വരും പത്ത് വർഷത്തിനുള്ളിൽ ലോകത്തിലെ ഏറ്റവും വേഗത്തിൽ വളരുന്ന പ്രധാന നഗരമായി ബെംഗളൂരു മാറുമെന്ന് ആഗോള റിയൽ എസ്റ്റേറ്റ് കൺസൾട്ടൻസി സ്ഥാപനമായ സാവിൽസിന്റെ (Savills) വിലയിരുത്തൽ. ആഗോള കമ്പനികൾ മികച്ച തൊഴിൽശേഷിയുള്ള യുവാക്കളെ തേടി ഇന്ത്യയിലേക്ക് കൂടുതൽ ശ്രദ്ധ കേന്ദ്രീകരിക്കുന്ന സാഹചര്യത്തിലാണ് ബെംഗളൂരുവിന് വലിയ വളർച്ചാ സാധ്യത പ്രവചിക്കപ്പെടുന്നത്.
2035ഓടെ ബെംഗളൂരുവിന്റെ ജനസംഖ്യയിൽ ഏകദേശം 30 ലക്ഷം പേരുടെ വർധനയുണ്ടാകുമെന്നാണ് സാവിൽസ് വേൾഡ് റിസർച്ചിന്റെ തലവൻ പോൾ ടോസ്റ്റവിൻ വ്യക്തമാക്കിയത്. നഗരങ്ങളുടെ സാമ്പത്തിക വളർച്ച, വ്യക്തിഗത സമ്പത്തിലെ വർധന, ജനസംഖ്യാ ഘടന, കുടിയേറ്റം തുടങ്ങിയ വിവിധ ഘടകങ്ങൾ വിലയിരുത്തിയാണ് റിപ്പോർട്ട് തയ്യാറാക്കിയത്. ലോകമെമ്പാടുമുള്ള 245 നഗരങ്ങളുടെ സാമ്പത്തിക സാധ്യതകളാണ് സാവിൽസ് പഠനവിധേയമാക്കിയത്. അടുത്ത പത്ത് വർഷത്തിനുള്ളിൽ റിയൽ എസ്റ്റേറ്റ്, നിക്ഷേപ മേഖലകളിൽ ഏറ്റവും കൂടുതൽ ചലനമുണ്ടാക്കാൻ സാധ്യതയുള്ള നഗരങ്ങളെയാണ് പഠനം കണ്ടെത്തിയത്.
ആഗോള കമ്പനികൾക്ക് പ്രിയം ഇന്ത്യ
ആഗോള കമ്പനികൾ ബിസിനസ് വിപുലീകരിക്കുന്നതിനായി പുതിയ നഗരങ്ങൾ തേടുകയാണ്. മികച്ച തൊഴിൽശേഷിയുള്ള യുവജനതയും വളർന്നുവരുന്ന നൈപുണ്യ മേഖലയുമാണ് ഇന്ത്യയുടെ പ്രധാന നേട്ടമെന്ന് സാവിൽസിന്റെ ഗ്ലോബൽ ഒക്കുപ്പയർ സർവീസസ് സിഇഒ റിക്ക് ഷുഹാം പറഞ്ഞു. യുവജനസംഖ്യ കൂടുതലുള്ള ഇന്ത്യയിൽ വൈദഗ്ധ്യമുള്ള തൊഴിലാളികളുടെ ലഭ്യതയും വർധിച്ചുവരികയാണ്. ഇതോടെ ആഗോള കമ്പനികൾക്ക് ഇന്ത്യ കൂടുതൽ ആകർഷകമായ ബിസിനസ് കേന്ദ്രമായി മാറുന്നു. ഗ്ലോബൽ കപ്പബിലിറ്റി സെന്ററുകൾ (GCC) സ്ഥാപിക്കുന്നതിനുള്ള പ്രധാന കേന്ദ്രമായും ഇന്ത്യയുടെ പ്രാധാന്യം വർധിക്കുകയാണ്.
ചെന്നൈയ്ക്കും ഹൈദരാബാദിനും മികച്ച സാധ്യത
ബെംഗളൂരു മാത്രമല്ല, മറ്റ് ഇന്ത്യൻ നഗരങ്ങളും ആഗോള വളർച്ചാ പട്ടികയിൽ ശ്രദ്ധേയമായ സ്ഥാനം നേടുന്നുണ്ട്. ശക്തമായ ജിഡിപി വളർച്ചയും ആളോഹരി ജിഡിപിയിലെ വർധനയും കാരണം ചെന്നൈയും പഠനത്തിൽ ഇടംപിടിച്ചിട്ടുണ്ട്. അതേസമയം, ആളോഹരി ജിഡിപി വളർച്ചയിൽ ഏറ്റവും വേഗത കൈവരിക്കാൻ സാധ്യതയുള്ള നഗരമായി ഹൈദരാബാദിനെ വിലയിരുത്തുന്നു. ഇന്ത്യയിലെ നഗരങ്ങളുടെ സാമ്പത്തിക വളർച്ചയിൽ വ്യക്തമായ മുന്നേറ്റമുണ്ടെന്നാണ് സാവിൽസിന്റെ വിലയിരുത്തൽ.
ഏഷ്യൻ നഗരങ്ങളുടെ കുതിപ്പ്
സാവിൽസിന്റെ പഠനത്തിൽ ഏഷ്യ-പസഫിക് മേഖലയിലെ നഗരങ്ങളാണ് മുന്നിൽ. ലോകത്തിലെ ഏറ്റവും വേഗത്തിൽ വളരുന്ന ആദ്യ 50 നഗരങ്ങളിൽ 75 ശതമാനവും ഈ മേഖലയിലാണ്. ആദ്യ 20 നഗരങ്ങളിൽ 85 ശതമാനവും ഏഷ്യ-പസഫിക് മേഖലയിലാണുള്ളത്. ഇന്ത്യയ്ക്ക് പുറമെ വിയറ്റ്നാം, ചൈന, ഫിലിപ്പീൻസ്, മലേഷ്യ തുടങ്ങിയ രാജ്യങ്ങളിലെ നഗരങ്ങളും പട്ടികയിൽ ഇടംപിടിച്ചിട്ടുണ്ട്.
റിയൽ എസ്റ്റേറ്റ് മേഖലയ്ക്ക് വൻ അവസരങ്ങൾ
ജനസംഖ്യാ വളർച്ചയും ആഗോള കമ്പനികളുടെ വരവും നഗരങ്ങളിലെ റിയൽ എസ്റ്റേറ്റ് വിപണിയിൽ വലിയ മാറ്റങ്ങൾക്ക് വഴിയൊരുക്കുമെന്നാണ് വിലയിരുത്തൽ. ഓഫീസ് കെട്ടിടങ്ങൾ, വാണിജ്യ സമുച്ചയങ്ങൾ, താമസസൗകര്യങ്ങൾ, അടിസ്ഥാനസൗകര്യ വികസനം തുടങ്ങിയ മേഖലകളിൽ ആവശ്യകത വർധിക്കാൻ സാധ്യതയുണ്ട്. ആഗോള സാമ്പത്തിക അനിശ്ചിതത്വം തുടരുന്ന സാഹചര്യത്തിൽ മികച്ച തൊഴിൽശേഷിയും സാമ്പത്തിക വളർച്ചാ സാധ്യതയും അടിസ്ഥാനസൗകര്യങ്ങളും ഉള്ള നഗരങ്ങളിലേക്കാണ് കമ്പനികൾ കൂടുതൽ ശ്രദ്ധ കേന്ദ്രീകരിക്കുന്നത്. ഈ മാറ്റം ഇന്ത്യയിലെ പ്രധാന നഗരങ്ങൾക്ക് വലിയ നിക്ഷേപാവസരങ്ങൾ തുറന്നുകൊടുക്കുമെന്നാണ് സാവിൽസിന്റെ വിലയിരുത്തൽ.
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
