ഐഫോൺ പ്രിയരുടെ എണ്ണം കൂടുന്നു; ഇന്ത്യയിൽ റെക്കോർഡ് വരുമാനം നേടി ആപ്പിൾ

ഇന്ത്യൻ വിപണിയിൽ റെക്കോർഡ് വരുമാനം സ്വന്തമാക്കി ആഗോള ടെക് കമ്പനിയായ ആപ്പിൾ. 2026 സെപ്റ്റംബറിൽ അവസാനിച്ച പാദത്തിൽ ഇന്ത്യയിലെ എക്കാലത്തെയും ഉയർന്ന ത്രൈമാസ വരുമാനമാണ് കമ്പനി രേഖപ്പെടുത്തിയത്. ഐഫോൺ വാങ്ങുന്നവരുടെ എണ്ണത്തിലുണ്ടായ വർധനയും മാക് കമ്പ്യൂട്ടറുകളുടെയും ഡിജിറ്റൽ സേവനങ്ങളുടെയും മികച്ച പ്രകടനവുമാണ് ഈ നേട്ടത്തിന് പിന്നിൽ.

സെപ്റ്റംബർ പാദത്തിൽ ഇന്ത്യയിൽ ഐഫോൺ പഴയ മോഡലുകളിൽ നിന്ന് പുതിയ മോഡലുകളിലേക്ക് മാറിയ ഉപഭോക്താക്കളുടെ എണ്ണത്തിലും റെക്കോർഡ് വർധനയുണ്ടായി. ഒരു സെപ്റ്റംബർ പാദത്തിൽ ഇന്ത്യയിൽ ഇത്രയധികം ഉപഭോക്താക്കൾ ഐഫോൺ അപ്‌ഗ്രേഡ് ചെയ്യുന്നത് ആദ്യമായാണെന്ന് കമ്പനി വ്യക്തമാക്കി. അമേരിക്ക, ചൈന തുടങ്ങിയ പ്രധാന വിപണികളിലും സമാനമായ മുന്നേറ്റം രേഖപ്പെടുത്തിയിട്ടുണ്ട്.

ഐഫോണിന് പുറമെ മാക് കമ്പ്യൂട്ടറുകളുടെ വിൽപ്പനയിലും മികച്ച പ്രകടനമാണ് കമ്പനി കാഴ്ചവെച്ചത്. ഇന്ത്യയിലും തെക്കുകിഴക്കൻ ഏഷ്യയിലും മാക് ബിസിനസ് എക്കാലത്തെയും ഉയർന്ന വരുമാനം രേഖപ്പെടുത്തി. ആഗോളതലത്തിൽ സെപ്റ്റംബർ പാദത്തിൽ മാക് വരുമാനം 24 ശതമാനം വർധിച്ച് 10.8 ബില്യൺ ഡോളറിലെത്തി.

ആപ്പിളിന്റെ സർവീസസ് വിഭാഗവും ഇന്ത്യയിൽ റെക്കോർഡ് വരുമാനം നേടി. ആപ്പ് സ്റ്റോർ, ആപ്പിൾ മ്യൂസിക്, ഐക്ലൗഡ്, ആപ്പിൾ ടിവി തുടങ്ങിയ സേവനങ്ങളാണ് ഈ വിഭാഗത്തിൽ ഉൾപ്പെടുന്നത്. ആഗോളതലത്തിൽ സർവീസസ് വരുമാനം 10 ശതമാനം വർധിച്ച് 31.6 ബില്യൺ ഡോളറിലെത്തി. ഇന്ത്യ ഉൾപ്പെടെയുള്ള വളർന്നുവരുന്ന വിപണികളിലെ മികച്ച പ്രകടനമാണ് ഈ മുന്നേറ്റത്തിന് സഹായകമായത്.

അതേസമയം, ഇന്ത്യയിലെ ഡിജിറ്റൽ പേയ്‌മെന്റ് രംഗത്തും സാന്നിധ്യം വിപുലീകരിക്കുകയാണ് കമ്പനി. ആക്‌സിസ് ബാങ്കുമായി സഹകരിച്ച് ആപ്പിൾ പേ (Apple Pay) ഇന്ത്യയിൽ അവതരിപ്പിച്ചിട്ടുണ്ട്. സുരക്ഷിതവും ലളിതവുമായ ഡിജിറ്റൽ പണമിടപാടുകൾ ഉപഭോക്താക്കൾക്ക് ലഭ്യമാക്കുകയാണ് ഇതിലൂടെ ലക്ഷ്യമിടുന്നത്.

ആഗോളതലത്തിലും മികച്ച സാമ്പത്തിക പ്രകടനമാണ് കമ്പനി രേഖപ്പെടുത്തിയത്. 2026 സെപ്റ്റംബർ പാദത്തിൽ ആപ്പിളിന്റെ ആഗോള വരുമാനം 12 ശതമാനം വർധിച്ച് 114.5 ബില്യൺ ഡോളറിലെത്തി. ഐഫോൺ വരുമാനം 17 ശതമാനം വർധിച്ച് 57.6 ബില്യൺ ഡോളറായപ്പോൾ കമ്പനിയുടെ മൊത്തം വരുമാനത്തിലും പുതിയ റെക്കോർഡ് സൃഷ്ടിക്കപ്പെട്ടു.

ഇന്ത്യയിലെ പ്രീമിയം സ്മാർട്ട്‌ഫോൺ വിപണിയിലെ വളർച്ചയും ഉപഭോക്താക്കളുടെ ബ്രാൻഡ് താൽപര്യവും ആപ്പിളിന് അനുകൂലമാകുന്നുവെന്നാണ് പുതിയ കണക്കുകൾ സൂചിപ്പിക്കുന്നത്. ഐഫോൺ വിൽപ്പനയ്ക്കപ്പുറം മാക്, ഡിജിറ്റൽ സേവനങ്ങൾ, പേയ്‌മെന്റ് സംവിധാനങ്ങൾ എന്നിവയിലൂടെ ഇന്ത്യൻ വിപണിയിൽ കൂടുതൽ ശക്തമായ സാന്നിധ്യം ഉറപ്പിക്കാനുള്ള നീക്കത്തിലാണ് കമ്പനി.

English Summary