ബാങ്ക് ഉപഭോക്താക്കൾക്ക് കൂടുതൽ സൗകര്യം നൽകുന്നതിനായി നിർണായക പ്രഖ്യാപനവുമായി റിസർവ് ബാങ്ക് ഓഫ് ഇന്ത്യ. ഇനിമുതൽ നിങ്ങളുടെ ഡിമാറ്റ് അക്കൗണ്ട് സ്റ്റേറ്റ്‌മെന്റുകളിൽ ബാങ്ക് നിക്ഷേപങ്ങളുടെ വിവരങ്ങൾ കൂടി ഉൾപ്പെടുത്താൻ ആർ.ബി.ഐ അനുമതി നൽകി. സെബി നിയന്ത്രിക്കുന്ന ഡെപ്പോസിറ്ററികൾ വഴിയാണ് ഈ വിവരങ്ങൾ ഒരൊറ്റ സ്റ്റേറ്റ്‌മെന്റിൽ ലഭ്യമാക്കുന്നത്.
നടപ്പിലാക്കുന്നത് അക്കൗണ്ട് അഗ്രിഗേറ്റർ സംവിധാനം വഴി
അക്കൗണ്ട് അഗ്രിഗേറ്റർ ചട്ടക്കൂട് ഉപയോഗിച്ചാണ് ബാങ്ക് ഡെപ്പോസിറ്റ് വിവരങ്ങൾ ഡിമാറ്റ് സ്റ്റേറ്റ്‌മെന്റിലേക്ക് ബന്ധിപ്പിക്കുന്നത്. ഇതിലൂടെ ഓഹരി നിക്ഷേപങ്ങളും ബാങ്ക് സമ്പാദ്യങ്ങളും വേവ്വേറെ പരിശോധിക്കുന്നതിന് പകരം ഒറ്റ പ്ലാറ്റ്‌ഫോമിൽ കാണാൻ സാധിക്കും. ഉപഭോക്താക്കൾക്ക് തങ്ങളുടെ സാമ്പത്തിക വിവരങ്ങൾ കൃത്യമായി നിരീക്ഷിക്കാനും മറ്റ് ധനകാര്യ സ്ഥാപനങ്ങളുമായി എളുപ്പത്തിൽ പങ്കുവെക്കാനും ഇത് സഹായിക്കും.
ഡിസംബർ 31-നകം പ്രാബല്യത്തിൽ വരും
2026 ഡിസംബർ 31-നകം ഈ സംവിധാനം നിലവിൽ വരുമെന്നാണ് റിസർവ് ബാങ്ക് അറിയിച്ചിട്ടുള്ളത്. ഡിമാറ്റ് അക്കൗണ്ടുകൾ ഇല്ലാത്ത ഉപഭോക്താക്കൾക്കും അക്കൗണ്ട് അഗ്രിഗേറ്ററുകൾ വഴി തങ്ങളുടെ സാമ്പത്തിക വിവരങ്ങൾ ഒരുമിച്ച് കാണാനുള്ള സൗകര്യമുണ്ടായിരിക്കും. സാമ്പത്തിക മേഖലയിലെ സുതാര്യത വർധിപ്പിക്കാനും ഇടപാടുകൾ കൂടുതൽ ലളിതമാക്കാനും ഈ നടപടി ഉപകരിക്കും.
സുരക്ഷാ-സ്വകാര്യതാ വെല്ലുവിളികൾ
എല്ലാ സാമ്പത്തിക വിവരങ്ങളും , ബാങ്ക് നിക്ഷേപങ്ങളും ഡിമാറ്റ് വിവരങ്ങളും ഒരൊറ്റ സ്റ്റേറ്റ്‌മെന്റിലോ പ്ലാറ്റ്‌ഫോമിലോ ലഭ്യമാകുമ്പോൾ, ഡാറ്റാ ചോർച്ചയോ സൈബർ ആക്രമണങ്ങളോ ഉണ്ടായാൽ അത് വലിയ സുരക്ഷാ ഭീഷണിയാകും. വ്യക്തിഗത സാമ്പത്തിക വിവരങ്ങൾ തെറ്റായ കൈകളിൽ എത്തുന്നതും ഓൺലൈൻ തട്ടിപ്പുകൾ വർധിക്കുന്നതും ഉപഭോക്താക്കൾക്ക് സാമ്പത്തിക നഷ്ടമുണ്ടാക്കാം. കൂടാതെ, സാങ്കേതികവിദ്യ കൈകാര്യം ചെയ്യാൻ പരിചയമില്ലാത്ത സാധാരണക്കാർക്ക് വ്യത്യസ്ത ഏജൻസികൾ വഴിയും അക്കൗണ്ട് അഗ്രിഗേറ്ററുകൾ വഴിയും ഡാറ്റ പങ്കുവെക്കുന്നത് ആശയക്കുഴപ്പത്തിനും തട്ടിപ്പുകൾക്കും വഴിതെളിച്ചേക്കാം.
