ആഗോള-ആഭ്യന്തര സമ്മർദങ്ങൾക്കിടയിലും ഇന്ത്യൻ രൂപയ്ക്ക് നേരിയ നേട്ടം. വ്യാഴാഴ്ച ആദ്യ വ്യാപാരത്തിൽ ഡോളറിനെതിരെ രൂപ 10 പൈസ ഉയർന്ന് 96.65 എന്ന നിലയിലെത്തി. രൂപയുടെ ഈ നേട്ടത്തിന് പ്രധാന കാരണം റിസർവ് ബാങ്ക് ഓഫ് ഇന്ത്യയുടെ (ആർബിഐ) ഇടപെടലാണെന്നാണ് വിപണി വിദഗ്ധരുടെ വിലയിരുത്തൽ.
കഴിഞ്ഞ ദിവസം രൂപ 96.75 എന്ന നിലയിലാണ് ക്ലോസ് ചെയ്തത്. തുടർച്ചയായ സമ്മർദത്തെ തുടർന്ന് രൂപ അഞ്ച് മാസത്തെ താഴ്ന്ന നിലയിലേക്ക് എത്തിയ സാഹചര്യത്തിലാണ് ആർബിഐ വിപണിയിൽ ഇടപെട്ടതെന്നാണ് റിപ്പോർട്ടുകൾ. രൂപയുടെ മൂല്യത്തകർച്ച നിയന്ത്രിക്കുന്നതിനായി ആർബിഐ ഡോളർ വിൽപ്പന ഉൾപ്പെടെയുള്ള നടപടികൾ സ്വീകരിക്കുന്നുണ്ട്.
അതേസമയം, രൂപയ്ക്ക് മുന്നിലുള്ള സമ്മർദങ്ങൾ ഇപ്പോഴും ശക്തമാണ്. അമേരിക്കൻ ഡോളറിന്റെ ശക്തി, ഉയർന്ന ക്രൂഡ് ഓയിൽ വില, വിദേശ നിക്ഷേപകരുടെ ഓഹരി വിൽപ്പന എന്നിവ രൂപയുടെ മൂല്യത്തെ ബാധിക്കുന്ന പ്രധാന ഘടകങ്ങളാണ്. ബ്രെന്റ് ക്രൂഡ് വില ബാരലിന് ഏകദേശം 102 ഡോളറിന് സമീപം തുടരുന്നതും ഇന്ത്യയുടെ ഇറക്കുമതി ചെലവ് ഉയർത്തുന്നുണ്ട്.
വിദേശ നിക്ഷേപകരുടെ വിൽപ്പനയും രൂപയ്ക്ക് തിരിച്ചടിയാണ്. ഉയർന്ന എണ്ണവിലയും വിദേശ ഫണ്ട് പുറത്തേക്കുള്ള ഒഴുക്കും കഴിഞ്ഞ ദിവസങ്ങളിൽ രൂപയുടെ മേൽ സമ്മർദം വർധിപ്പിച്ചിരുന്നു. അതേസമയം, രൂപയുടെ മൂല്യം “അണ്ടർവാല്യൂഡ്” ആണെന്നും അത് ശരിയായ നിലവാരത്തിലെത്തുന്നുവെന്ന് ഉറപ്പാക്കാൻ ആർബിഐ നടപടികൾ സ്വീകരിക്കുമെന്നും ആർബിഐ ഗവർണർ സഞ്ജയ് മൽഹോത്ര വ്യക്തമാക്കി.
രാജ്യത്തിന്റെ വിദേശനാണയ ശേഖരത്തിലും ആർബിഐയുടെ ഇടപെടലിന്റെ പ്രതിഫലനം കാണാം. സെപ്റ്റംബർ ആദ്യം 785.71 ബില്യൺ ഡോളറായിരുന്ന വിദേശനാണയ ശേഖരം ഒക്ടോബർ ആദ്യവാരത്തോടെ 734.6 ബില്യൺ ഡോളറായി കുറഞ്ഞു. രൂപയുടെ ഇടിവ് നിയന്ത്രിക്കുന്നതിനായി ആർബിഐ നടത്തിയ ഇടപെടലുകളാണ് ഇതിന് പ്രധാന കാരണങ്ങളിലൊന്ന്.
