സ്പോർട്സ് വെയർ ബ്രാൻഡായ വൺ8-നെ അജിലിറ്റാസ് സ്പോർട്സുമായി ലയിപ്പിച്ചതിന് പിന്നാലെ ഇന്ത്യൻ ക്രിക്കറ്റ് താരം വിരാട് കോലിയുടെ കമ്പനിയിലെ ഓഹരി പങ്കാളിത്തം 1.8 ശതമാനത്തിൽ നിന്ന് 6.4 ശതമാനമായി ഉയർന്നു. ഇതോടെ അജിലിറ്റാസ് സ്പോർട്സിലെ രണ്ടാമത്തെ വലിയ വ്യക്തിഗത ഓഹരി ഉടമയായി കോലി മാറി. കമ്പനിയുടെ സഹസ്ഥാപകനും സിഇഒയുമായ അഭിഷേക് ഗാംഗുലിയാണ് ഒന്നാം സ്ഥാനത്ത്.
വൺ8 സ്പോർട്സ് പ്രൈവറ്റ് ലിമിറ്റഡിനെ അജിലിറ്റാസ് സ്പോർട്സ് പ്രൈവറ്റ് ലിമിറ്റഡുമായി ലയിപ്പിക്കുന്നതിന് നാഷണൽ കമ്പനി ലോ ട്രൈബ്യൂണലിന്റെ (NCLT) മുംബൈ ബെഞ്ച് അംഗീകാരം നൽകി. നേരത്തെ അജിലിറ്റാസിൽ 40 കോടി രൂപ നിക്ഷേപിച്ച കോലി, വൺ8-ന്റെ സഹസ്ഥാപകനായും തുടരും.
ലയനത്തോടെ വൺ8-ന് അജിലിറ്റാസിന്റെ ഉൽപ്പന്ന വികസനം, ഗവേഷണം, നിർമാണം, റീട്ടെയിൽ വിൽപ്പന തുടങ്ങിയ മേഖലകളിലെ സൗകര്യങ്ങൾ പ്രയോജനപ്പെടുത്താനാകും. അമേരിക്ക, ബ്രിട്ടൻ, കാനഡ, ഓസ്‌ട്രേലിയ തുടങ്ങിയ വിപണികളിലേക്ക് ബ്രാൻഡ് വ്യാപിപ്പിക്കുകയാണ് കമ്പനിയുടെ ലക്ഷ്യം.
കളിച്ചുകൊണ്ടിരിക്കുമ്പോൾ തന്നെ സ്വന്തമായി ഒരു സ്പോർട്സ് ബ്രാൻഡ് കെട്ടിപ്പടുക്കുക എന്നത് തന്റെ ദീർഘകാല സ്വപ്നമായിരുന്നുവെന്ന് കോലി പറഞ്ഞു. ബ്രാൻഡിന്റെ തുടക്കം മുതൽ സാങ്കേതികവിദ്യ, ഉൽപ്പന്നങ്ങളുടെ മെറ്റീരിയൽ, ഡിസൈൻ തുടങ്ങിയ മേഖലകളിൽ താൻ സജീവമായി പങ്കാളിയാണെന്നും അദ്ദേഹം വ്യക്തമാക്കി.
2023-ൽ മുൻ പ്യൂമ ഇന്ത്യ, തെക്കുകിഴക്കൻ ഏഷ്യ മാനേജിങ് ഡയറക്ടർ അഭിഷേക് ഗാംഗുലിയും മുൻ പ്യൂമ എക്സിക്യൂട്ടീവുകളായ അതുൽ ബജാജും അമിത് പ്രഭുവും ചേർന്നാണ് അജിലിറ്റാസ് സ്ഥാപിച്ചത്. വൺ8, ഇറ്റാലിയൻ സ്പോർട്സ് വെയർ ബ്രാൻഡായ ലോട്ടോ, സ്പോർട്സ് ഫുട്‌വെയർ നിർമാതാക്കളായ മൊച്ചിക്കോ ഷൂസ് എന്നിവയാണ് കമ്പനിയുടെ പ്രധാന ബിസിനസുകളിൽ ഉൾപ്പെടുന്നത്.
2026 സാമ്പത്തിക വർഷത്തിൽ ഏകദേശം 1,400 കോടി രൂപയുടെ വരുമാനം നേടിയ അജിലിറ്റാസ്, നടപ്പ് സാമ്പത്തിക വർഷത്തിൽ വരുമാനം 1,800–1,900 കോടി രൂപയിലെത്തുമെന്നാണ് പ്രതീക്ഷിക്കുന്നത്. ഇന്ത്യയിൽ നിന്ന് ആഗോളതലത്തിൽ ശ്രദ്ധ നേടുന്ന സ്പോർട്സ് വെയർ ബ്രാൻഡ് സൃഷ്ടിക്കാനുള്ള കമ്പനിയുടെ ശ്രമത്തിൽ നിർണായക ചുവടുവയ്പ്പായാണ് വൺ8–അജിലിറ്റാസ് ലയനത്തെ കാണുന്നത്.
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources
