കാൻസർ ചികിത്സയ്ക്കുള്ള മരുന്നുകളുടെ വില കുറയ്ക്കാൻ കേന്ദ്രസർക്കാർ വീണ്ടും ഇടപെടുമ്പോഴും അമിത വില ഈടാക്കുന്ന പ്രവണത തിരിച്ചെത്തിയതായി റിപ്പോർട്ട്. 2019ൽ നാഷണൽ ഫാർമസ്യൂട്ടിക്കൽ പ്രൈസിങ് അതോറിറ്റി (NPPA) വിലനിയന്ത്രണം ഏർപ്പെടുത്തിയ കാൻസർ മരുന്നുകളിൽ ചിലതിന് വീണ്ടും 700 ശതമാനം വരെ മാർക്ക്അപ്പ് ഈടാക്കുന്നതായാണ് കണ്ടെത്തൽ. മരുന്നുകളുടെ വില കുറയ്ക്കാനുള്ള സർക്കാർ ഇടപെടലുകൾക്ക് എത്രത്തോളം ദീർഘകാല ഫലമുണ്ടാകുന്നുവെന്ന ചോദ്യവും ഇതോടെ ഉയരുകയാണ്.
2026ൽ പുറത്തുവന്ന പുതിയ വിലവിവരങ്ങൾ പരിശോധിക്കുമ്പോൾ 2019ലെ വിലനിയന്ത്രണ പട്ടികയിൽ ഉൾപ്പെട്ടിരുന്ന നിരവധി കാൻസർ മരുന്നുകൾക്ക് വീണ്ടും വലിയ മാർക്ക്അപ്പ് ഉണ്ടായതായി കണ്ടെത്തിയിട്ടുണ്ട്. 2019ൽ 42 കാൻസർ മരുന്നുകൾക്കാണ് NPPA വ്യാപാര മാർജിനിൽ നിയന്ത്രണം ഏർപ്പെടുത്തിയിരുന്നത്. അന്ന് 526 ബ്രാൻഡുകളുടെ പരമാവധി ചില്ലറ വിൽപ്പനവില (MRP) 91 ശതമാനം വരെ കുറയ്ക്കാൻ സാധിച്ചിരുന്നു.
എന്നാൽ ഈ വിലക്കുറവ് ദീർഘകാലം നിലനിന്നില്ലെന്നാണ് പുതിയ കണക്കുകൾ സൂചിപ്പിക്കുന്നത്. ചില മരുന്നുകളുടെ വിലയിൽ വീണ്ടും വലിയ വർധനയുണ്ടായി. 2019ൽ നിയന്ത്രണം ഏർപ്പെടുത്തിയ മരുന്നുകളിൽ ഭൂരിഭാഗത്തിനും 2026ലെ കണക്കുകളിൽ 100 മുതൽ 700 ശതമാനത്തിലധികം വരെ മാർക്ക്അപ്പ് രേഖപ്പെടുത്തിയതായി റിപ്പോർട്ടുകൾ ചൂണ്ടിക്കാട്ടുന്നു.
700 ശതമാനം വരെ അധികവില; ഞെട്ടിക്കുന്ന കണക്കുകൾ
NPPAയുടെ കണക്കുകൾ പ്രകാരം നിയന്ത്രണത്തിന് പുറത്തുള്ള കാൻസർ മരുന്നുകൾക്ക് ശരാശരി 170 ശതമാനത്തോളം വ്യാപാര മാർക്ക്അപ്പാണ് ഈടാക്കുന്നത്. ചില മരുന്നുകളിൽ ഇത് 700 ശതമാനം വരെയും ഉയരുന്നു. 2019ൽ വിലനിയന്ത്രണം ഏർപ്പെടുത്തിയ മരുന്നുകളിൽ 2026ലെ കണക്കുകൾ പ്രകാരം അഞ്ചെണ്ണത്തിന് മാത്രമാണ് 43 ശതമാനത്തിൽ താഴെയുള്ള മാർക്ക്അപ്പ് ഉണ്ടായിരുന്നത്. മറ്റ് പല മരുന്നുകൾക്കും 100 ശതമാനം മുതൽ 700 ശതമാനത്തിലധികം വരെ മാർക്ക്അപ്പ് രേഖപ്പെടുത്തി.
വീണ്ടും 137 കാൻസർ മരുന്നുകൾക്ക് വിലനിയന്ത്രണം
കാൻസർ മരുന്നുകളുടെ അമിതവില നിയന്ത്രിക്കുന്നതിനായി 137 മരുന്നുകളുടെ വ്യാപാര മാർജിൻ 30 ശതമാനമായി നിജപ്പെടുത്താൻ കേന്ദ്രസർക്കാർ തീരുമാനിച്ചിട്ടുണ്ട്. NPPAയുടെ പുതിയ ഉത്തരവ് നവംബർ 9 മുതൽ പ്രാബല്യത്തിൽ വരും. പുതിയ നിയന്ത്രണത്തിലൂടെ തിരഞ്ഞെടുത്ത മരുന്നുകളുടെ വിലയിൽ 20 മുതൽ 70 ശതമാനം വരെ കുറവുണ്ടാകുമെന്നാണ് പ്രതീക്ഷ. ഇതുവഴി രോഗികൾക്ക് പ്രതിവർഷം ഏകദേശം 2,500 കോടി രൂപയുടെ സാമ്പത്തിക ലാഭമുണ്ടാകുമെന്നും കേന്ദ്രസർക്കാർ കണക്കുകൂട്ടുന്നു.
2019ലെ നിയന്ത്രണം എന്തുകൊണ്ട് പരാജയപ്പെട്ടു?
2019ൽ വിലനിയന്ത്രണം കൊണ്ടുവന്നിട്ടും പിന്നീട് മരുന്നുകളുടെ വില വീണ്ടും ഉയർന്നതാണ് പ്രധാന ആശങ്ക. വ്യാപാര മാർജിൻ നിയന്ത്രിച്ചെങ്കിലും മരുന്നുകളുടെ വിലയിലും വിതരണ ശൃംഖലയിലും തുടർച്ചയായ നിരീക്ഷണം ഉണ്ടായില്ലെന്നാണ് രോഗികളുടെ അവകാശങ്ങൾക്കായി പ്രവർത്തിക്കുന്ന സംഘടനകളുടെ വിമർശനം. ഉദാഹരണത്തിന്, റിബോസിക്ലിബ് (Ribociclib) എന്ന കാൻസർ മരുന്നിന്റെ ഒരു മാസത്തെ ചികിത്സാച്ചെലവ് 2022ൽ 58,000 രൂപയായിരുന്നത് 2025ൽ 78,000 രൂപയായി ഉയർന്നതായി സംഘടനകൾ ചൂണ്ടിക്കാട്ടുന്നു.
പുതിയ വിലനിയന്ത്രണത്തിലും ആശങ്ക
പുതിയ നിയന്ത്രണം പ്രഖ്യാപിച്ചിട്ടുണ്ടെങ്കിലും എല്ലാ കാൻസർ മരുന്നുകളുടെയും വിലയിൽ ഒരുപോലെ കുറവുണ്ടാകില്ലെന്നാണ് വിദഗ്ധരുടെ വിലയിരുത്തൽ. പേറ്റന്റ് സംരക്ഷണമുള്ള ചില വിലകൂടിയ മരുന്നുകളുടെ വിലയിൽ വലിയ മാറ്റമുണ്ടാകണമെന്നില്ലെന്നും ചൂണ്ടിക്കാട്ടപ്പെടുന്നു.
മരുന്നുകളുടെ വില ഒരുതവണ കുറയ്ക്കുന്നതിനു പകരം തുടർച്ചയായ നിരീക്ഷണവും ഫലപ്രദമായ വിലനിയന്ത്രണ സംവിധാനവും ആവശ്യമാണെന്നാണ് രോഗികളുടെ സംഘടനകളുടെ നിലപാട്. കാൻസർ ചികിത്സ സാധാരണ കുടുംബങ്ങൾക്ക് വലിയ സാമ്പത്തിക ബാധ്യതയാകുന്ന സാഹചര്യത്തിൽ പുതിയ സർക്കാർ നടപടി എത്രത്തോളം പ്രയോജനം ചെയ്യുമെന്നതാണ് ഇനി അറിയേണ്ടത്. വിലക്കുറവ് പ്രഖ്യാപനത്തിൽ മാത്രം ഒതുങ്ങാതെ രോഗികളിലേക്ക് യഥാർഥത്തിൽ എത്തുമോ എന്നതും നിർണായകമാണ്.
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
