കൊച്ചി: ആരോഗ്യത്തിനും ലക്ഷ്യബോധത്തിനും പ്രാധാന്യം നല്‍കി ‘മൂവ് വിത്ത് പര്‍പ്പസ്’ എന്ന പ്രമേയവുമായി ഫെഡറല്‍ ബാങ്ക് കൊച്ചി മാരത്തണിന്റെ അഞ്ചാം പതിപ്പ് ഫെബ്രുവരി 14ന് നടക്കും. കൊച്ചിയിലെ മാരിയറ്റ് ഹോട്ടലില്‍ നടന്ന ചടങ്ങില്‍ കേരള ഹൈക്കോടതി ജഡ്ജി ജസ്റ്റിസ് ദേവന്‍ രാമചന്ദ്രന്‍ മാരത്തണിന്റെ ഔദ്യോഗിക ലോഞ്ച് നിര്‍വഹിച്ചു.
‘കൊച്ചി ദൈവത്തിന് ഏറ്റവും പ്രിയപ്പെട്ട നഗരം’
മാരത്തണിന്റെ ലോഞ്ച് നിര്‍വഹിച്ചുകൊണ്ട് കൊച്ചിയുടെ സവിശേഷതകളും നഗരത്തിന്റെ വര്‍ധിച്ചുവരുന്ന ജനപങ്കാളിത്തവും ജസ്റ്റിസ് ദേവന്‍ രാമചന്ദ്രന്‍ ചൂണ്ടിക്കാട്ടി. കേരളം ദൈവത്തിന്റെ സ്വന്തം നാടാണെങ്കില്‍ കൊച്ചി ദൈവത്തിന് ഏറ്റവും പ്രിയപ്പെട്ട നഗരമാണെന്ന് അദ്ദേഹം പറഞ്ഞു.
ഓരോ വര്‍ഷവും മാരത്തണിലെ പങ്കാളിത്തം വര്‍ധിച്ചുവരികയാണ്. ഇതേ രീതിയില്‍ ജനപങ്കാളിത്തം തുടര്‍ന്നാല്‍ ഭാവിയില്‍ മാരത്തണ്‍ സംഘടിപ്പിക്കാന്‍ ഇതിനേക്കാള്‍ വലിയ വേദി കണ്ടെത്തേണ്ടിവരുമെന്നും അദ്ദേഹം പറഞ്ഞു.
നാല് വിഭാഗങ്ങളിലായി മത്സരം
അത്ലറ്റിക് ഫെഡറേഷന്‍ ഓഫ് ഇന്ത്യയുടെ അംഗീകാരമുള്ള കേരളത്തിലെ ഏക മാരത്തണാണ് ഫെഡറല്‍ ബാങ്ക് കൊച്ചി മാരത്തണ്‍. കൊച്ചി കോര്‍പ്പറേഷന്റെ സഹകരണത്തോടെയാണ് അഞ്ചാം പതിപ്പ് സംഘടിപ്പിക്കുന്നത്.
പങ്കെടുക്കുന്നവര്‍ക്കായി നാല് വിഭാഗങ്ങളാണ് ഇത്തവണ ഒരുക്കിയിരിക്കുന്നത്:
- 42.195 കിലോമീറ്റര്‍- മാരത്തണ്‍
- 21.097 കിലോമീറ്റര്‍- ഹാഫ് മാരത്തണ്‍
- 10 കിലോമീറ്റര്‍- റണ്‍
- 3 കിലോമീറ്റര്‍- ഗ്രീന്‍ റണ്‍
ഒക്ടോബര്‍ 15ന് മുമ്പ് രജിസ്റ്റര്‍ ചെയ്താല്‍ 10% ഇളവ്
മാരത്തണില്‍ പങ്കെടുക്കാന്‍ താല്‍പര്യമുള്ളവര്‍ക്ക് www.kochimarathon.in എന്ന ഔദ്യോഗിക വെബ്‌സൈറ്റ് വഴി രജിസ്റ്റര്‍ ചെയ്യാം. ഒക്ടോബര്‍ 15ന് മുമ്പ് രജിസ്റ്റര്‍ ചെയ്യുന്നവര്‍ക്ക് രജിസ്‌ട്രേഷന്‍ ഫീസില്‍ 10 ശതമാനം ഇളവ് ലഭിക്കുമെന്ന് സംഘാടകര്‍ അറിയിച്ചു.
വിദര്‍ശക്ക് ആദരം
മാരത്തണിന്റെ ലോഞ്ചിനോടനുബന്ധിച്ച് കൊച്ചി മാരത്തണ്‍ കോഫി ടേബിള്‍ ബുക്കും പ്രകാശനം ചെയ്തു. മാരത്തണിന്റെ ആദ്യ പതിപ്പ് ഗുഡ്വില്‍ അംബാസഡര്‍ പ്രാചി തെഹ്ലാന്‍ പുസ്തകം കൊച്ചി സിറ്റി പൊലീസ് കമ്മിഷണര്‍ എസ്. കാളിരാജ് മഹേഷ് കുമാറിന് കൈമാറി. 2026 ഏഷ്യന്‍ ഗെയിംസ് വെള്ളി മെഡല്‍ ജേതാവ് വിദര്‍ശ കെ. വിനോദിനെ ചടങ്ങില്‍ ആദരിച്ചു.
കൊച്ചി മേയര്‍ അഡ്വ. വി.കെ. മിനിമോള്‍, ഫെഡറല്‍ ബാങ്ക് സോണല്‍ ഹെഡും സീനിയര്‍ വൈസ് പ്രസിഡന്റുമായ സി.എം. ശശിധരന്‍ എന്നിവരും ചടങ്ങില്‍ സംസാരിച്ചു.
ഫെഡറല്‍ ബാങ്ക് റീജിയണല്‍ ഹെഡും വൈസ് പ്രസിഡന്റുമായ ജോസ്‌മോന്‍ പി. ഡേവിഡ്, വൈസ് പ്രസിഡന്റ് കെ.ടി. ജയചന്ദ്രന്‍, ആസ്റ്റര്‍ മെഡ്സിറ്റി ബ്രാന്‍ഡിങ് ആന്‍ഡ് കമ്മ്യൂണിക്കേഷന്‍ ഹെഡ് ഹഫീസ് ഹസന്‍, ജെയിന്‍ യൂണിവേഴ്‌സിറ്റി ന്യൂ ഇനിഷ്യേറ്റീവ്‌സ് ഡയറക്ടര്‍ ഡോ. ടോം ജോസഫ്, ക്ലിയോസ്‌പോര്‍ട്‌സ് ഡയറക്ടര്‍ അനീഷ് പോള്‍, ക്ലിയോസ്‌പോര്‍ട്‌സ് ഡയറക്ടര്‍ ബൈജു പോള്‍, ശബരി ആര്‍. നായര്‍, എം.ആര്‍.കെ. ജയറാം, മാരത്തണ്‍ റേസ് ഡയറക്ടര്‍ ആനന്ദ് മെനേസസ് തുടങ്ങിയവര്‍ ചടങ്ങില്‍ പങ്കെടുത്തു.
