രാജ്യത്തിന്റെ വിദൂര ഗ്രാമങ്ങളിലേക്കും കുന്നിന് പ്രദേശങ്ങളിലേക്കും അടിയന്തര വൈദ്യസഹായം എത്തിക്കാന് ബൈക്ക് ആംബുലന്സുകള് വരുന്നു. ഇടുങ്ങിയ പാതകളിലും വലിയ വാഹനങ്ങള് എത്താന് ബുദ്ധിമുട്ടുള്ള മലയോര മേഖലകളിലും രോഗികള്ക്ക് ആദ്യഘട്ട ജീവന്രക്ഷാ പരിചരണം ഉറപ്പാക്കാനാണ് കേന്ദ്ര ഉപരിതല ഗതാഗത മന്ത്രാലയം പുതിയ സുരക്ഷാ മാനദണ്ഡങ്ങള് പ്രഖ്യാപിച്ചത്. അടിയന്തര മെഡിക്കല് രംഗത്ത് വന് മാറ്റത്തിന് വഴിയൊരുക്കുന്ന ഈ പുതിയ തീരുമാനത്തിന്റെ വിശദാംശങ്ങള് അറിയാം…
നിയമപരമായ അംഗീകാരം
രാജ്യത്ത് ഇതുവരെ ബൈക്ക് ആംബുലന്സുകള്ക്ക് സ്വന്തമായി ഒരു ഔദ്യോഗിക വാഹന വിഭാഗമോ പ്രത്യേക രജിസ്ട്രേഷന് മാനദണ്ഡങ്ങളോ ഉണ്ടായിരുന്നില്ല. മിക്ക സംസ്ഥാനങ്ങളിലും വിവിധ സന്നദ്ധ സംഘടനകളോ പ്രാദേശിക ഭരണകൂടങ്ങളോ ആണ് താല്ക്കാലിക ക്രമീകരണങ്ങളോടെ ഇവ പ്രവര്ത്തിപ്പിച്ചുപോന്നിരുന്നത്. ഇതിന് ശാശ്വതമായ പരിഹാരം കാണുന്നതിനായി, 1989-ലെ കേന്ദ്ര മോട്ടോര് വാഹന നിയമത്തില് മാറ്റങ്ങള് വരുത്തിക്കൊണ്ട് ബൈക്ക് ആംബുലന്സുകളെ ഒരു പ്രത്യേക അംഗീകൃത വാഹന വിഭാഗമായി ഉള്പ്പെടുത്താന് കേന്ദ്ര ഉപരിതല ഗതാഗത മന്ത്രാലയം തീരുമാനിച്ചിരിക്കുകയാണ്. ഇതിലൂടെ രാജ്യത്തുടനീളം ബൈക്ക് ആംബുലന്സുകള്ക്ക് ഏകീകൃത നിയമ പരിരക്ഷ ലഭിക്കും.
ഗ്രാമീണ മേഖലകളിലെ അടിയന്തര ആവശ്യം
ഇന്ത്യയിലെ വിദൂര ഗ്രാമങ്ങളിലും വനാന്തരങ്ങളിലും കുന്നിന് പ്രദേശങ്ങളിലും കൃത്യമായ റോഡ് സൗകര്യങ്ങള് ഇല്ലാത്തത് വലിയൊരു വെല്ലുവിളിയാണ്. ഇത്തരം പ്രദേശങ്ങളിലും നഗരങ്ങളിലെ കടുത്ത ഗതാഗതക്കുരുക്കിലും സാധാരണ നാലുചക്ര ആംബുലന്സുകള്ക്ക് കൃത്യസമയത്ത് എത്തിച്ചേരാന് സാധിക്കാറില്ല. എന്നാല് ബൈക്ക് ആംബുലന്സുകള്ക്ക് ഇടുങ്ങിയ വഴികളിലൂടെ പോലും മിന്നല് വേഗത്തില് രോഗിയുടെ അടുക്കല് എത്തുവാന് കഴിയും. ആശുപത്രിയില് എത്തുന്നതിന് മുന്പുള്ള ഏറ്റവും പ്രധാനപ്പെട്ട ‘ഗോള്ഡന് അവര്’ സമയത്ത് രോഗിക്ക് ആദ്യഘട്ട ജീവന്രക്ഷാ പരിചരണം നല്കാന് ഇത് ഏറെ സഹായകരമാണ്.
കര്ശനമായ സുരക്ഷാ മാനദണ്ഡങ്ങള്
കേവലം ഒരു ബൈക്കില് രോഗിയെ ഇരുത്തി കൊണ്ടുപോകുന്നതിന് പകരം രോഗിയുടെ സുരക്ഷ ഉറപ്പാക്കുന്നതിനായി എഐഎസ്209 എന്ന പേരില് കര്ശനമായ ദേശീയ സുരക്ഷാ നിയമങ്ങളാണ് സര്ക്കാര് അവതരിപ്പിച്ചിരിക്കുന്നത്. ഇതനുസരിച്ച് ബൈക്ക് ആംബുലന്സുകളില് രോഗിയെ കിടത്തികൊണ്ടുപോകാനുള്ള പ്രത്യേക സ്ട്രെച്ചറുകള്, സുരക്ഷാ ബെല്റ്റുകള്, അടിയന്തര സൈറണ്, വാണിംഗ് ലൈറ്റുകള്, ഫയര് എക്സ്റ്റിംഗുഷറുകള് എന്നിവ നിര്ബന്ധമായും ഉണ്ടായിരിക്കണം. 2027 ഒക്ടോബര് 1 മുതല് നിര്മ്മിക്കുന്ന എല്ലാ ബൈക്ക് ആംബുലന്സുകളും ഈ സാങ്കേതിക വിദ്യകളും സുരക്ഷാ നിര്ദ്ദേശങ്ങളും നിര്ബന്ധമായും പാലിച്ചിരിക്കണമെന്ന് സര്ക്കാര് വ്യക്തമാക്കുന്നു.
യാത്രാ സുരക്ഷയും ഫിറ്റ്നസ് പരിശോധനയും
രോഗികളുടെയും മറ്റ് വാഹനയാത്രികരുടെയും സുരക്ഷ പൂര്ണ്ണമായി ഉറപ്പാക്കുന്നതിനായി ഈ ബൈക്ക് ആംബുലന്സുകളെ വാണിജ്യ/ട്രാന്സ്പോര്ട്ട് വാഹനങ്ങളുടെ വിഭാഗത്തിലാണ് ഉള്പ്പെടുത്തിയിരിക്കുന്നത്. അതിനാല് തന്നെ ഇവയുടെ യാന്ത്രികക്ഷമതയും റോഡ് യോഗ്യതയും ഉറപ്പുവരുത്താന് ഓരോ രണ്ട് വര്ഷം കൂടുമ്പോഴും നിര്ബന്ധിത ഫിറ്റ്നസ് പരിശോധന നടത്തേണ്ടതുണ്ട്. ഇത്തരം കൃത്യമായ മാനദണ്ഡങ്ങളിലൂടെയും നിയമ പരിരക്ഷയിലൂടെയും ഇന്ത്യയിലെ അടിയന്തര മെഡിക്കല് സേവന മേഖലയില് വന് മാറ്റം കൊണ്ടുവരാന് ബൈക്ക് ആംബുലന്സുകള്ക്ക് സാധിക്കും.
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources



