സ്വര്ണത്തിന് വീണ്ടും തിളക്കം
ഏഴ് ആഴ്ചയിലെ ഉയര്ന്ന നിലയിലേക്ക് കുതിച്ച് സ്വര്ണവില. അന്താരാഷ്ട്ര സ്വര്ണവില 4,333 ഡോളര് വരെ ഉയര്ന്നു. നിലവില് അര ശതമാനം ഉയര്ന്ന് 4270 ഡോളറിലാണ് വില. കേരളത്തില് 22 കാരറ്റ് സ്വര്ണം ഗ്രാമിന് 265 രൂപ വര്ധിച്ച് 13,725 രൂപയിലെത്തി. പവന് 2120 രൂപ ഉയര്ന്ന് 1,09,800 രൂപയാണ് ഇന്നത്തെ വില. ഇറാന്-ഒമാന് ചര്ച്ചകളിലെ പുരോഗതിയും ഹോര്മുസ് വീണ്ടും തുറക്കുമെന്ന പ്രതീക്ഷയുമാണ് വില കയറാന് പ്രധാന കാരണം. എന്നാല് ഉയര്ന്ന വിലയുള്ള സാഹചര്യത്തില് ഒറ്റത്തവണ വലിയ നിക്ഷേപത്തിന് പകരം ഘട്ടംഘട്ടമായുള്ള നിക്ഷേപമാണ് വിദഗ്ധര് നിര്ദേശിക്കുന്നത്.
വിപണിയില് കുതിപ്പ്
പശ്ചിമേഷ്യയില് സംഘര്ഷം ശമിക്കുമെന്ന പ്രതീക്ഷയും വിദേശ വിപണികളിലെ അനുകൂല സാഹചര്യവും ഇന്ത്യന് ഓഹരി വിപണിക്കും കരുത്തായി. സെന്സെക്സ് 373 പോയന്റ് ഉയര്ന്ന് 78,954 ല് ക്ലോസ് ചെയ്തു. നിഫ്റ്റി 11 പോയന്റ് മാത്രം നേട്ടത്തോടെ 24,636 ലാണ് വ്യാപാരം അവസാനിപ്പിച്ചത്. ബാങ്കിങ്, ഐടി, ധനകാര്യ ഓഹരികളിലുണ്ടായ വാങ്ങലും നിക്ഷേപകരുടെ ആത്മവിശ്വാസം വര്ധിപ്പിച്ചു. റിലയന്സ് ഇന്ഡസ്ട്രീസ് 3.5% നേട്ടത്തോടെ മികച്ച മുന്നേറ്റം നടത്തി.
വിജയിന്റെ ക്ഷേമ ബജറ്റ്
ക്ഷേമപദ്ധതികള്ക്കുള്ള വിഹിതം 15% വര്ധിപ്പിച്ച് തമിഴ്നാട് മുഖ്യമന്ത്രി സി ജോസഫ് വിജയിന്റെ കന്നി ബജറ്റ്. ധനമന്ത്രി എന് മാരി വില്സണ് അവതരിപ്പിച്ച ബജറ്റില് ക്ഷേമ പദ്ധതികള്ക്കുള്ള വിഹിതം 98,857 കോടി രൂപയില് നിന്ന് 1.14 ലക്ഷം കോടി രൂപയിലേക്ക് ഉയര്ത്തി. ഗ്രാമീണ വികസനത്തിനുള്ള ഫണ്ട് 127% വര്ധിപ്പിച്ച് 21,265 കോടി രൂപയാക്കി. ഗതാഗത മേഖലക്കുള്ള ഫണ്ട് 34 ശതമാനവും കുടിവെള്ള വിതകരണം, സാനിറ്റേഷന് മേഖലയുടെ വിഹിതം പാതിയോളവും വെട്ടിക്കുറച്ചു.
ആന്ത്രോപിക്കുമായി സഹകരിക്കാന് കര്ണാടക സര്ക്കാര്
ആര്ട്ടിഫിഷ്യല് ഇന്റലിജന്സ് കമ്പനിയായ ആന്ത്രോപിക്കിന്റെ ഉന്നതതല പ്രതിനിധി സംഘം കര്ണാടക മുഖ്യമന്ത്രി ഡി കെ വിജയകുമാറുമായി കൂടിക്കാഴ്ച നടത്തി. സര്ക്കാരിന്റെ കൈവശമുള്ള ഡാറ്റ, സ്വകാര്യതയുടെയും സുരക്ഷയുടെയും ലംഘനമുണ്ടാകാതെ എഐ അധിഷ്ഠിത പൊതുസേവന പരിഹാരങ്ങള് വികസിപ്പിക്കാന് കൈമാറാനാണ് ആലോചന. സര്ക്കാര് സേവനങ്ങള്, ആരോഗ്യം, വിദ്യാഭ്യാസം, പൗരസേവനങ്ങള് എന്നിവ കൂടുതല് കാര്യക്ഷമമാക്കാന് എഐ സാങ്കേതികവിദ്യ പ്രയോജനപ്പെടുത്തുകയാണ് സംസ്ഥാന സര്ക്കാരിന്റെ ലക്ഷ്യം.
ഹോണ്ടയും ടാറ്റയും കൈകോര്ക്കുന്നു
ജാപ്പനീസ് വാഹന നിര്മാതാക്കളായ ഹോണ്ട മോട്ടോര് ഇന്ത്യ, പുതിയ തലമുറ വാഹന പ്ലാറ്റ്ഫോം വികസിപ്പിക്കുന്നതിനായി ടാറ്റ ടെക്നോളജീസുമായി സഹകരിക്കും. ഇതാദ്യമായാണ് ഒരു ഇന്ത്യന് എന്ജിനീയറിംഗ് കമ്പനിയുമായി ജാപ്പനീസ് കമ്പനി കൈകോര്ക്കുന്നത്. ചെലവ് കുറയ്ക്കുക, പ്രാദേശികവല്ക്കരണം വര്ധിപ്പിക്കുക, ഇന്ത്യയുടെയും മറ്റ് വളര്ന്നുവരുന്ന വിപണികളുടെയും ആവശ്യങ്ങള്ക്ക് അനുയോജ്യമായ വാഹനങ്ങള് വികസിപ്പിക്കുക എന്നിവയാണ് ഈ പങ്കാളിത്തത്തിന്റെ പ്രധാന ലക്ഷ്യം. ഇന്ത്യയിലെ ഗവേഷണ-വികസന ശേഷി കൂടുതല് പ്രയോജനപ്പെടുത്തി ഭാവിയിലെ പെട്രോള്, ഹൈബ്രിഡ്, ഇലക്ട്രിക് വാഹനങ്ങള്ക്ക് അനുയോജ്യമായ പ്ലാറ്റ്ഫോമുകള് വികസിപ്പിക്കാനാണ് കമ്പനികളുടെ നീക്കം.
English Summary
Follow TheProfit.news on Google
Choose TheProfit.news as a preferred source to help find our business and finance news on Google.
Open Google Preferred Sources



