മൈക്രോസോഫ്ട് തകരാറുകൾ ബിസ്നസുകളെ വലക്കുന്നു, ഈ നഷ്ടം ഇൻഷുറൻസ് നികത്തുമോ?

ലോകമെമ്പാടുമുള്ള ദശകണക്കിന് ഉപയോക്താക്കളെയും സ്ഥാപനങ്ങളെയും ബാധിച്ചുകൊണ്ട് മൈക്രോസോഫ്റ്റ് സേവനങ്ങളിൽ ഉണ്ടായ വലിയ തകരാർ പരിഹരിക്കാൻ കമ്പനി നടത്തിയ ആദ്യ ശ്രമങ്ങൾ പ്രതീക്ഷിച്ചതുപോലെ ഫലം കണ്ടില്ലെന്ന് ഔദ്യോഗികമായി സ്ഥിരീകരിച്ചു. മൈക്രോസോഫ്റ്റ് ഔട്ട്‌ലുക്ക് , ടീംസ് , കോപൈലറ്റ് തുടങ്ങിയ പ്രധാന സേവനങ്ങളെയെല്ലാം ഈ തകരാർ സാരമായി ബാധിച്ചിട്ടുണ്ട്. സെർവറുകളിലെ അപ്രതീക്ഷിത ഭാരവും ട്രാഫിക് അസന്തുലിതാവസ്ഥയും കാരണം സേവനങ്ങൾ പുനസ്ഥാപിക്കാനുള്ള പ്രക്രിയകൾ വിചാരിച്ചത്ര വേഗത്തിൽ മുന്നോട്ട് പോകുന്നില്ലെന്നും, പ്രശ്നം പൂർണ്ണമായി പരിഹരിക്കാൻ കൂടുതൽ സമയമെടുത്തേക്കാമെന്നും കമ്പനി അറിയിച്ചു. സൈബർ ആക്രമണം മൂലമല്ല ഈ തകരാർ ഉണ്ടായതെന്ന് മൈക്രോസോഫ്റ്റ് വ്യക്തമാക്കിയിട്ടുണ്ട്.

ബദൽ മാർഗങ്ങൾ പരീക്ഷിക്കുന്നു

തകരാർ പരിഹരിക്കുന്നതിനായി മൈക്രോസോഫ്റ്റ് എഞ്ചിനീയർമാർ തുടക്കം മുതൽ തന്നെ വിവിധ മാർഗ്ഗങ്ങൾ നടപ്പിലാക്കാൻ ശ്രമിച്ചെങ്കിലും, സെർവറുകൾ ശരിയായ രീതിയിൽ പ്രതികരിക്കാത്തതും മാറ്റങ്ങൾ കൃത്യമായി സിങ്ക് ആകാത്തതും തിരിച്ചടിയായി. സ്ഥിതിഗതികൾ നിരീക്ഷിച്ചുവരികയാണെന്നും, നിലവിലെ ഈ സാങ്കേതിക തടസ്സങ്ങൾ മറികടക്കാനും സെർവറുകളുടെ ശേഷി വർദ്ധിപ്പിക്കാനും മറ്റ് ബദൽ മാർഗ്ഗങ്ങൾ തേടിക്കൊണ്ടിരിക്കുകയാണെന്നും മൈക്രോസോഫ്റ്റ് 365 സ്റ്റാറ്റസ് എക്സ് വഴി വ്യക്തമാക്കിയിട്ടുണ്ട്.

ഈ ആഗോള തകരാർ കാരണം നിരവധി സർക്കാർ സ്ഥാപനങ്ങളുടെയും സ്വകാര്യ കമ്പനികളുടെയും ഔദ്യോഗിക പ്രവർത്തനങ്ങളും ഇമെയിൽ കൈമാറ്റങ്ങളും തടസ്സപ്പെട്ടിട്ടുണ്ട്. എങ്കിലും അത്യാഹിത വിഭാഗങ്ങളെയും മറ്റ് പ്രധാന സേവനങ്ങളെയും ഇത് ബാധിക്കാതിരിക്കാൻ ആവശ്യമായ മുൻകരുതലുകൾ സ്വീകരിച്ചിട്ടുണ്ടെന്ന് അധികൃതർ അറിയിച്ചിട്ടുണ്ട്. തകർന്നടിഞ്ഞ സേവനങ്ങൾ എത്രയും പെട്ടെന്ന് പൂർവ്വസ്ഥിതിയിലാക്കാൻ സാങ്കേതിക വിദഗ്ധർ തീവ്രശ്രമം നടത്തിവരികയാണെങ്കിലും, ഉപയോക്താക്കൾ നേരിടുന്ന ബുദ്ധിമുട്ടുകൾ ഉടൻ പരിഹരിക്കപ്പെടുമെന്ന പ്രതീക്ഷയിലാണ് ബന്ധപ്പെട്ട എല്ലാവരും.

സാമ്പത്തിക ബാധ്യത

മൈക്രോസോഫ്റ്റിലുണ്ടായ ആഗോള തകരാർ ലോകമെമ്പാടുമുള്ള ദശകണക്കിന് ബിസിനസ്സ് സ്ഥാപനങ്ങളുടെയും സർക്കാർ ഓഫീസുകളുടെയും ദൈനംദിന പ്രവർത്തനങ്ങളെയും ഉൽപ്പാദനക്ഷമതയെയും സാരമായി ബാധിച്ചു. ഔട്ട്‌ലുക്ക് , ടീംസ് , കോപൈലറ്റ് തുടങ്ങിയ പ്രധാന സേവനങ്ങൾ മണിക്കൂറുകളോളം സ്തംഭിച്ചത് കാരണം ലോകമെമ്പാടുമുള്ള കമ്പനികൾക്ക് ആശയവിനിമയങ്ങൾ തടസ്സപ്പെടുകയും, ഇടപാടുകൾ വൈകുകയും ചെയ്തു. പല സർക്കാർ ഏജൻസികൾക്കും, സ്കൂളുകൾക്കും, മറ്റ് സ്വകാര്യ കമ്പനികൾക്കും തങ്ങളുടെ സേവനങ്ങൾ ഓൺലൈനായി നൽകാൻ കഴിയാതെ വരികയും, ചിലർക്ക് തങ്ങളുടെ സാമ്പത്തിക ഫല പ്രഖ്യാപനങ്ങൾ പോലും മാറ്റിവെക്കേണ്ടി വരികയും ചെയ്തു. ഇത്തരം തടസ്സങ്ങൾ ബിസിനസ്സ് ലോകത്തിന് കോടികളുടെ ഉൽപ്പാദന നഷ്ടവും പരോക്ഷമായ സാമ്പത്തിക ബാധ്യതയുമാണ് ഉണ്ടാക്കിയിരിക്കുന്നത്.

ഇൻഷുറൻസ് പരിധിയിൽ വരില്ല

ഇത്തരം സാങ്കേതിക തടസ്സങ്ങൾ ഉണ്ടാക്കുന്ന ഭൂരിഭാഗം സാമ്പത്തിക നഷ്ടവും നേരിട്ട് ഇൻഷുറൻസ് പരിധിയിൽ വരില്ലെന്നതാണ് കമ്പനികൾക്ക് തിരിച്ചടിയാകുന്നത്. സൈബർ ആക്രമണം മൂലമല്ല ഇത്തരം തകരാറുകൾ സംഭവിക്കുന്നത് എന്നതിനാലും, സേവനങ്ങൾ വളരെ പെട്ടെന്ന് പുനസ്ഥാപിക്കപ്പെടുന്നതിനാലും ഇൻഷുറൻസ് ക്ലെയിമുകൾ ലഭിക്കുന്നതിന് പ്രത്യേക വ്യവസ്ഥകളും കാലതാമസങ്ങളും നേരിടേണ്ടി വരുന്നു. അതിനാൽ, ഈ പ്രശനം മൂലം നഷ്ടപ്പെടുന്ന സമയത്തിന്റെയും പ്രവർത്തനസ്തംഭനത്തിന്റെയും യഥാർത്ഥ സാമ്പത്തിക ഭാരം മുഴുവൻ ബാധിതരായ സ്ഥാപനങ്ങൾ തന്നെ വഹിക്കേണ്ടി വരുന്നു. ക്ലൗഡ് സേവനങ്ങളെ അത്യധികം ആശ്രയിക്കുന്ന ആധുനിക ബിസിനസ്സ് ലോകത്തിന് ഇത്തരം അപ്രതീക്ഷിത തടസ്സങ്ങൾ വലിയ സാമ്പത്തിക നഷ്ടവും സുരക്ഷാ ആശങ്കകളുമാണ് സമ്മാനിക്കുന്നത്.

English Summary