ക്രിപ്‌ടോകറൻസി എക്സ്ചേഞ്ചായ ബൈനാൻസിൽ നിന്ന് 600 കോടിയിലധികം ഡോളർ കവർച്ച ചെയ്ത സൈബർ ആക്രമണത്തിന് പിന്നിൽ ഉത്തരകൊറിയയാണെന്ന് അമേരിക്കൻ അന്വേഷണ ഏജൻസിയായ എഫ്.ബി.ഐ ഔദ്യോഗികമായി സ്ഥിരീകരിച്ചു. ട്രേഡർട്രെയ്‌റ്റർ എന്നറിയപ്പെടുന്ന ഉത്തരകൊറിയൻ സർക്കാറിൻ്റെ പിന്തുണയുള്ള ഹാക്കിംഗ് സംഘമാണ് ഈ ഭീമൻ മോഷണത്തിന് പിന്നിലെന്നും, കവർച്ച ചെയ്യപ്പെട്ട ഫണ്ടുകൾ പലതരം ഡിജിറ്റൽ സംവിധാനങ്ങളിലൂടെ മാറ്റാൻ ഇവർ ശ്രമിച്ചുകൊണ്ടിരിക്കുകയാണെന്നും എഫ്.ബി.ഐ മുന്നറിയിപ്പ് നൽകുന്നു.
ജോലി ഓഫ്ഫറിലൂടെ കടന്നുകയറി
ലോകത്തിലെ ഏറ്റവും വലിയ ക്രിപ്‌ടോകറൻസി എക്സ്ചേഞ്ചുകളിൽ ഒന്നായ ബൈനാൻസിൽ നടന്ന കൂറ്റൻ തട്ടിപ്പിന് പിന്നിൽ വ്യാജ ജോബ് ഇന്റർവ്യൂകളും ആർട്ടിഫിഷ്യൽ ഇന്റലിജൻസും മലീഷ്യസ് കോഡുകളും ഉപയോഗിച്ചുള്ള അതീവ രഹസ്യമായ നീക്കങ്ങളാണുള്ളത്. ബൈനാൻസിലെ ഒരു സോഫ്റ്റ്‌വെയർ എൻജിനീയറെയാണ് ഹാക്കർമാർ ആദ്യം ലക്ഷ്യമിട്ടത്. വ്യാജ തൊഴിൽ തട്ടിപ്പ് പ്ലാറ്റ്‌ഫോമുകൾ വഴി പ്രോജക്ട് ഡയറക്ടർ ചമഞ്ഞ് ബന്ധപ്പെട്ട ഇവർ, വ്യാജ കമ്പനിയുടെ സി.ഇ.ഒ ആണെന്ന് പറഞ്ഞ് ഓൺലൈൻ വഴി ഇന്റർവ്യൂ നടത്തുകയും ചെയ്തു. ഇന്റർവ്യൂവിന്റെ ഭാഗമായി ഒരു അസൈൻമെന്റ് ഡൗൺലോഡ് ചെയ്യാൻ ആവശ്യപ്പെടുകയും, അതിലൂടെ എൻജിനീയറുടെ സിസ്റ്റത്തിലേക്ക് ദോഷകരമായ സോഫ്റ്റ്‌വെയർ കോഡുകൾ കടത്തിവിടുകയുമായിരുന്നു.
പിന്നിൽ ഉത്തര കൊറിയ
ഈ തുടക്കത്തിന് ശേഷം ഹാക്കർമാർ കൂടുതൽ ജീവനക്കാരുടെ ഡിവൈസുകളിലേക്കും ബൈനാൻസിന്റെ ഡിജിറ്റൽ വാലറ്റ് സിസ്റ്റത്തിലേക്കും കടന്നുകയറി. ആർട്ടിഫിഷ്യൽ ഇന്റലിജൻസ് ടൂളുകളും കംപ്രമൈസ് ചെയ്ത ലാപ്‌ടോപ്പുകളും ഉപയോഗിച്ചാണ് ഇവർ സിസ്റ്റം പൂർണ്ണമായും തങ്ങളുടെ നിയന്ത്രണത്തിലാക്കിയത്. ഉത്തരകൊറിയയിൽ നിന്നുള്ള ഹാക്കർമാരാണ് ഈ വൻകിട സൈബർ ആക്രമണത്തിന് പിന്നിലെന്ന് ബൈനാൻസും അമേരിക്കൻ അന്വേഷണ ഏജൻസിയായ എഫ്.ബി.ഐയും കണ്ടെത്തിയിട്ടുണ്ട്. എന്നാൽ ഉത്തരകൊറിയ ഈ ആരോപണം നിഷേധിച്ചിട്ടുണ്ട്. ഇത്തരം വ്യാജ ഇന്റർവ്യൂ തന്ത്രങ്ങൾ ഉപയോഗിച്ച് മുമ്പും വലിയ ക്രിപ്‌ടോകറൻസി മോഷണങ്ങൾ നടന്നിട്ടുണ്ടെന്ന് സൈബർ സുരക്ഷാ വിദഗ്ധർ വ്യക്തമാക്കുന്നു.
സുരക്ഷ ശക്തമാക്കും
സംഭവത്തെ തുടർന്ന് ബൈനാൻസ് രണ്ട് ദിവസത്തേക്ക് പണം പിൻവലിക്കുന്നത് താൽക്കാലികമായി നിർത്തിവെക്കുകയും സുരക്ഷാ പരിശോധനകൾ കർശനമാക്കുകയും ചെയ്തു. മോഷ്‌ടിക്കപ്പെട്ട പണത്തിന്റെ ഒരു വലിയ ഭാഗം മരവിപ്പിക്കാൻ സ്റ്റേബിൾകോയിൻ കമ്പനികൾക്ക് സാധിച്ചിട്ടുണ്ട്. കൂടാതെ, സ്വന്തം ഫണ്ടുകളും ഇൻഷുറൻസും ഉപയോഗിച്ച് നഷ്ടപ്പെട്ട തുക നികത്താൻ തുടങ്ങിയതായും എക്സ്ചേഞ്ച് അറിയിച്ചു. എഫ്.ബി.ഐ ഉൾപ്പെടെയുള്ള അന്താരാഷ്ട്ര അന്വേഷണ ഏജൻസികളുമായി സഹകരിച്ച് സുരക്ഷാ സംവിധാനങ്ങൾ കൂടുതൽ ശക്തമാക്കാനുള്ള നടപടികളിലാണ് ബൈനാൻസ് ഇപ്പോൾ.
English Summary
The FBI confirmed that North Korea's TraderTraitor hacking group stole $6.3 billion from Binance using fake job interviews, malicious code, and AI tools to compromise engineer systems and digital wallets.
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
