രാജ്യത്ത് ആവശ്യത്തിന് കറൻസി നോട്ടുകൾ ലഭ്യമാണ് , വ്യാജ വാർത്തകൾ വിശ്വസിക്കരുത്

ദീപാവലി ആഘോഷങ്ങൾക്ക് മുന്നോടിയായി പുതിയ 10, 20, 50 രൂപ നോട്ടുകൾക്ക് ക്ഷാമം നേരിടുന്നുണ്ടെന്നും, ഈ നോട്ടുകൾ പിൻവലിക്കാൻ പോകുന്നുവെന്നും കാണിച്ച് സമൂഹമാധ്യമങ്ങളിൽ വ്യാപകമായി പ്രചരിച്ച വാർത്ത പൂർണ്ണമായും വ്യാജമാണെന്ന് കേന്ദ്ര സർക്കാരിന്റെ പ്രസ് ഇൻഫർമേഷൻ ബ്യൂറോ വ്യക്തമാക്കി. വാട്സാപ്പിലൂടെയും മറ്റ് ഓൺലൈൻ പ്ലാറ്റ്‌ഫോമുകളിലൂടെയുമാണ് ഇത്തരം തെറ്റായ സന്ദേശങ്ങൾ ആളുകളിലേക്ക് പെട്ടെന്ന് എത്തിച്ചേർന്നത്. റിസർവ് ബാങ്കിന്റെ പേരിലുള്ള വ്യാജ ഉത്തരവുകൾ കാണിച്ച് പൊതുജനങ്ങളിൽ ആശയക്കുഴപ്പവും ഭയവും പരത്തുക എന്ന ലക്ഷ്യത്തോടെയാണ് ഇത്തരം വ്യാജപ്രചാരണങ്ങൾ നടക്കുന്നത്.

പൂർണമായും സാധുതയുള്ളത്

റിസർവ് ബാങ്കോ മറ്റ് ഔദ്യോഗിക ഏജൻസികളോ ഇത്തരം യാതൊരുവിധ അറിയിപ്പുകളും പുറപ്പെടുവിച്ചിട്ടില്ല. നിലവിലുള്ള 10, 20, 50 രൂപയുടെ കറൻസി നോട്ടുകൾക്ക് യാതൊരുവിധ തടസ്സവുമില്ലെന്നും, അവ പൂർണ്ണമായും നിയമപരവും സാധുതയുള്ളതുമാണെന്ന് ആർ.ബി.ഐ അറിയിച്ചിട്ടുണ്ട്. രാജ്യത്ത് ആവശ്യത്തിന് കറൻസി നോട്ടുകൾ ലഭ്യമാണെന്നും, ഇത്തരം വ്യാജ വാർത്തകൾ വിശ്വസിച്ച് ആരും പരിഭ്രാന്തരാകേണ്ടതില്ലെന്നും അധികൃതർ വ്യക്തമാക്കിയിട്ടുണ്ട്. നോട്ടുകൾ പിൻവലിക്കുന്നു എന്ന തരത്തിൽ വരുന്ന സന്ദേശങ്ങൾ ആരും മറ്റുള്ളവരിലേക്ക് ഷെയർ ചെയ്യരുതെന്നും മുന്നറിയിപ്പ് നൽകിയിട്ടുണ്ട്.

പ്രചാരണങ്ങൾ ഒഴിവാക്കണം

സമൂഹമാധ്യമങ്ങളിൽ വരുന്ന ഏത് സാമ്പത്തിക വാർത്തകളും ഔദ്യോഗിക വെബ്‌സൈറ്റുകളിൽ നിന്നോ വിശ്വസനീയമായ മാധ്യമങ്ങളിൽ നിന്നോ മാത്രം സ്ഥിരീകരിക്കുക എന്നതാണ് പ്രധാനം. സാമ്പത്തിക തട്ടിപ്പുകളും വ്യാജ സന്ദേശങ്ങളും ജനങ്ങളെ തെറ്റിദ്ധരിപ്പിക്കാൻ പലപ്പോഴും ഇത്തരം അവസരങ്ങൾ ഉപയോഗപ്പെടുത്താറുണ്ട്. അതിനാൽ, റിസർവ് ബാങ്കിന്റെയോ സർക്കാരിന്റെയോ ഔദ്യോഗിക പ്രസ്താവനകൾ ഇല്ലാതെ ഇത്തരം പ്രചാരണങ്ങൾ വിശ്വസിക്കുന്നത് ഒഴിവാക്കണമെന്നും ജനങ്ങൾ അതീവ ജാഗ്രത പാലിക്കണമെന്നും ഈ സംഭവം ഓർമ്മിപ്പിക്കുന്നു.

English Summary