നിങ്ങൾക്ക് ഒരു സംഘടന തുടങ്ങണോ ? അസിം പ്രേംജി ഫൌണ്ടേഷൻ സഹായം നൽകും

സാമൂഹിക സേവന രംഗത്ത് പ്രവർത്തിക്കാൻ ആഗ്രഹിക്കുന്ന യുവ പ്രൊഫഷണലുകളെയും സംരംഭകരെയും സഹായിക്കുന്നതിനായി അസിം പ്രേംജി ഫൗണ്ടേഷൻ പുതിയൊരു പദ്ധതിക്ക് രൂപം നൽകിയിരിക്കുന്നു. രാജ്യത്തെ പിന്നോക്കം നിൽക്കുന്ന ഗ്രാമീണ-നഗര പ്രദേശങ്ങളിൽ അടിത്തട്ടിൽ പ്രവർത്തിക്കുന്ന പുതിയ സന്നദ്ധ സംഘടനകളും സാമൂഹിക സംരംഭങ്ങളും ആരംഭിക്കാൻ യുവജനങ്ങൾക്ക് ഈ പദ്ധതിയിലൂടെ അവസരമൊരുങ്ങുന്നു. സേവന മേഖലയിൽ പുതിയ ആശയങ്ങളുമായി മുന്നോട്ടുവരുന്നവർക്ക് സാമ്പത്തിക പിന്തുണയും മികച്ച മാർഗ്ഗനിർദ്ദേശങ്ങളും നൽകി അവരെ പ്രാപ്തരാക്കുകയാണ് ഫൗണ്ടേഷൻ ഈ പദ്ധതിയിലൂടെ ലക്ഷ്യമിടുന്നത്.

സാമൂഹ്യ ക്ഷേമം ലക്‌ഷ്യം

ഗ്രാമീണ മേഖലകളിലെ ഉപജീവനമാർഗ്ഗങ്ങൾ, ആരോഗ്യം, മാനസികാരോഗ്യം, ഭിന്നശേഷിക്കാർക്കായുള്ള പ്രവർത്തനങ്ങൾ , കുട്ടികളുടെയും യുവാക്കളുടെയും ക്ഷേമം തുടങ്ങിയ നിർണായക മേഖലകളിലാണ് ഈ പദ്ധതി പ്രധാനമായും ശ്രദ്ധ കേന്ദ്രീകരിക്കുന്നത്. കൂടാതെ, ആദിവാസി സമൂഹങ്ങളുടെ ഉന്നമനം, നഗരങ്ങളിലെ ചേരി പ്രദേശങ്ങളിൽ ശിശുസംരക്ഷണ കേന്ദ്രങ്ങളും ശുചിത്വവും ഉറപ്പാക്കൽ, ജനങ്ങളുടെ അവകാശങ്ങൾ സംരക്ഷിക്കൽ തുടങ്ങിയ വിവിധ സാമൂഹിക വിഷയങ്ങളിലും ഇവർക്ക് പ്രവർത്തിക്കാനാകും. സമൂഹത്തിലെ പാർശ്വവൽക്കരിക്കപ്പെട്ട വിഭാഗങ്ങളുടെ ഉന്നതിക്കായി പ്രവർത്തിക്കാൻ താൽപ്പര്യമുള്ള യുവജനങ്ങൾക്കും വികസന മേഖലയിലെ വിദഗ്ദ്ധർക്കും ഈ സംരംഭം വലിയൊരു നാഴികക്കല്ലായി മാറും.

പ്രത്യേക ഗ്രാന്റ്

രണ്ട് ഘട്ടങ്ങളായാണ് ഈ പദ്ധതി നടപ്പിലാക്കുന്നത്. ആദ്യത്തെ എട്ടു മാസത്തെ പ്രാരംഭ ഘട്ടത്തിൽ, തിരഞ്ഞെടുക്കപ്പെടുന്നവർക്ക് അതാത് പ്രദേശങ്ങളിലെ ജനങ്ങളുമായി ഇടപഴകാനും അവരുടെ യഥാർത്ഥ ആവശ്യങ്ങൾ മനസ്സിലാക്കാനും ഫൗണ്ടേഷൻ സാമ്പത്തിക സഹായം നൽകും. ഈ ഘട്ടത്തിന് ശേഷം തങ്ങളുടെ സംഘടന ഔദ്യോഗികമായി രജിസ്റ്റർ ചെയ്യുന്നവർക്ക് തുടർ പ്രവർത്തനങ്ങൾക്കായി രണ്ടു വർഷത്തെ പ്രത്യേക ഗ്രാന്റും ലഭിക്കും. പദ്ധതിയിലേക്കുള്ള അപേക്ഷകൾ ഇതിനോടകം ആരംഭിച്ചിട്ടുണ്ട്. സാമൂഹിക മാറ്റത്തിനായി പ്രവർത്തിക്കാൻ ആഗ്രഹിക്കുന്ന യുവപ്രതിഭകൾക്ക് തങ്ങളുടെ ആശയങ്ങൾ പ്രാവർത്തികമാക്കാനും നാടിന്റെ വികസനത്തിൽ പങ്കാളികളാകാനുമുള്ള സുവർണ്ണാവസരമാണിത്.

ഈ പദ്ധതിയിലേക്ക് അപേക്ഷിക്കുന്ന വ്യക്തികൾക്ക് 40 വയസ്സിൽ താഴെ പ്രായമുണ്ടായിരിക്കണം. കൂടാതെ, ഏതെങ്കിലും വിഷയത്തിൽ ബിരുദം നേടിയിരിക്കുകയും വികസന മേഖലയിൽ അല്ലെങ്കിൽ സാമൂഹിക സേവന രംഗത്ത് അടിത്തട്ടിൽ പ്രവർത്തിച്ച് ചുരുങ്ങിയത് മൂന്ന് വർഷത്തെ പരിചയം ഉണ്ടായിരിക്കുകയും വേണം. വികസന വിഷയങ്ങളിൽ വ്യക്തമായ ധാരണയുള്ളതും ജനങ്ങളുമായി നേരിട്ട് ഇടപഴകി പ്രവൃത്തിപരിചയമുള്ളതുമായ യുവ പ്രതിഭകളെ കണ്ടെത്താനാണ് ഫൗണ്ടേഷൻ ഈ നിബന്ധനകൾ മുന്നോട്ടുവെച്ചിരിക്കുന്നത്.

പുതിയ സംഘടന

അപേക്ഷിക്കുന്ന വ്യക്തി ഒരു പുതിയ സിവിൽ സൊസൈറ്റി സംഘടന അല്ലെങ്കിൽ സന്നദ്ധ സംഘടന സ്വന്തമായി രൂപീകരിക്കാനും അതിന് നേതൃത്വം നൽകാനും പൂർണ്ണമായി സന്നദ്ധനായിരിക്കണം. രാജ്യത്തെ ഏറ്റവും പിന്നോക്കം നിൽക്കുന്ന പ്രദേശങ്ങളിലായിരിക്കും പ്രവർത്തനങ്ങൾ കേന്ദ്രീകരിക്കുന്നത് എന്നതിനാൽ, തിരഞ്ഞെടുക്കപ്പെടുന്ന വ്യക്തികൾ ആ പ്രദേശങ്ങളിലേക്ക് താമസം മാറാനും അവിടെ ദീർഘകാലത്തേക്ക് താമസിച്ച് പ്രവർത്തിക്കാനും സന്നദ്ധരായിരിക്കണം. താൽക്കാലികമായി വന്നുപോകാതെ, ജനങ്ങളുടെ ഒപ്പം നിന്ന് ദീർഘകാല സമർപ്പണത്തോടെ പ്രവർത്തിക്കുക എന്നത് ഇതിൽ വളരെ പ്രധാനമാണ്.

ഇതിനകം തന്നെ സ്വന്തമായി ഒരു സംഘടനയോ എൻ.ജി.ഓയോ രജിസ്റ്റർ ചെയ്തിട്ടുള്ള വ്യക്തികൾക്ക് ഈ പദ്ധതിയിലേക്ക് അപേക്ഷിക്കാൻ അർഹതയില്ല. നിലവിൽ ഒരു സംഘടനയും സ്ഥാപിച്ചിട്ടില്ലാത്തതും, എന്നാൽ ഭാവിയിൽ സ്വന്തമായി ഒരു പുതിയ ജീവകാരുണ്യ പ്രസ്ഥാനം തുടങ്ങി സമൂഹത്തിന് വലിയൊരു മാറ്റം കൊണ്ടുവരാൻ ആഗ്രഹിക്കുന്നവർക്കും മാത്രമാണ് ഈ അവസരം നൽകുന്നത്. ആത്മാർത്ഥതയും കാഴ്ചപ്പാടുമുള്ള ഇത്തരം യുവ സംരംഭകർക്ക് സാമ്പത്തികവും സാങ്കേതികവുമായ എല്ലാ പിന്തുണയും അസിം പ്രേംജി ഫൗണ്ടേഷൻ നൽകുന്നതാണ്.

English Summary