ഓൺലൈൻ ഭക്ഷണ വിതരണ രംഗത്തെ പ്രമുഖ പ്ലാറ്റ്ഫോമുകളായ സ്വിഗ്ഗിക്കും സൊമാറ്റോയ്ക്കുമെതിരെ ശക്തമായ പ്രതിഷേധവുമായി ബെംഗളൂരുവിലെ ഹോട്ടൽ ഉടമകൾ. ഓഗസ്റ്റ് 15-നകം തങ്ങളുടെ ആവശ്യങ്ങൾ അംഗീകരിച്ചില്ലെങ്കിൽ ഇരു പ്ലാറ്റ്ഫോമുകളുമായുള്ള സഹകരണം അവസാനിപ്പിക്കുമെന്ന് നഗരത്തിലെ ആയിരത്തിലധികം ഹോട്ടലുകളും റെസ്റ്റോറന്റുകളും മുന്നറിയിപ്പ് നൽകിയിട്ടുണ്ട്.
ഡെലിവറി ആപ്പുകൾ ഈടാക്കുന്ന ഉയർന്ന കമ്മീഷൻ, ഹോട്ടലുകളുടെ അനുമതിയില്ലാതെ നൽകുന്ന ഡിസ്കൗണ്ടുകൾ, വിവിധ പേരുകളിലുള്ള അധിക ചാർജുകൾ, ഉപഭോക്തൃ പരാതികൾ ലഭിക്കുമ്പോൾ മുൻകൂർ വിശദീകരണമില്ലാതെ തുക പിടിച്ചുവയ്ക്കുന്നത് തുടങ്ങിയ നടപടികളാണ് പ്രതിഷേധത്തിന് പ്രധാന കാരണം. നിലവിലെ രീതികൾ ഹോട്ടൽ വ്യവസായത്തെ സാമ്പത്തിക പ്രതിസന്ധിയിലേക്ക് തള്ളിവിടുകയാണെന്ന് ഹോട്ടൽ സംഘടനകൾ ആരോപിച്ചു.
ഉപഭോക്തൃ പരാതി ലഭിച്ചാൽ ഹോട്ടലിന്റെ വിശദീകരണം തേടാതെ പണം പിടിച്ചുവയ്ക്കരുത്, ഭക്ഷണം തയ്യാറാക്കിയ ശേഷം ഓർഡർ റദ്ദാക്കിയാൽ അതുമൂലമുള്ള നഷ്ടം ഹോട്ടലുകൾക്ക് നികത്തണം, ഹോട്ടലുകളുടെ വ്യക്തമായ സമ്മതമില്ലാതെ ഓഫറുകളും പ്രമോഷനുകളും പരസ്യ ചെലവുകളും ചുമത്തരുത്, ഓരോ മാസവും എല്ലാ വെട്ടിക്കുറവുകളുടെയും വിശദമായ സെറ്റിൽമെന്റ് റിപ്പോർട്ട് നൽകണം, അക്കൗണ്ട് സംബന്ധമായ പ്രശ്നങ്ങൾ വേഗത്തിൽ പരിഹരിക്കാൻ ഓരോ ഹോട്ടലിനും പ്രത്യേക റിലേഷൻഷിപ്പ് മാനേജറെ നിയോഗിക്കണം എന്നിവയാണ് ഹോട്ടൽ ഉടമകൾ ഉന്നയിക്കുന്ന പ്രധാന ആവശ്യങ്ങൾ.
ഹോട്ടൽ സംഘടനകളുടെ കണക്കുപ്രകാരം, 1 ലക്ഷം രൂപയുടെ ബിസിനസ് നടത്തിയാലും കമ്മീഷൻ, ഡിസ്കൗണ്ട്, മറ്റ് കിഴിവുകൾ എന്നിവയ്ക്ക് ശേഷം ഏകദേശം 40,000 രൂപ മാത്രമാണ് ഹോട്ടലുകൾക്ക് ലഭിക്കുന്നത്. ഇത് നിലവിലെ ബിസിനസ് മാതൃക ദീർഘകാലം തുടരാനാകാത്ത സാഹചര്യം സൃഷ്ടിക്കുന്നുവെന്നാണ് അവരുടെ വാദം.
ഓഗസ്റ്റ് 15-നകം സ്വിഗ്ഗിയും സൊമാറ്റോയും തങ്ങളുടെ ആവശ്യങ്ങളിൽ വ്യക്തമായ മറുപടി നൽകിയില്ലെങ്കിൽ പ്ലാറ്റ്ഫോമുകളിൽ നിന്ന് പൂർണമായി പിന്മാറാനാണ് ഹോട്ടൽ സംഘടനകളുടെ തീരുമാനം. അങ്ങനെ സംഭവിച്ചാൽ ബെംഗളൂരുവിലെ ഓൺലൈൻ ഭക്ഷണ വിതരണ മേഖലയെയും ഉപഭോക്താക്കളെയും അത് ഗണ്യമായി ബാധിക്കുമെന്നാണ് വിലയിരുത്തൽ.
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources



