AIയുടെ സാധ്യതകൾ തിരിച്ചറിയണം; ഇന്ത്യൻ ചെറുകിട സംരംഭങ്ങൾക്ക് വിദഗ്ധ മുന്നറിയിപ്പ്

കൃത്രിമബുദ്ധി (AI) വെറുമൊരു സാങ്കേതിക വാഗ്ദാനമായി കാണാതെ ബിസിനസ് വളർച്ചയ്ക്കുള്ള പ്രായോഗിക ഉപാധിയായി ഉപയോഗിക്കണമെന്ന് ഇന്ത്യയിലെ സൂക്ഷ്മ, ചെറുകിട, ഇടത്തരം സംരംഭങ്ങളോട് (MSME) വിദഗ്ധർ. ഉൽപ്പാദനക്ഷമത വർധിപ്പിക്കാനും ചെലവ് കുറയ്ക്കാനും കൂടുതൽ ഉപഭോക്താക്കളിലേക്ക് എത്താനും AI സഹായിക്കുമെങ്കിലും, സാങ്കേതികവിദ്യയുടെ സാധ്യതകൾ പൂർണമായി പ്രയോജനപ്പെടുത്തുന്നതിൽ ചെറുകിട സ്ഥാപനങ്ങൾ ഇപ്പോഴും പിന്നിലാണ്.

ഇന്ത്യയുടെ മൊത്ത ആഭ്യന്തര ഉൽപ്പാദനത്തിൽ (GDP) 31.1 ശതമാനമാണ് MSME മേഖലയുടെ സംഭാവന. രാജ്യത്തെ മൊത്തം ഉൽപ്പാദനത്തിന്റെ 35.4 ശതമാനവും കയറ്റുമതിയുടെ 48.58 ശതമാനവും ഈ മേഖലയുടേതാണ്. രാജ്യത്ത് 7.47 കോടി MSME സ്ഥാപനങ്ങളുണ്ടെന്നാണ് കണക്ക്. 32.82 കോടിയിലധികം പേർക്ക് ഈ മേഖല തൊഴിൽ നൽകുന്നു. കൃഷിക്ക് ശേഷം രാജ്യത്തെ ഏറ്റവും കൂടുതൽ തൊഴിൽ നൽകുന്ന മേഖലയുമാണിത്.

AI വ്യാപകമായി ഉപയോഗിക്കാൻ കഴിഞ്ഞാൽ MSME മേഖലയ്ക്ക് വലിയ സാമ്പത്തിക നേട്ടമുണ്ടാക്കാനാകുമെന്നാണ് വിവിധ പഠനങ്ങൾ വ്യക്തമാക്കുന്നത്. PwC ഇന്ത്യയും ഒബ്സർവർ റിസർച്ച് ഫൗണ്ടേഷനും (ORF) 2026ൽ പുറത്തിറക്കിയ റിപ്പോർട്ട് പ്രകാരം, 2035ഓടെ നിർമാണ മേഖലയിലെ MSMEകൾക്ക് AI വഴി 135.6 ബില്യൺ മുതൽ 149.9 ബില്യൺ ഡോളർ വരെ സാമ്പത്തിക മൂല്യം സൃഷ്ടിക്കാനാകും.

ഗൂഗിളും ഇന്ത്യ SME ഫോറവും സംയുക്തമായി നടത്തിയ പഠനമനുസരിച്ച്, MSME മേഖലയിൽ AI കൂടുതൽ വ്യാപകമായി സ്വീകരിച്ചാൽ 490 ബില്യൺ ഡോളറിലധികം സാമ്പത്തിക മൂല്യം സൃഷ്ടിക്കാനാകും. ഡിജിറ്റൽ ഉപകരണങ്ങൾ ഉപയോഗിക്കുന്ന 60 ശതമാനത്തോളം MSMEകൾക്ക് ഇതിനകം ഇരട്ടയക്ക വരുമാന വളർച്ച കൈവരിക്കാൻ കഴിഞ്ഞിട്ടുണ്ടെന്നും പഠനം ചൂണ്ടിക്കാട്ടുന്നു. AI ഉപയോഗം സ്ഥാപനങ്ങളുടെ ലാഭക്ഷമത 30 മുതൽ 35 ശതമാനം വരെ ഉയർത്താനും സഹായിക്കുമെന്നാണ് വിലയിരുത്തൽ.

AI എങ്ങനെ പ്രയോജനപ്പെടുത്താം?
ഉൽപ്പന്നങ്ങളുടെ വിവരണങ്ങൾ തയ്യാറാക്കുക, വിപണന സാമഗ്രികൾ സൃഷ്ടിക്കുക, ഉപഭോക്താക്കളുടെ ചോദ്യങ്ങൾക്ക് മറുപടി നൽകുക, രേഖകൾ സംഗ്രഹിക്കുക തുടങ്ങിയ ജോലികൾക്ക് ജനറേറ്റീവ് AI ഉപയോഗിക്കാം. ഇൻവോയ്സ് പ്രോസസിങ്, അക്കൗണ്ടിങ്, പർച്ചേസ് ഓർഡറുകൾ, നികുതി സംബന്ധമായ രേഖകൾ, ജീവനക്കാരെ നിയമിക്കുന്നതിനുള്ള നടപടികൾ എന്നിവയും AI വഴി കൂടുതൽ വേഗത്തിലാക്കാനാകും.

നിർമാണ മേഖലയിൽ യന്ത്രങ്ങളുടെ തകരാറുകൾ മുൻകൂട്ടി തിരിച്ചറിയാനും ഉൽപ്പന്നങ്ങളിലെ പിഴവുകൾ കണ്ടെത്താനും AI സഹായിക്കും. ആവശ്യകത പ്രവചിച്ച് സ്റ്റോക്ക് നിയന്ത്രിക്കുന്നതിനും വിതരണ ശൃംഖലയിലെ തടസ്സങ്ങൾ തിരിച്ചറിയുന്നതിനും സാങ്കേതികവിദ്യ പ്രയോജനപ്പെടുത്താം. AI അടിസ്ഥാനമാക്കിയുള്ള റൂട്ട് ഒപ്റ്റിമൈസേഷൻ വഴി വിതരണ സമയത്തിൽ 15 മുതൽ 20 ശതമാനം വരെ കുറവുണ്ടാക്കാനാകുമെന്നും PwC-ORF റിപ്പോർട്ട് വിലയിരുത്തുന്നു.

എന്നാൽ AI സ്വീകരിക്കുന്നതിലെ പ്രധാന വെല്ലുവിളി അതിന്റെ ചെലവും സാങ്കേതിക വൈദഗ്ധ്യത്തിന്റെ കുറവുമാണ്. നിലവിലുള്ള സംവിധാനങ്ങളുമായി പുതിയ സാങ്കേതികവിദ്യ സംയോജിപ്പിക്കുന്നതിനുള്ള ചെലവ്, ആവശ്യമായ വിവരങ്ങളുടെ ലഭ്യതക്കുറവ്, പരിശീലനം ലഭിച്ച ജീവനക്കാരുടെ അഭാവം എന്നിവ ചെറുകിട സ്ഥാപനങ്ങൾക്ക് തടസ്സമാകുന്നു.

NASSCOM-ഉം മെറ്റയും 2024ൽ നടത്തിയ പഠനമനുസരിച്ച്, സാങ്കേതിക മേഖലയിലെ MSMEകളിൽ ഏകദേശം 65 ശതമാനത്തിന് ലഭ്യമായ AI ഉപകരണങ്ങളെക്കുറിച്ചും വിഭവങ്ങളെക്കുറിച്ചും വേണ്ടത്ര അറിവില്ല. 72 ശതമാനം സ്ഥാപനങ്ങളും AI പരിശീലന പരിപാടികളുടെ ആവശ്യകത ചൂണ്ടിക്കാട്ടിയിട്ടുണ്ട്.

ഡൺ ആൻഡ് ബ്രാഡ്സ്ട്രീറ്റ് ഇന്ത്യയുടെ 2026ലെ പഠനമനുസരിച്ച്, സർവേയിൽ പങ്കെടുത്ത MSME നേതാക്കളിൽ 76 ശതമാനം പേരും ഏതെങ്കിലും രീതിയിൽ AI ഉപയോഗിക്കുന്നുണ്ട്. എന്നാൽ വെറും അഞ്ച് ശതമാനം സ്ഥാപനങ്ങൾ മാത്രമാണ് AIയെ തങ്ങളുടെ പ്രവർത്തനങ്ങളുടെ പ്രധാന ഭാഗമാക്കി മാറ്റിയിരിക്കുന്നത്.

ഡാറ്റാ സ്വകാര്യതയും നിയമപരമായ ഉത്തരവാദിത്തങ്ങളും മറ്റൊരു പ്രധാന വെല്ലുവിളിയാണ്. ഉപഭോക്താക്കൾ, ജീവനക്കാർ, വിതരണക്കാർ എന്നിവരുടെ വ്യക്തിഗത വിവരങ്ങൾ AI സംവിധാനങ്ങൾ കൈകാര്യം ചെയ്യുമ്പോൾ കൃത്യമായ സുരക്ഷാ നടപടികളും നിയമപരമായ അനുമതികളും ഉറപ്പാക്കേണ്ടതുണ്ട്. തെറ്റായ AI സംവിധാനം തിരഞ്ഞെടുക്കുന്നത് സാമ്പത്തിക നഷ്ടത്തിനും ഉപഭോക്താക്കളുടെ വിശ്വാസം നഷ്ടപ്പെടുന്നതിനും ഇടയാക്കാം.

AI സ്വീകരിക്കാൻ കൂടുതൽ പിന്തുണ ആവശ്യമാണ്
AIയുടെ നേട്ടങ്ങൾ ചെറുകിട സ്ഥാപനങ്ങളിലേക്ക് എത്തിക്കാൻ സർക്കാരും വ്യവസായ സംഘടനകളും സാങ്കേതികവിദ്യാ ദാതാക്കളും ഒരുമിച്ച് പ്രവർത്തിക്കേണ്ടതുണ്ടെന്നാണ് വിദഗ്ധരുടെ അഭിപ്രായം. സാമ്പത്തിക സഹായം, അടിസ്ഥാന സൗകര്യങ്ങൾ, പരിശീലനം, സാങ്കേതിക മാർഗനിർദേശം എന്നിവ ഉറപ്പാക്കണം.

ഇന്ത്യ AI മിഷനായി 10,371.92 കോടി രൂപയുടെ ബജറ്റാണ് കേന്ദ്ര സർക്കാർ അംഗീകരിച്ചിട്ടുള്ളത്. കമ്പ്യൂട്ടിങ് അടിസ്ഥാന സൗകര്യങ്ങൾ, ഡാറ്റാസെറ്റുകൾ, AI ആപ്ലിക്കേഷനുകൾ, നൈപുണ്യ വികസനം, സ്റ്റാർട്ടപ്പ് ഫണ്ടിങ്, സുരക്ഷിത AI തുടങ്ങിയ ഏഴ് മേഖലകൾക്കാണ് മിഷൻ പ്രാധാന്യം നൽകുന്നത്.

ഒറ്റയടിക്ക് വലിയ നിക്ഷേപം നടത്തുന്നതിന് പകരം ചെലവ് കുറയ്ക്കാനും ഉൽപ്പാദനക്ഷമത ഉയർത്താനും സഹായിക്കുന്ന പ്രത്യേക ജോലികളിൽ AI പരീക്ഷിച്ച് ഫലം വിലയിരുത്തുകയാണ് ചെറുകിട സ്ഥാപനങ്ങൾ ആദ്യം ചെയ്യേണ്ടതെന്നും വിദഗ്ധർ നിർദേശിക്കുന്നു. ശരിയായ പരിശീലനവും സാങ്കേതിക പിന്തുണയും ലഭിച്ചാൽ ആഗോള വിപണിയിൽ ഇന്ത്യൻ MSMEകളുടെ മത്സരശേഷി ഉയർത്തുന്നതിൽ AI നിർണായക പങ്കുവഹിക്കുമെന്നാണ് വിലയിരുത്തൽ.

English Summary