3 ലക്ഷം യൂണിറ്റുകളുടെ വിൽപ്പന പിന്നിട്ട് പുതിയ നാഴികക്കല്ല് സ്വന്തമാക്കി കിയ കാരെൻസ്. 2022 ഫെബ്രുവരിയിൽ വിപണിയിലെത്തിയ കാരെൻസ് കുടുംബത്തിന്റെ മൊത്തം വിൽപ്പന മൂന്ന് ലക്ഷം യൂണിറ്റ് കടന്നതായി കിയ ഇന്ത്യ അറിയിച്ചു. നാല് വർഷത്തിനുള്ളിൽ കൈവരിച്ച ഈ നേട്ടം ഇന്ത്യൻ എംപിവി വിഭാഗത്തിൽ കിയയുടെ ശക്തമായ സാന്നിധ്യമാണ് വ്യക്തമാക്കുന്നത്.
ഫൈവ്, സിക്സ്, സെവൻ സീറ്റർ ഓപ്ഷനുകളോടെ കുടുംബ ഉപഭോക്താക്കളെ ലക്ഷ്യമിട്ടാണ് കാരെൻസ് അവതരിപ്പിച്ചിരിക്കുന്നത്. വിശാലമായ കാബിൻ, ആധുനിക സാങ്കേതികവിദ്യ, സുരക്ഷാ സംവിധാനങ്ങൾ എന്നീ ഫീച്ചറുകളുടെ കരുത്തിൽ വിപണിയിൽ മികച്ച സ്വീകാര്യത നേടാനും കാരെൻസിന് കഴിഞ്ഞു. പിന്നീട് കൂടുതൽ പ്രീമിയം പതിപ്പായ കാരെൻസ് ക്ലാവിസും ഇലക്ട്രിക് പതിപ്പായ ക്ലാവിസ് ഇവിയും അവതരിപ്പിച്ചതോടെ മോഡൽ ശ്രേണിയുടെ ജനപ്രീതി കൂടുതൽ വർധിച്ചു.
കിയയുടെ കണക്കുകൾ പ്രകാരം കാരെൻസ് ശ്രേണിയുടെ വിൽപ്പനയിൽ പെട്രോൾ മോഡലുകൾക്കാണ് ഏറ്റവും കൂടുതൽ ആവശ്യകത. എങ്കിലും ഡീസൽ, ഇലക്ട്രിക് പതിപ്പുകൾക്കും മികച്ച പ്രതികരണമാണ് ലഭിക്കുന്നത്. ക്ലാവിസ് ഇവിയുടെ വരവോടെ ഇലക്ട്രിക് എംപിവി വിഭാഗത്തിലും കിയ സാന്നിധ്യം ശക്തമാക്കിയിട്ടുണ്ട്.
ഇന്ത്യയിൽ കുടുംബ വാഹന വിഭാഗത്തിലെ ഡിമാൻഡ് കൂടുന്നതിനിടെയാണ് മൂന്ന് ലക്ഷം യൂണിറ്റ് വിൽപ്പന എന്ന നേട്ടം കിയ സ്വന്തമാക്കുന്നത്. വിപുലമായ മോഡൽ ശ്രേണിയും ഉപഭോക്തൃ ആവശ്യങ്ങൾക്കനുസരിച്ചുള്ള വിവിധ പവർട്രെയിൻ ഓപ്ഷനുകളും കാരെൻസിന്റെ വളർച്ചയ്ക്ക് പ്രധാന കാരണങ്ങളാണെന്നാണ് വിപണി വിലയിരുത്തൽ.
ഫീച്ചറുകളുടെ കാര്യത്തിലും കിയ കാരൻസ് ക്ലാവിസ് ശ്രദ്ധേയമാണ്. 12.3 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റവും 12.3 ഇഞ്ച് പൂർണ ഡിജിറ്റൽ ഇൻസ്ട്രുമെന്റ് ക്ലസ്റ്ററും ഉൾപ്പെടുന്ന ആധുനിക കോക്ക്പിറ്റിനൊപ്പം എയർ പ്യൂരിഫയർ, വെന്റിലേറ്റഡ് ഫ്രണ്ട് സീറ്റുകൾ, പനോരമിക് സൺറൂഫ്, 64-കളർ ആംബിയന്റ് ലൈറ്റിങ്, എട്ട് സ്പീക്കറുകളുള്ള ബോസ് പ്രീമിയം സൗണ്ട് സിസ്റ്റം എന്നിവയും വാഹനത്തിൽ ലഭ്യമാണ്. സുരക്ഷയും ഡ്രൈവിംഗ് സൗകര്യവും വർധിപ്പിക്കാൻ 360 ഡിഗ്രി ക്യാമറ, ബ്ലൈൻഡ് സ്പോട്ട് മോണിറ്റർ, ലെവൽ 2 അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം (എഡിഎ എസ്) ഉൾപ്പെടെ നിരവധി അത്യാധുനിക സവിശേഷതകളും ഈ എംപിവിയിൽ കിയ ഒരുക്കിയിട്ടുണ്ട്.
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources



