2033-ഓടെ ഇന്ത്യയുടെ ബഹിരാകാശ സമ്പദ്‌വ്യവസ്ഥ 44 ബില്യൺ ഡോളറായി ഉയർത്തുക എന്നതാണ് രാജ്യത്തിന്റെ ലക്ഷ്യം. ശാസ്ത്രീയ മുന്നേറ്റങ്ങൾക്കൊപ്പം തന്നെ രാജ്യത്തിന്റെ വ്യാവസായിക വളർച്ചയ്ക്കും സ്വകാര്യ നിക്ഷേപങ്ങൾക്കും വലിയ പ്രാധാന്യമാണ് ഈ മേഖല നൽകുന്നത്. ഐ.എസ്.ആർ.ഒയുടെ മാത്രം നേതൃത്വത്തിൽ മുന്നോട്ട് പോയിരുന്ന ബഹിരാകാശ പര്യവേക്ഷണങ്ങളിലേക്ക് ഇപ്പോൾ നിരവധി സ്വകാര്യ സ്റ്റാർട്ടപ്പുകളും കമ്പനികളും കടന്നുവരുന്നത് ഈ ലക്ഷ്യത്തിലേക്കുള്ള യാത്രയെ കൂടുതൽ വേഗത്തിലാക്കുന്നുണ്ട്.
സാധാരണക്കാർക്ക് നേട്ടം
ഈ വൻ വളർച്ചയ്ക്ക് കരുത്തുപകരുന്നത് പുനരുപയോഗിക്കാവുന്ന വിക്ഷേപണ വാഹനങ്ങൾ , അത്യാധുനിക പ്രൊപ്പൽഷൻ സാങ്കേതികവിദ്യകൾ തുടങ്ങിയ നൂതന പരീക്ഷണങ്ങളാണ്. ഭൂമിയുടെ താഴ്ന്ന ഭ്രമണപഥത്തിലേക്ക് വാർത്താവിനിമയ ഉപഗ്രഹങ്ങളും ഭൗമ നിരീക്ഷണ ഉപഗ്രഹങ്ങളും വിന്യസിക്കുന്നത് വഴി രാജ്യത്തിന്റെ വിദൂര പ്രദേശങ്ങളിൽ പോലും അതിവേഗ ഇന്റർനെറ്റും ഡിജിറ്റൽ സേവനങ്ങളും എത്തിക്കാൻ സാധിക്കുന്നു. രാജ്യത്തെ സാധാരണക്കാരുടെ ദൈനംദിന ജീവിതം കൂടുതൽ എളുപ്പമാക്കുന്നതിനും, കൃഷിയും കാലാവസ്ഥാ നിരീക്ഷണവും മെച്ചപ്പെടുത്തുന്നതിനും ഈ ബഹിരാകാശ ദൗത്യങ്ങൾ ഏറെ സഹായകരമാണ്.
സാമ്പത്തിക വളർച്ചയ്ക്ക് പുറമെ രാജ്യത്തിന്റെ സുരക്ഷാ ആവശ്യങ്ങൾക്കും അതിർത്തികളുടെ കാവലിനും ബഹിരാകാശ സാങ്കേതികവിദ്യകൾ നിർണായക പങ്ക് വഹിക്കുന്നുണ്ട്. ഈ മേഖലയിലെ കുതിപ്പിലൂടെ രാജ്യത്ത് ലക്ഷക്കണക്കിന് പുതിയ തൊഴിലവസരങ്ങൾ സൃഷ്ടിക്കപ്പെടുമെന്നും അന്താരാഷ്ട്ര തലത്തിൽ ഇന്ത്യയുടെ സ്വാധീനം വർദ്ധിക്കുമെന്നും വിദഗ്ധർ വിലയിരുത്തുന്നു. വരും വർഷങ്ങളിൽ ആഗോള ബഹിരാകാശ വിപണിയിൽ മുൻനിര ശക്തിയായി മാറാൻ ഇന്ത്യയെ സജ്ജമാക്കുന്ന വലിയൊരു ചുവടുവെപ്പാണ് ഈ പുതിയ പദ്ധതികൾ.
കൃത്യതയോടെ ഐ എസ് ആർ ഒ
ഇന്ത്യയുടെ ബഹിരാകാശ മേഖല ഇന്ന് ലോകരാജ്യങ്ങൾക്ക് മുന്നിൽ വലിയ രീതിയിൽ ശ്രദ്ധിക്കപ്പെടാനും വേഗത്തിൽ വളരാനും പ്രധാന കാരണം വളരെ ചുരുങ്ങിയ ചെലവിൽ അത്യാധുനിക സാങ്കേതികവിദ്യ വികസിപ്പിച്ചെടുക്കാനുള്ള ഐ.എസ്.ആർ.ഓ.യുടെ അതിവിശിഷ്ടമായ കഴിവാണ്. വിദേശ രാജ്യങ്ങൾ കോടിക്കണക്കിന് ഡോളർ ചെലവഴിക്കുന്ന ദൗത്യങ്ങൾ, വളരെ കുറഞ്ഞ ബജറ്റിൽ വിജയകരമായി പൂർത്തിയാക്കാൻ ഇന്ത്യക്ക് സാധിക്കുന്നുണ്ട്. ചന്ദ്രയാൻ, മംഗൾയാൻ, ആദിത്യ എൽ-1 തുടങ്ങിയ ചരിത്രപ്രധാനമായ ദൗത്യങ്ങളുടെ വൻ വിജയം ഇന്ത്യയുടെ ശാസ്ത്രജ്ഞരുടെ കഠിനാധ്വാനത്തിന്റെയും നൂതനമായ ചിന്തകളുടെയും തെളിവാണ്. മറ്റ് വികസിത രാജ്യങ്ങളെ അപേക്ഷിച്ച് കൃത്യമായ പ്ലാനിംഗോടെയും തദ്ദേശീയമായി നിർമ്മിച്ച ഉപകരണങ്ങൾ ഉപയോഗിച്ചും കൃത്യതയോടെയും കാര്യങ്ങൾ പൂർത്തിയാക്കുന്നത് ലോക രാജ്യങ്ങളുടെ വലിയ രീതിയിലുള്ള വിശ്വസ്തത നേടിയെടുക്കാൻ സഹായിച്ചിട്ടുണ്ട്.
സ്വകാര്യ സംരംഭങ്ങൾ
മറ്റൊരു പ്രധാന കാരണം കേന്ദ്ര സർക്കാർ കൊണ്ടുവന്ന സുപ്രധാനമായ നയപരമായ മാറ്റങ്ങളും സ്വകാര്യ മേഖലയുടെ പങ്കാളിത്തവുമാണ്. മുൻപ് ബഹിരാകാശ ഗവേഷണങ്ങളും വിക്ഷേപണങ്ങളും പൂർണ്ണമായും സർക്കാരിന്റെ മാത്രം നിയന്ത്രണത്തിലായിരുന്നുവെങ്കിൽ, ഇപ്പോൾ ഇൻ-സ്പേസ് പോലുള്ള സംവിധാനങ്ങൾ വഴി സ്വകാര്യ സ്റ്റാർട്ടപ്പുകൾക്കും കമ്പനികൾക്കും ഈ മേഖലയിൽ പ്രവർത്തിക്കാൻ അവസരം ലഭിച്ചു. ഇതിലൂടെ സ്കൈറൂട്ട്, അഗ്നികുൽ തുടങ്ങിയ നൂറുകണക്കിന് ഇന്ത്യൻ സ്വകാര്യ കമ്പനികളും സ്റ്റാർട്ടപ്പുകളും റോക്കറ്റുകളും ഉപഗ്രഹങ്ങളും സ്വയം വികസിപ്പിക്കാൻ തുടങ്ങി. ഇത് ഐ.എസ്.ആർ.ഓ.യുടെ ജോലിഭാരം കുറയ്ക്കുകയും കൂടുതൽ വലിയ ഗവേഷണങ്ങളിലേക്ക് ശ്രദ്ധ കേന്ദ്രീകരിക്കാൻ സഹായകമാവുകയും ചെയ്തു.
ചെലവ് കുറവ് നേട്ടം
കൂടാതെ, ബഹിരാകാശ മേഖലയെ ഒരു വൻ വാണിജ്യ സാധ്യതയായി മാറ്റാൻ ഇന്ത്യക്ക് സാധിച്ചു. ന്യൂസ്‌പേസ് ഇന്ത്യ ലിമിറ്റഡ് എന്ന ഐ.എസ്.ആർ.ഓ.യുടെ വാണിജ്യ വിഭാഗം വഴി മറ്റ് വിദേശ രാജ്യങ്ങളുടെ നൂറുകണക്കിന് ഉപഗ്രഹങ്ങൾ കുറഞ്ഞ ചെലവിൽ ഇന്ത്യൻ റോക്കറ്റുകൾ ഉപയോഗിച്ച് ബഹിരാകാശത്ത് എത്തിക്കുന്നുണ്ട്. ഇതിലൂടെ രാജ്യത്തേക്ക് വലിയ തോതിൽ വിദേശനാണ്യം ഒഴുകിയെത്തുകയും ചെയ്യുന്നു. വാർത്താവിനിമയം, കാലാവസ്ഥാ നിരീക്ഷണം, കൃഷി, പ്രതിരോധ സുരക്ഷ, വിദൂര വിദ്യാഭ്യാസ ആവശ്യങ്ങൾ തുടങ്ങി സാധാരണക്കാരുടെ ദൈനംദിന ജീവിതത്തിന് ആവശ്യമായ സാങ്കേതികവിദ്യകൾ കൃത്യമായി നൽകുന്നത് വഴി സർക്കാരിൽ നിന്നും പൊതുജനങ്ങളിൽ നിന്നും ബഹിരാകാശ പദ്ധതികൾക്ക് വലിയ പിന്തുണയും നിക്ഷേപവുമാണ് ഇന്ന് ലഭിച്ചുകൊണ്ടിരിക്കുന്നത്.
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
