാനം വരെ പിന്തുണ നല്‍കിയതായി റിപ്പോര്‍ട്ട് പറയുന്നു. നിഫ്റ്റി 50 സൂചികയുടെ 7.3% വെയ്‌റ്റേജാണ് റിലയന്‍സിനുള്ളത്. നിഫ്റ്റി ഇന്ന് 1.68% നേട്ടത്തോടെ 23,440 എന്ന നിലയിലാണ് വ്യാപാരം അവസാനിപ്പിച്ചത്.
റാലി തുടരുമോ?
ഒരു ദിവസത്തെ 12 ശതമാനം കുതിപ്പിന് ശേഷം സ്വാഭാവികമായ ലാഭമെടുപ്പും ഉണ്ടാകാം. എന്നാല്‍ ദീര്‍ഘകാല നിക്ഷേപകരെ സംബന്ധിച്ചിടത്തോളം കൂടുതല്‍ പ്രധാനപ്പെട്ടത് അടുത്ത പാദങ്ങളിലെ പ്രകടനമാണ്.
എണ്ണ-രാസവസ്തു ബിസിനസിലെ ലാഭക്ഷമത എത്രത്തോളം നിലനില്‍ക്കും, ജിയോയുടെ വളര്‍ച്ച എങ്ങനെ തുടരും, പുതിയ ബിസിനസുകളിലെ നിക്ഷേപങ്ങള്‍ എപ്പോള്‍ വലിയ വരുമാനമായി മാറും… തുടങ്ങിയ ചോദ്യങ്ങളാണ് റിലയന്‍സിന്റെ അടുത്ത വളര്‍ച്ചാ ഘട്ടം നിര്‍ണയിക്കുക. എന്നിരുന്നാലും ഒരു ദിവസം കൊണ്ട് 1.84 ലക്ഷം കോടി രൂപ വിപണിമൂല്യം കൂട്ടിച്ചേര്‍ത്ത ഈ റാലി, റിലയന്‍സിനെക്കുറിച്ചുള്ള വിപണിയുടെ പ്രതീക്ഷകള്‍ വീണ്ടും ഉയര്‍ന്നതിന്റെ വ്യക്തമായ സൂചനയാണ്.
(Disclaimer: This does not constitute investment advice. Investors are advised to evaluate independently and consult with professional advisors before making any investments in the stock market, mutual funds, gold, or cryptocurrencies.)
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
